Read Ndebele-IBhayibhili Elingcwele 2006 Ulukasi 22 Bible Online

Ulukasi 22 - Ndebele-IBhayibhili Elingcwele 2006 bible

Ulukasi 22

¹Kwasekusondela umkhosi we sinkwa esingelamvubelo, othiwa liphasika.

²Abapristi abakhulu lababhali basebedinga ukuthi bangambulala njani; ngoba babesesaba abantu.

³USathane wasengena kuJudasi othiwa nguIskariyothi, owayengowenani labalitshumi lambili.

⁴Wasesuka wayakhuluma labapristi abakhulu lezinduna ngokuthi angamnikela njani kubo.

⁵Basebethokoza, basebevumelana ukumnika imali.

⁶Yena wasevuma, njalo wadinga ithuba elihle lokumnikela kubo lingekho ixuku.

⁷Lwaselufika usuku lwe sinkwa esingelamvubelo, okwakumele kuhlatshwe ngalo iphasika.

⁸Wasethuma uPetro loJohane, esithi: Hambani li ye silungisela iphasika, ukuze sidle.

⁹Basebesithi kuye: Uthanda ukuthi silungise ngaphi?

¹⁰Wasesithi kubo: Khangelani, kuzakuthi selingenile emzini, umuntu uzahlangana lani ethwele imbiza yamanzi; limlandele endlini azangena kuyo.

¹¹Beselisithi kumninindlu: Uthi uMfundisi kuwe: Ingaphi indlu yezihambi, lapho engingadlela khona iphasika labafundi bami?

¹²Yena-ke uzalitshengisa indlu enkulu ephezulu eyendlelweyo; lilungise khona.

¹³Bahamba-ke bafica njengokutsho kwakhe kubo; basebelungisa iphasika.

¹⁴Kwathi selifikile ihola, wahlala phansi, labaphostoli abalitshumi lambili belaye.

¹⁵Wasesithi kubo: Ngokunxwanela nginxwanele ukudla lani leliphasika ngingakahlupheki;

¹⁶ngoba ngithi kini: Kangisoze ngidle futhi kulo, lize ligcwaliseke embusweni kaNkulunkulu.

¹⁷Wasethatha inkezo, esebongile wathi: Thathani lokhu, beselisabelana;

¹⁸ngoba ngithi kini: Kangisoze nginathe okwesithelo sevini, kuze kufike umbuso kaNkulunkulu.

¹⁹Wasethatha isinkwa, esebongile wa si hlephuna, wabanika, esithi: Lokhu kungumzimba wami, owanikelelwa lina; lokhu kwenzeni ukungikhumbula.

²⁰Ngokunjalo lenkezo emva kokudla, esithi: Inkezo le iyisivumelwano esitsha egazini lami, elichithelwa lina.

²¹Kodwa khangelani, isandla songinikelayo silami etafuleni.

²²Ngoba isibili iNdodana yomuntu ihamba njengokumisiweyo; kodwa maye kulowomuntu enikelwa nguye!

²³Bona basebeqala ukubuzana ukuthi kambe ngubani kubo ozakwenza lokho.

²⁴Kwavela lokuphikisana phakathi kwabo okokuthi nguwuphi kubo ongathiwa ngomkhulu.

²⁵Wasesithi kubo: Amakhosi abezizwe azibusa ngobulukhuni, leziphathamandla zazo zithiwa ngabasizi.

²⁶Kodwa lina kakungabi njalo; kodwa omkhulu phakathi kwenu kabe njengomncinyane, longumkhokheli njengosebenzayo.

²⁷Ngoba nguwuphi omkhulu, lowo ohleziyo ekudleni kumbe lowo osebenzayo? Kayisilowo yini ohlezi ekudleni? Kodwa mina ngiphakathi kwenu njengaye osebenzayo.

²⁸Lina-ke liyibo ababehlezi lami ezilingweni zami;

²⁹njalo mina ngilimisele umbuso, njengoba uBaba engimisele,

³⁰ukuthi lidle linathe etafuleni lami embusweni wami, lihlale ezihlalweni zobukhosi, lisehlulela izizwe ezilitshumi lambili zakoIsrayeli.

³¹INkosi yasisithi: Simoni, Simoni, khangela, uSathane ulifunisisile, ukuze a li hlungule njengamabele;

³²kodwa mina ngikukhulekele, ukuze ukholo lwakho lungapheli; wena-ke nxa usuphendukile uqinise abazalwane bakho.

³³Kodwa wathi kuye: Nkosi, lentolongweni lekufeni ngilungele ukuya khona lawe.

³⁴Kodwa yena wathi: Ngiyakutshela, Petro, iqhude kaliyikukhala lamuhla, ungakaphiki kathathu ukuthi uyangazi.

³⁵Wasesithi kubo: Mhla ngilithuma lingelamxhaka lesikhwama lamanyathela, laswela yini ulutho? Basebesithi: Lutho.

³⁶Wasesithi kubo: Kodwa khathesi lowo olomxhaka ka wu thathe, ngokunjalo lesikhwama; lalowo ongelakho, athengise isembatho sakhe, athenge inkemba.

