Read Ndebele-IBhayibhili Elingcwele 2006 Ulukasi 21 Bible Online

Ulukasi 21 - Ndebele-IBhayibhili Elingcwele 2006 bible

Ulukasi 21

¹Wathi ephakamisa amehlo wabona abanothileyo bephosela iminikelo yabo esitsheni somnikelo.

²Wabona lomfelokazi othile ongumyanga ephosela khona inhlamvana ezincane ezimbili zemali.

³Wathi: Ngiqinisile ngithi kini: Lumfelokazi ongumyanga uphosele okwedlula okwabo bonke;

⁴ngoba bonke laba baphosele kokunengi kwabo eminikelweni kaNkulunkulu, kodwa yena ebuyangeni bakhe uphosele konke alakho abephila ngakho.

⁵Abanye besakhuluma ngethempeli, ukuthi liceciswe ngamatshe amahle langezipho, wathi:

⁶Lezizinto elizibonayo, kuzafika insuku okungayikutshiywa ngazo ilitshe phezu kwelitshe, elingayikudilizelwa phansi.

⁷Basebembuza, besithi: Mfundisi, pho lezizinto zizakuba nini? Lesibonakaliso siyini, lapho sekuzakwenzeka lezizinto?

⁸Wasesithi: Qaphelani ukuthi lingaduhiswa; ngoba abanengi bazakuza ebizweni lami, besithi: Ngi nguye; futhi: Isikhathi sesisondele. Ngakho lingabalandeli.

⁹Njalo nxa lisizwa ngezimpi langeziphithiphithi, lingethuki; ngoba lezizinto zimele ukuthi zenzeke kuqala, kodwa ukuphela kakuhle ku fik e.

¹⁰Wasesithi kubo: Isizwe sizavukela isizwe, lombuso u vuk ele umbuso;

¹¹njalo kuzakuba khona ukuzamazama komhlaba okukhulu indawo ngendawo lezindlala labomatshayabhuqe bezifo; kube khona lezinto ezesabekayo lezibonakaliso ezinkulu ezivela ezulwini.

¹²Kodwa ngaphambi kwakho konke lokhu bazalibamba ngezandla zabo, ba li zingele, ba li nikele emasinagogeni lezintolongweni, ba li se phambi kwamakhosi lababusi, ngenxa yebizo lami.

¹³Njalo lokhu kuzaphenduka kini kube yibufakazi.

¹⁴Ngakho kubekeni enhliziyweni zenu ukuthi linganakani ngaphambili nge lizakuphendula;

¹⁵ngoba mina ngizalinika umlomo lenhlakanipho, abangekuphike, bamelane lakho, bonke abayizitha zenu.

¹⁶Njalo lizanikelwa langabazali labafowenu lezihlobo labangane, njalo bazabulala abanye benu.

¹⁷Njalo lizazondwa yibo bonke ngenxa yebizo lami.

¹⁸Kodwa kakuyikulahleka ngitsho unwele lwekhanda lenu.

¹⁹Ekubekezeleni kwenu zuzani imiphefumulo yenu.

²⁰Kodwa nxa libona iJerusalema ihanqwe ngamabutho, yazini-ke ukuthi sekusondele ukuchitheka kwayo.

²¹Ngalesosikhathi abaseJudiya kababalekele ezintabeni; labaphakathi kwayo baphume; labasemaphandleni bangangeni kuyo.

²²Ngoba lezi zinsuku zempindiselo, ukuze kugcwaliseke zonke izinto ezilotshiweyo.

²³Kodwa maye kwabakhulelweyo labamunyisayo ngalezonsuku! Ngoba kuzakuba khona ukuhlupheka okukhulu emhlabeni, lolaka kulesisizwe.

²⁴Njalo bazakuwa ngobukhali benkemba, bathunjelwe ezizweni zonke; leJerusalema inyathelelwe phansi ngabezizwe, kuze kugcwaliseke izikhathi zabezizwe.

²⁵Kuzakuba khona izibonakaliso elangeni lenyangeni lezinkanyezini; lemhlabeni usizi lwezizwe ngokudideka; kudume ulwandle lamagagasi,

²⁶abantu baphele amandla ngenxa yokwesaba langokubona lokho okuzayo emhlabeni; ngoba amandla amazulu azazanyazanyiswa.

²⁷Khona-ke bezayibona iNdodana yomuntu isiza eyezini ilamandla lenkazimulo enkulu.

²⁸Njalo nxa kuqala ukwenzeka lezizinto, manini liqonde njalo liphakamise amakhanda enu; ngoba kusondele ukukhululwa kwenu.

²⁹Wasebatshela umfanekiso: Khangelani umkhiwa lazo zonke izihlahla;

³⁰nxa sezihluma, liyazibonela lani likwazi ukuthi ihlobo selisondele.

³¹Ngokunjalo lani, nxa libona lezizinto zisenzeka, yazini ukuthi umbuso kaNkulunkulu useduze.

³²Ngiqinisile ngithi kini: Lesisizukulwana asisoze sidlule, kuze kwenzeke zonke izinto.

³³Kuzadlula izulu lomhlaba, kodwa amazwi ami kawasoze adlule.

³⁴Njalo ziqapheleni, ukuthi inhliziyo zenu zingasindwa ngenxa yokuminza lokudakwa lokuphisekela izinto zalokhukusila, lalolosuku lulifikele lingananzelele;

³⁵ngoba luzafika njengomjibila phezu kwabo bonke abahlezi ebusweni bomhlaba wonke.

³⁶Ngakho lindani ngezikhathi zonke likhulekele ukuthi lifanele ukuphepha zonke lezizinto ezizakwenzeka, lokuma phambi kweNdodana yomuntu.

³⁷Njalo wayefundisa ethempelini emini; kodwa ebusuku wayephuma ayehlala entabeni ethiwa ngeyeMihlwathi.

³⁸Lekuseni kakhulu abantu bonke babesiza kuye ethempelini ukumuzwa.