Read Ndebele-IBhayibhili Elingcwele 2006 Ulukasi 20 Bible Online

Ulukasi 20 - Ndebele-IBhayibhili Elingcwele 2006 bible

Ulukasi 20

¹Kwasekusithi ngolunye lwalezonsuku, efundisa abantu ethempelini etshumayela ivangeli, ba m fikela abapristi abakhulu lababhali kanye labadala,

²basebekhuluma laye, besithi: Sitshele, ukuthi izinto lezi uzenza ngaliphi igunya, kumbe ngubani okunike leligunya?

³Wasephendula wathi kubo: Lami ngizalibuza umbuzo ube munye, njalo lingitshele:

⁴Ubhabhathizo lukaJohane lwavela ezulwini, kumbe ebantwini?

⁵Basebezindlisana, besithi: Uba sisithi: Ezulwini, uzakuthi: Kungani-ke lingamkholwanga?

⁶Kodwa uba sisithi: Ebantwini; abantu bonke bazasikhanda ngamatshe; ngoba baleqiniso lokuthi uJohane wayengumprofethi.

⁷Basebephendula ngokuthi kabazi lapho o lwa vela khona.

⁸UJesu wasesithi kubo: Lami kangilitsheli ukuthi ngenza lezizinto ngaliphi igunya.

⁹Waseqala ukutshela abantu lumfanekiso, esithi: Umuntu othile wahlanyela isivini, wasiqatshisa kubalimi, waya kwelinye ilizwe okwesikhathi eside;

¹⁰kwathi ngesikhathi esifaneleyo wathuma inceku kubalimi, ukuze bayinike okwesithelo sesivini; kodwa abalimi bayitshaya ba yi thumeza ize.

¹¹Wasethuma njalo enye inceku; layo bayitshaya ba yi yangisa, ba yi thumeza ize.

¹²Wasephinda ethuma leyesithathu; layo leyo ba yi limaza ba yi phosela ngaphandle.

¹³Umninisivini wasesithi: Ngizakwenza njani? Ngizathuma indodana yami ethandekayo; mhlawumbe bebona yona baza yi hlonipha.

¹⁴Kodwa abalimi beyibona bazindlisana, besithi: Le yindlalifa; wozani, siyibulale, ukuze ilifa libe ngelethu.

¹⁵Bayiphosela ngaphandle kwesivini, ba yi bulala. Kambe uzakwenzani kubo umninisivini?

¹⁶Uzakuza, ababhubhise labobalimi, anikele isivini kwabanye. Be ku zwa basebesithi: Akungabi njalo !

¹⁷Kodwa wabakhangela wathi: Pho kuyini lokhu okulotshiweyo, okuthi: Ilitshe abakhi abalalayo, yilo eseliyinhloko yengonsi?

¹⁸Wonke owela phezu kwalelolitshe, uzaphahlazwa; kodwa loba ngubani eliwela phezu kwakhe, lizamchoboza.

¹⁹Abapristi abakhulu lababhali basebedinga ukumbamba ngezandla ngalelohola, kodwa besaba abantu; ngoba baqedisisa ukuthi wayekhuluma lumfanekiso emelane labo.

²⁰Basebe m qaphela, bethuma inhloli, ezazitshaya ezilungileyo, ukuze bambambe ekukhulumeni, ukuze bamnikele egunyeni lemandleni ombusi.

²¹Bambuza-ke, besithi: Mfundisi, siyazi ukuthi wena ukhuluma ufundise ngokuqondileyo, kawemukeli buso, kodwa ufundisa indlela kaNkulunkulu ngeqiniso.

²²Sivunyelwe yini ukuthela kuKesari, kumbe hatshi?

²³Kodwa wabubona ubuqili babo, wathi kubo: Lingilingelani?

²⁴Ngitshengisani udenariyo*; ulomfanekiso lombhalo kabani? Basebephendula besithi: OkaKesari.

²⁵Wasesithi kubo: Ngakho nikani uKesari okukaKesari, loNkulunkulu okukaNkulunkulu.

²⁶Basebesehluleka ukumbamba ngelizwi lakhe phambi kwabantu; basebemangaliswa yimpendulo yakhe, bathula.

²⁷Kwasekusiza kuye abathile babaSadusi, abaphika besithi kakukho ukuvuka kwabafileyo, bambuza,

²⁸besithi: Mfundisi, uMozisi wasibhalela ukuthi: Uba kusifa umfowabo womuntu elomkakhe, lo abesesifa engelamntwana, umfowabo kamthathe umfazi, abesemvusela inzalo umfowabo.

²⁹Ngakho kwakulezelamani eziyisikhombisa; owokuqala wasethatha umfazi, wafa engelamntwana;

³⁰lowesibili wamthatha umfazi, laye lo wafa engelamntwana;

³¹lowesithathu wamthatha. Kwaba njalo-ke lakwabayisikhombisa; abatshiyanga abantwana, bafa.

³²Ekucineni kwabo bonke kwafa lomfazi.

³³Ngakho ekuvukeni kwabafileyo, uzafika abe ngumkabani kubo? Ngoba abayisikhombisa babelaye engumkabo.

³⁴UJesu wasephendula wathi kubo: Abantwana balumhlaba bayathatha, bendiswe;

³⁵kodwa labo okuzathiwa bafanele ukuzuza lowomhlaba lokuvuka kwabafileyo kabathathani, kabendiswa;

³⁶ngoba bengelakuphinda bafe; ngoba banjengezingilosi, njalo bangabantwana bakaNkulunkulu, bengabantwana bokuvuka.

³⁷Kodwa ukuthi abafileyo bayavuswa, loMozisi wakutshengisa esihlahleni, lapho eyibiza iNkosi ngokuthi nguNkulunkulu kaAbrahama loNkulunkulu kaIsaka loNkulunkulu kaJakobe.

³⁸Futhi kayisuye uNkulunkulu wabafileyo, kodwa owabaphilayo; ngoba bonke baphilela yena.

³⁹Abathile bababhali basebephendula bathi: Mfundisi, ukhulume kuhle.

⁴⁰Njalo kababanga lesibindi sokuphinda bambuze ulutho.

⁴¹Wasesithi kubo: Batsho njani ukuthi uKristu uyiNdodana kaDavida?

⁴²Ngoba uDavida uqobo lwakhe uthi encwadini yeziHlabelelo: INkosi yathi eNkosini yami: Hlala ngakwesokunene sami,

⁴³ngize ngenze izitha zakho zibe yisenabelo senyawo zakho.

⁴⁴Ngakho uDavida umbiza ngokuthi yiNkosi, pho uyindodana yakhe njani?

⁴⁵Kwathi besalalele abantu bonke, wathi kubafundi bakhe:

⁴⁶Xwayani ababhali abathanda ukuhamba bembethe izembatho ezinde, njalo bethanda ukubingelelwa emidangeni, lezihlalo eziqakathekileyo emasinagogeni, lezihlalo zabahloniphekayo ezilayelweni;

⁴⁷abadla izindlu zabafelokazi, bekhuleka isikhathi eside ngokuzenzisa. Laba bazakwemukela ukulahlwa okukhulu.