Read Ndebele-IBhayibhili Elingcwele 2006 Ulukasi 2 Bible Online

Ulukasi 2 - Ndebele-IBhayibhili Elingcwele 2006 bible

Ulukasi 2

¹Kwasekusithi ngalezonsuku, isimiso saphuma kuKesari uAgastasi, sokuthi kubhalwe umhlaba wonke.

²Lokhukubhalwa kwakungokokuqala ukwenziwa lapho uKwiriniya engumbusi weSiriya.

³Bonke basebesiya ukuze ba ye bhalwa, ngulowo lalowo emzini wakibo.

⁴LoJosefa laye wenyuka esuka eGalili, emzini weNazaretha, waya eJudiya, emzini kaDavida, othiwa yiBhethelehema, ngoba wayengowendlu lowosendo lukaDavida,

⁵uku ya bhalwa kanye loMariya umkakhe ayemganile, owayezithwele.

⁶Kwasekusithi belapho, zaseziphelela insuku zokubeletha kwakhe.

⁷Wasebeletha indodana yakhe eyingqabutho, wayigoqela ngamalembu, wayilalisa emkolweni, ngoba kwakungelandawo yabo endlini yezihambi.

⁸Njalo kwakukhona kulelolizwe abelusi ababehlala egangeni futhi belinde umhlambi wabo ebusuku.

⁹Njalo khangela, ingilosi yeNkosi yema eduze kwabo, lenkazimulo yeNkosi yakhanya ibazingelezele; njalo besaba ngokwesaba okukhulu.

¹⁰Ingilosi yasisithi kubo: Lingesabi; ngoba khangelani, ngitshumayela indaba ezinhle kini ezentokozo enkulu, ezakuba kubantu bonke;

¹¹ngoba lizalelwe lamuhla uMsindisi, onguKristu iNkosi, emzini kaDavida.

¹²Njalo lokhu kuzakuba yisibonakaliso kini: Lizathola usane lugoqelwe ngamalembu, lulele emkolweni.

¹³Njalo kwahle kwaba khona kanye lengilosi ixuku lebutho lasezulwini, lidumisa uNkulunkulu, lisithi:

¹⁴Udumo kalube kuNkulunkulu kweliphezulu, lokuthula emhlabeni; isifiso esihle ebantwini.

¹⁵Kwasekusithi, ingilosi sezisukile kubo zisiya ezulwini, abantu, abangabelusi, bakhulumisana besithi: Ake siye eBhethelehema, sibone leyonto eyenzakeleyo, iNkosi esazise yona.

¹⁶Basebesiza ngokuphangisa, bathola oMariya loJosefa, losane lulele emkolweni.

¹⁷Sebebonile basebesazisa indawo ezizingelezeleyo ngelizwi ababelitshelwe mayelana lalo umntwana omncane.

¹⁸Labo bonke aba ku zwayo bamangala ngezinto ezazikhulunywe ngabelusi kubo.

¹⁹Kodwa uMariya walondoloza wonke la amazwi, enakana ngawo enhliziyweni yakhe.

²⁰Basebebuyela abelusi, bemdumisa bembonga uNkulunkulu ngazo zonke izinto ababezizwile lababezibonile, njengalokho okwakukhulunywe kubo.

²¹Kwathi seziphelile insuku eziyisificaminwembili zokuthi umntwana omncane asokwe, ibizo lakhe laselithiwa nguJesu, elalibizwe yingilosi engakomulwa esiswini.

²²Kwathi seziphelele insuku zokuhlanjululwa kwakhe ngokomlayo kaMozisi, bamletha eJerusalema, ukuze ba m mise phambi kweNkosi

²³(njengokulotshiweyo emlayweni weNkosi ukuthi konke okwesilisa okuvula isibeletho kuzathiwa kungcwele eNkosini)

²⁴lokuthi banikele umhlatshelo njengokutshiwo emlayweni weNkosi, amajuba amabili kumbe amaphuphu amabili enkwilimba.

