Read Ndebele-IBhayibhili Elingcwele 2006 Ulukasi 15 Bible Online

Ulukasi 15 - Ndebele-IBhayibhili Elingcwele 2006 bible

Ulukasi 15

¹Kwasekusondela kuye bonke abathelisi lezoni, ukumuzwa.

²AbaFarisi lababhali basebesola besithi: Lo wemukela izoni, adle lazo.

³Wasebatshela lumfanekiso, esithi:

⁴Nguwuphi umuntu kini ongathi elezimvu ezilikhulu, abeselahlekelwa ngenye yazo, ongazitshiyi ezingamatshumi ayisificamunwemunye lasificamunwemunye egangeni, alandele elahlekileyo, aze ayithole?

⁵Njalo athi ese yi tholile a ye tshate ethokoza.

⁶Esefikile ekhaya, abizele ndawonye abangane labomakhelwane, esithi kubo: Thokozani lami, ngoba ngithole imvu yami ebilahlekile.

⁷Ngithi kini: Ngokunjalo kuzakuba khona intokozo ezulwini ngesoni esisodwa esiphendukayo, kulabalungileyo abangamatshumi ayisificamunwemunye lasificamunwemunye, abangasweli ukuphenduka.

⁸Loba nguwuphi umfazi othi elenhlamvu zesiliva ezilitshumi, uba elahlekelwa luhlamvu olulodwa lwesiliva, angalumathisi isibane, athanyele indlu, adingisise aze a lu thole?

⁹Njalo nxa ese lu tholile ubizela ndawonye abangane labomakhelwane, athi: Thokozani lami, ngoba sengilutholile uhlamvu lwesiliva ebengilahlekelwe yilo.

¹⁰Ngokunjalo, ngithi kini, ikhona intokozo phambi kwezingilosi zikaNkulunkulu ngesoni esisodwa esiphendukayo.

¹¹Wasesithi: Umuntu othile wayelamadodana amabili;

¹²encinyane yawo yasisithi kuyise: Baba, nginika isabelo sempahla esiqondene lami. Wasewehlukanisela impahla.

¹³Njalo kungelansuku ezinengi emva kwalokhu indodana encinyane yabutha konke yasuka yahamba yaya elizweni elikhatshana, njalo lapho yachitha khona impahla yayo, iphila okobuhlanya.

¹⁴Yathi isichithile konke, kwavela indlala enkulu kulelolizwe, yona yasiqala ukuswela.

¹⁵Yasisuka yazihlanganisa lesinye sezakhamizi zalelolizwe; njalo sayithuma emasimini aso ukuze yeluse izingulube.

¹⁶Yasifisa ukugcwalisa isisu sayo ngamakhasi ingulube eziwadlayo; njalo kwakungelamuntu oyinika ulutho.

¹⁷Kwathi ingqondo yayo isibuyile yathi: Zingaki izisebenzi zikababa eziqatshiweyo ezilezinkwa ezinengi kakhulu, kanti mina ngiyafa yindlala;

¹⁸ngizasukuma ngiye kubaba, ngithi kuye: Baba, ngonile ezulwini, laphambi kwakho;

¹⁹njalo kangisafanelanga ukubizwa ngithiwe ngiy indodana yakho; ngenza ngibe njengomunye wezisebenzi zakho eziqatshiweyo.

²⁰Yasisukuma yaya kuyise. Kodwa kuthe isesekhatshana, uyise wayibona, waba lesihelo, wagijima wawela entanyeni yayo, wayanga.

²¹Indodana yasisithi kuye: Baba, ngonile ezulwini laphambi kwakho, futhi kangisafanelanga ukubizwa ngokuthi ngiy indodana yakho.

²²Kodwa uyise wathi ezincekwini zakhe: Khuphani lilethe isembatho esihle kakhulu liyigqokise, lifake indandatho esandleni sayo, lamanyathela enyaweni zayo;

²³lilethe ithole elinonisiweyo li li hlabe, njalo sidle sithokoze;

²⁴ngoba indodana yami le ibifile, isibuye yaphila; ibilahlekile, itholiwe; basebeqala ukuthokoza.

²⁵Kodwa indodana yakhe endala yayisensimini; yathi isiza isondela endlini, yezwa ukuhlabelela lokusina.

²⁶Yasibizela kuyo omunye wezinceku, yabuza ukuthi zitshoni lezizinto.

²⁷Yasisithi kuyo: Umfowenu ufikile; loyihlo uhlabile ithole elinonisiweyo, ngoba ememukele ephila.

²⁸Kodwa yathukuthela, ayizange ifune ukungena; ngakho uyise waphuma wayincenga.

²⁹Kodwa yaphendula yathi kuyise: Khangela, iminyaka engaka ngikusebenzela, kangizange ngeqe umlayo wakho, kodwa kawuzange unginike lazinyane lembuzi, ukuze ngijabule kanye labangane bami.

³⁰Kodwa kuthe isifikile lindodana yakho eyachitha impahla yakho lezifebe, wayihlabela ithole elinonisiweyo.

³¹Wasesithi kuyo: Ndodana, wena uhlezi ulami, futhi konke okungokwami kungokwakho.

³²Kodwa bekufanele ukuthi sijabule sithokoze; ngoba umfowenu lo owayefile, usebuye waphila; wayelahlekile, utholiwe.