³⁷Ngoba ngithi kini, kusamele kugcwaliseke kimi lokhu okulotshiweyo, ukuthi: Wabalwa kanye lezoni; ngoba lalezizinto eziqondane lami zilesiphetho.

³⁸Basebesithi: Nkosi, khangela, nanzi inkemba ezimbili. Wasesithi kubo: Kwanele.

³⁹Wasephuma waya entabeni yeMihlwathi njengokwejwayela; labafundi bakhe bamlandela.

⁴⁰Esefikile kuleyondawo, wathi kubo: Khulekani ukuthi lingangeni ekulingweni.

⁴¹Yena wasemonyuka kubo okungaba libanga lokuphosa ilitshe, waguqa phansi ngamadolo wakhuleka,

⁴²esithi: Baba, uba uthanda, susa linkezo kimi; kodwa-ke kungenziwa intando yami, kodwa eyakho.

⁴³Kwabonakala kuye ingilosi evela ezulwini imqinisa.

⁴⁴Esesesizini olunzima, wakhuleka kakhulu. Njalo izithukuthuku zakhe zaba njengamathonsi egazi zawela emhlabathini.

⁴⁵Esesukumile emkhulekweni, weza kubafundi bakhe, wabafica belele ngenxa yokudabuka,

⁴⁶wasesithi kubo: Lilaleleni? Vukani likhuleke, ukuze lingangeni ekulingweni.

⁴⁷Kwathi esakhuluma, khangela, ixuku, lalowo okuthiwa nguJudasi, omunye wabalitshumi lambili, ehamba phambi kwabo, wasesondela kuJesu ukumanga.

⁴⁸Kodwa uJesu wathi kuye: Judasi, uyayinikela yini iNdodana yomuntu ngokuyanga?

⁴⁹Kwathi labo ababengakuye sebebona okuzakwenzeka bathi kuye: Nkosi, sigadle yini ngenkemba?

⁵⁰Omunye wabo wasegadla inceku yompristi omkhulu, waquma indlebe yayo yokunene.

⁵¹Kodwa uJesu waphendula wathi: Yekelani kuze kube yilokhu. Wasethinta indlebe yayo, wayisilisa.

⁵²UJesu wasesithi kubapristi abakhulu lezinduna zethempeli labadala ababeze kuye: Liphume njengokuyamelana lomphangi yini lilezinkemba lezinduku?

⁵³Nxa bengilani insuku ngensuku ethempelini, kalelulanga izandla ukumelana lami; kodwa leli lihola lenu, lamandla obumnyama.

⁵⁴Sebembambile ba m qhuba, bamusa endlini yompristi omkhulu. UPetro waselandela ekhatshana.

⁵⁵Sebebasile umlilo phakathi kweguma, sebehlezi phansi ndawonye, uPetro wahlala phakathi kwabo.

⁵⁶Kodwa incekukazi ethile imbona ehlezi emlilweni, yamjolozela, yathi: Lumuntu laye ube laye.

⁵⁷Kodwa wamphika, wathi: Mama, kangimazi.

⁵⁸Emva kwesikhatshana omunye wasembona wathi: Lawe ungomunye wabo. Kodwa uPetro wathi: Ndoda, kangisu ye.

⁵⁹Sekungaba kwedlule ihola elilodwa, omunye waqinisa, esithi: Isibili laye ube laye; ngoba futhi ungumGalili.

⁶⁰Kodwa uPetro wathi: Ndoda, kangazi ukuthi uthini. Njalo khonokho esakhuluma lakhala iqhude.

⁶¹INkosi yasiphenduka yamkhangela uPetro. UPetro waselikhumbula ilizwi leNkosi, ukuthi yakhuluma njani kuye isithi: Iqhude lingakakhali, uzangiphika kathathu.

⁶²UPetro wasephuma phandle wakhala ngokubabayo.

⁶³Lamadoda ayembambile uJesu amklolodela, a m tshaya.

⁶⁴Amembesa, amtshaya ubuso, asembuza, esithi: Profetha! Ngubani okutshayileyo?

⁶⁵Akhuluma lezinye izinto ezinengi kuye ehlambaza.

⁶⁶Kwathi sekusile, abadala babantu babuthana, labapristi abakhulu lababhali, basebemusa emphakathini wabo, bathi:

⁶⁷Uba unguKristu, sitshele. Wasesithi kubo: Uba ngilitshela, kalisoze likholwe;

⁶⁸njalo uba lami ngilibuza, kalisoze lingiphendule, loba li ngi khulule.

⁶⁹Kusukela khathesi iNdodana yomuntu izahlala ngakwesokunene samandla kaNkulunkulu.

⁷⁰Basebesithi bonke: Kanti uyiNdodana kaNkulunkulu? Wasesithi kubo: Kutsho lina ukuthi ngiyiyo.

⁷¹Basebesithi: Pho sisafunelani ubufakazi? Ngoba sesizizwele uqobo lwethu emlonyeni wakhe.