Read Ndebele-IBhayibhili Elingcwele 2006 Ulukasi 10 Bible Online

Ulukasi 10 - Ndebele-IBhayibhili Elingcwele 2006 bible

Ulukasi 10

¹Njalo emva kwalezizinto iNkosi yamisa njalo abanye abangamatshumi ayisikhombisa, yabathuma ngababili phambi kobuso bayo emizini yonke lezindaweni zonke ebizakuya kuzo yona.

²Ngakho yathi kubo: Isibili isivuno sikhulu, kodwa izisebenzi zinlutshwana. Ngakho ncengani eNkosini yesivuno, ukuze ithume izisebenzi esivunweni sayo.

³Hambani; khangelani, mina ngiyalithuma linjengezimvana phakathi kwezimpisi.

⁴Lingaphathi umxhaka, lesikhwama, lamanyathela; njalo lingabingeleli muntu endleleni.

⁵Njalo lakuyiphi indlu elingena kuyo, qalani lithi: Ukuthula kakube kulindlu.

⁶Njalo uba kukhona lapho indodana yokuthula, ukuthula kwenu kuzahlala phezu kwayo; kodwa uba kunge njalo, kuzabuyela kini.

⁷Hlalani-ke kuleyondlu, lidle linathe izinto ezivela kibo; ngoba isisebenzi sifanele umvuzo waso. Lingayi endlini lendlini.

⁸Lakuwuphi umuzi elingena kuwo, besebelemukela, dlanini okubekwa phambi kwenu,

⁹lisilise abagulayo abakuwo, njalo lithi kubo: Umbuso kaNkulunkulu usondele kini.

¹⁰Kodwa lakuwuphi umuzi elingena kuwo, futhi bengalemukeli, phumelani endleleni zawo, lithi:

¹¹Lothuli lomuzi wenu olusinamatheleyo siyaluthintithela kini; kodwa-ke yazini lokhu, ukuthi umbuso kaNkulunkulu usondele kini.

¹²Njalo ngithi kini: Kuzakuba lula eSodoma ngalolosuku, kulakulowomuzi.

¹³Maye kuwe, Korazini! Maye kuwe, Bethisayida! Ngoba uba kwakwenziwe eTire leSidoni imisebenzi yamandla eyenziwe kini, ngabe kade baphenduka bahlala bembethe amasaka lemlotheni.

¹⁴Kodwa kuzakuba lula eTire leSidoni ekugwetshweni, kulakini.

¹⁵Lawe, Kapenawume, ophakanyiselwe ezulwini, uzaphoselwa phansi esihogweni.

¹⁶Olizwayo lina uyangizwa mina; lolalayo lina uyangala mina; longalayo mina uyamala ongithumileyo.

¹⁷Babuya-ke abangamatshumi ayisikhombisa ngentokozo, besithi: Nkosi, lamadimoni ayazehlisela ngaphansi kwethu ebizweni lakho.

¹⁸Wasesithi kubo: Ngabona uSathane njengombane esiwa evela ezulwini.

¹⁹Khangelani, ngilinika amandla okunyathela phezu kwezinyoka labofezela, laphezu kwamandla wonke esitha; njalo akusoze kube lalutho olungalilimaza.

²⁰Kodwa lingathokozi ngalokho ukuthi omoya bayazehlisela ngaphansi kwenu; kodwa ikakhulu thokozani ukuthi amabizo enu alotshiwe emazulwini.

²¹Ngalelohola uJesu wathokoza emoyeni, wathi: Ngiyakubonga, Baba, Nkosi yezulu lomhlaba, ngoba uzifihlile lezizinto kwabahlakaniphileyo labaqedisisayo, kodwa wazembulela izingane; yebo, Baba, ngoba ngokunjalo kwaba kuhle phambi kwakho.

²²Konke kwanikelwa kimi nguBaba; njalo kakho owaziyo ukuthi iNdodana ingubani, ngaphandle kukaBaba, lokuthi uBaba ungubani, ngaphandle kweNdodana, njalo loba ngubani iNdodana ethanda ukumembulela.

²³Wasephendukela kubafundi bebodwa wathi: Abusisiwe amehlo abona elikubonayo.

²⁴Ngoba ngithi kini: Abaprofethi abanengi lamakhosi babethanda ukubona izinto elizibonayo lina, kodwa kaba zi bonanga; lokuzwa izinto elizizwayo, kodwa kaba zi zwanga.

²⁵Njalo khangela, isazumthetho esithile sasesisukuma, simlinga, sisithi: Mfundisi, ngenzeni ukuze ngidle ilifa lempilo elaphakade?

²⁶Wasesithi kuso: Kubhalweni emlayweni? Uwubala njani?

²⁷Sasesiphendula sathi: Wothanda iNkosi uNkulunkulu wakho, ngenhliziyo yakho yonke, langomphefumulo wakho wonke, langamandla akho wonke, langengqondo yakho yonke; lomakhelwane wakho njengalokhu uzi thanda wena.

²⁸Wasesithi kuso: Uphendule ngokuqonda; yenza lokhu, futhi uzaphila.

²⁹Kodwa sona sithanda ukuzilungisisa sathi kuJesu: Kanti ngubani umakhelwane wami?

³⁰UJesu wasephendula wathi: Umuntu othile wehla evela eJerusalema esiya eJeriko, watheleka phakathi kwabaphangi, njalo bamhlubula impahla ba m tshaya imivimvinya basuka bahamba, ba m tshiya ephosukufa.

³¹Umpristi othile waseqabuka esehla ngaleyondlela; njalo wathi embona, wadlula eceleni.

³²Langokunjalo lomLevi nxa wayesekulindawo, wafika e m bona, wadlula eceleni.

³³Kodwa umSamariya othile owayehamba wafika lapho ayekhona, njalo kwathi embona waba lesihelo,

³⁴waya kuye wabopha amanxeba akhe, ewathela amagcobo lewayini; wamkhweza phezu kweyakhe inyamazana, wamusa endlini yezihambi, wamlondoloza.

³⁵Kusisa esehamba, wakhupha odenariyo* ababili wa ba nika umninindlu, wathi kuye: Umlondoloze; njalo loba yini ozakuchitha okwedlula lokhu, mina ngizabuyisela kuwe ekubuyeni kwami.

³⁶Pho, nguwuphi kulaba abathathu ocabanga ukuthi wayengumakhelwane walowo owatheleka phakathi kwabaphangi?

³⁷Wasesithi: Ngulowo owamenzela isihawu. Ngakho uJesu wathi kuye: Hamba, lawe wenze njalo.

³⁸Kwasekusithi ekuhambeni kwabo, yena wangena emzaneni othile; lowesifazana othile, uMarta ngebizo, wamemukela endlini yakhe.

³⁹Njalo lo wayelodadewabo othiwa nguMariya, laye owahlala enyaweni zikaJesu, walizwa ilizwi lakhe.

⁴⁰Kodwa uMarta wayephazanyiswa yikusebenza okunengi; weza eduze wasesithi: Nkosi, kawukhathali yini ukuthi udadewethu ungitshiye ukuthi ngisebenze ngedwa? Ngakho umtshele ukuthi angisize.

⁴¹Kodwa uJesu waphendula wathi kuye: Marta, Marta, uyaphiseka ukhathazeke ngezinto ezinengi;

⁴²kodwa yinye into edingekayo; kodwa uMariya ukhethile isabelo esihle, angayikwemukwa sona.