²⁵Njalo khangela, kwakukhona eJerusalema umuntu, obizo lakhe linguSimeyoni, njalo lumuntu wayelungile ekhuthele ekukhonzeni, elindele induduzo kaIsrayeli, loMoya oNgcwele wayephezu kwakhe.

²⁶Futhi kwakubonakalisiwe kuye nguMoya oyiNgcwele, ukuthi kayikubona ukufa engakamboni uKristu weNkosi.

²⁷Wasengena ethempelini ngoMoya; kwathi abazali bemletha umntwana omncane uJesu, ukuze benze ngaye ngokomkhuba womlayo,

²⁸yena wasemthatha wamphatha engalweni zakhe, wabonga uNkulunkulu, wathi:

²⁹Nkosi, khathesi iyekele inceku yakho ihambe ngokuthula, njengokwelizwi lakho;

³⁰ngoba amehlo ami alubonile usindiso lwakho

³¹olulungisileyo phambi kobuso babantu bonke;

³²ukukhanya kokwembulela abezizwe, lenkazimulo yesizwe sakho uIsrayeli.

³³UJosefa lonina basebemangala ngezinto ezatshiwo ngaye.

³⁴USimeyoni wasebabusisa, wathi kuMariya unina: Khangela, lo umiselwe ukuwa lokuvuka kwabanengi kuIsrayeli, lokuba yisibonakaliso esizaphikiswa;

³⁵futhi lawe, inkemba izadabula owakho umphefumulo; ukuze imicabango yenhliziyo ezinengi yembulwe.

³⁶Njalo kwakukhona uAna umprofethikazi, indodakazi kaFanuweli, owesizwe sikaAsheri; wayesekhulile kakhulu, ebehlale lendoda iminyaka eyisikhombisa kusukela ebuntombini bakhe,

³⁷njalo wayengumfelokazi owayengaba leminyaka engamatshumi ayisificaminwembili lane, engasuki ethempelini, ekhonza ngokuzila ukudla langemikhuleko ebusuku lemini.

³⁸Laye-ke efika ngalelohola wadumisa uNkulunkulu, wakhuluma ngaye kubo bonke ababelindele inkululeko eJerusalema.

³⁹Kwathi sebeqedile konke okungokomlayo weNkosi, babuyela eGalili, emzini wakibo iNazaretha.

⁴⁰Lomntwana omncane wakhula, waqina emoyeni, wagcwala inhlakanipho; lomusa kaNkulunkulu wawuphezu kwakhe.

⁴¹Njalo abazali bakhe babesiya eJerusalema wonke umnyaka ngomkhosi wephasika.

⁴²Kwathi eseleminyaka elitshumi lambili, sebenyukele eJerusalema njengomkhuba womkhosi,

⁴³njalo seziphelile insuku, ekubuyeleni kwabo, umntwana uJesu wasala eJerusalema; njalo uJosefa lonina bengazi;

⁴⁴kodwa becabanga ukuthi wayesexukwini endleleni, bahamba uhambo losuku, bamdinga phakathi kwezinini labazana labo;

⁴⁵kodwa bengamtholi, babuyela eJerusalema, bemdinga.

⁴⁶Kwasekusithi emva kwensuku ezintathu, bamthola ethempelini, ehlezi phakathi kwabafundisi, njalo ebalalela, futhi ebabuza.

⁴⁷Njalo bonke ababemuzwa bamangala kakhulu ngolwazi lempendulo zakhe.

⁴⁸Kwathi bembona bamangala; lonina wathi kuye: Mntana mi, wenzeleni okunje kithi? Khangela, uyihlo lami besikudinga sidubekile.

⁴⁹Wasesithi kubo: Ku ngani lingidinga? Belingakwazi yini ukuthi kumele ukuthi ngibe sezintweni zikaBaba?

⁵⁰Kodwa bona kabaliqedisisanga ilizwi alikhuluma kibo.

⁵¹Wasesehla labo, weza eNazaretha; wazehlisela ngaphansi kwabo. Unina wasegcina zonke lezizinto enhliziyweni yakhe.

⁵²UJesu waseqhubeka enhlakaniphweni lekukhuleni, lekuthandekeni kuNkulunkulu lebantwini.