Read Ndebele-IBhayibhili Elingcwele 2006 Ulukasi 17 Bible Online

Ulukasi 17 - Ndebele-IBhayibhili Elingcwele 2006 bible

Ulukasi 17

¹Wasesithi kubafundi: Kakungeke kwenzeke ukuthi kungaveli izikhubekiso; kodwa maye kulowo ezivela ngaye !

²Kungaba ngcono kuye ukuthi ilitshe lokuchola elikhulu ligaxwe entanyeni yakhe, abesephoselwa olwandle, kulokuthi akhubekise abe munye kulaba abancinyane.

³Zinanzeleleni lina. Njalo nxa umfowenu ekona, mkhuze; futhi nxa ephenduka, mthethelele.

⁴Njalo loba ekona kuze kube kasikhombisa ngosuku, abesebuya kuwe kasikhombisa ngosuku, esithi: Ngiyaphenduka; uzamthethelela.

⁵Abaphostoli basebesithi eNkosini: Yandisa kithi ukholo.

⁶INkosi yasisithi: Uba lilokholo olungangohlamvu lwemasitedi, belingatsho kulesisihlahla somabhulosi ukuthi: Quphuka, ugxumekeke olwandle; futhi besizalilalela.

⁷Kodwa nguwuphi kini olenceku elimayo kumbe eyelusayo, ohle athi kiyo ingena ivela ensimini: Sondela, uhlale ekudleni?

⁸Kodwa kazukutsho yini kuyo ukuthi: Lungisa engingakudla, uzibhince ungincedise, ngize ngidle nginathe; njalo emva kwalokhu udle unathe wena?

⁹Uyayibonga yini leyonceku, ngoba yenze izinto ezilayiweyo? Angicabangi.

¹⁰Kunjalo-ke lani, nxa selikwenzile konke elikulayiweyo, kalibokuthi: Sizinceku ezingasizi lutho, ngoba senze lokhu ebesifanele ukukwenza.

¹¹Kwasekusithi esahamba esiya eJerusalema, yena wadabula phakathi laphakathi kweSamariya leGalili.

¹²Esangena emzaneni othile, amadoda alitshumi alobulephero amhlangabeza, ema khatshana;

¹³wona asephakamisa ilizwi, esithi: Jesu, Nkosi, sihawukele !

¹⁴Futhi kuthe e wa bona wathi kuwo: Hambani liyeziveza kubapristi. Kwasekusithi ekusukeni kwawo, ahlanjululwa.

¹⁵Futhi omunye wawo, esebonile ukuthi usilisiwe, wabuyela, edumisa uNkulunkulu ngelizwi elikhulu;

¹⁶wasesiwa ngobuso enyaweni zakhe, embonga; njalo yena wayengumSamariya.

¹⁷Kodwa uJesu waphendula wathi: Kakuhlanjululwanga yini abalitshumi? Bangaphi pho abayisificamunwemunye?

¹⁸Akuficakalanga ababuya ukunika uNkulunkulu udumo, ngaphandle kwalo owezizweni.

¹⁹Wasesithi kuye: Sukuma uhambe; ukholo lwakho lukusindisile.

²⁰Kwathi ebuzwa ngabaFarisi, ukuthi umbuso kaNkulunkulu uzakuza nini, wasebaphendula wathi: Umbuso kaNkulunkulu kawuzi ngokukhanyayo;

²¹njalo kabayikutsho ukuthi: Khangelani nanku, kumbe: Khangelani nankuya. Ngoba khangelani, umbuso kaNkulunkulu uphakathi kwenu.

²²Wasesithi kubafundi: Kuzafika insuku lapho elizafisa ukubona lube lunye lwezinsuku zeNdodana yomuntu, kodwa kaliyiku lu bona.

²³Njalo bazakuthi kini: Khangelani nangu, kumbe: Khangelani nanguya; lingayi, njalo lingalandeli.

²⁴Ngoba njengombane ophazimayo ukhanyisa kusukela kokunye ukucina ngaphansi kwezulu kusiya kokunye ukucina ngaphansi kwezulu, izakuba njalo leNdodana yomuntu esukwini lwayo.

²⁵Kodwa kuqala imele ihlupheke izinto ezinengi njalo ilahlwe yilesisizukulwana.

²⁶Futhi njengoba kwenzeka ensukwini zikaNowa, kuzakuba njalo lensukwini zeNdodana yomuntu.

²⁷Babesidla, benatha, bethatha, besendiswa, kwaze kwaba lusuku uNowa angena ngalo emkhunjini, kwasekufika uzamcolo, wababhubhisa bonke.

²⁸Ngokufananayo futhi njengoba kwenzeka ensukwini zikaLothi; babesidla, benatha, bethenga, bethengisa, behlanyela, besakha;

²⁹kodwa ngosuku uLothi aphuma ngalo eSodoma, kwana umlilo lesibabule kuvela ezulwini, kwababhubhisa bonke;

³⁰kuzakuba njalo ngosuku ezakwembulwa ngalo iNdodana yomuntu.

³¹Ngalolosuku, lowo ophezu kophahla lwendlu, lempahla zakhe zisendlini, angehli uku ya zithatha; losensimini ngokunjalo angabuyeli ezintweni ezisemuva.

³²Khumbulani umkaLothi.

³³Loba ngubani odinga ukusindisa impilo yakhe izamlahlekela; kodwa loba ngubani olahlekelwa yiyo uzayilondoloza.

³⁴Ngithi kini: Ngalobobusuku kuzakuba khona ababili embhedeni munye; omunye uzasuswa, lomunye atshiywe.

³⁵Kuzakuba khona abesifazana ababili bechola ndawonye; omunye uzasuswa, lomunye atshiywe.

³⁶Kuzakuba khona ababili ensimini; omunye uzasuswa, lomunye atshiywe.

³⁷Basebephendula bathi kuye: Ngaphi, Nkosi? Wasesithi kubo: Lapho okukhona isidumbu, ku lapho amanqe azabuthana khona.