Read Ndebele-IBhayibhili Elingcwele 2006 Ulukasi 24 Bible Online

Ulukasi 24 - Ndebele-IBhayibhili Elingcwele 2006 bible

Ulukasi 24

¹Kodwa ngo suku lokuqala lweviki, emadabukakusa, baya engcwabeni, bephethe amakha ababewalungisile, labanye ababelabo.

²Bafica ilitshe ligiqiwe lasuswa engcwabeni.

³Kuthe bengena kabasitholanga isidumbu seNkosi uJesu.

⁴Kwasekusithi bedidekile kakhulu ngalokhu, futhi khangela, amadoda amabili ema labo embethe izembatho ezicwazimulayo;

⁵njalo besesaba, bakhothamisa ubuso emhlabathini, athi kubo: Lidingelani ophilayo kwabafileyo?

⁶Kakho lapha, kodwa uvukile; khumbulani ukuthi wakhuluma njani kini, eseseGalili,

⁷esithi: INdodana yomuntu imele ukunikelwa ezandleni zabantu abayizoni, ibethelwe, ibuye ivuke ngosuku lwesithathu.

⁸Basebewakhumbula amazwi akhe.

⁹Sebebuyile bevela engcwabeni, babika konke lokhu kwabalitshumi lanye lakubo bonke abanye.

¹⁰KwakunguMariya Magadalena loJowana loMariya unina kaJakobe, labanye ababekanye labo, abatshela abaphostoli lezizinto.

¹¹Kodwa amazwi abo akhanya kibo njengokukhuluma okuyize, futhi kabaze bawakholwa.

¹²Kodwa uPetro wasukuma wagijimela engcwabeni, wakhothama walunguza wabona amalembu acolekileyo ebekiwe ewodwa; wasuka, emangele ngaphakathi kwakhe ngokwenzekileyo.

¹³Futhi khangela, ngalona lolosuku ababili babo babehamba besiya emzaneni, obizo lawo yiEmawusi, ongamastadiyu* angamatshumi ayisithupha kusukela eJerusalema.

¹⁴Njalo bona babekhulumisana ngazo zonke lezizinto ezenzekileyo.

¹⁵Kwasekusithi bekhulumisana bebuzana, uJesu uqobo wasondela wahamba kanye labo,

¹⁶kodwa amehlo abo ayebanjiwe ukuze bangamazi.

¹⁷Wasesithi kubo: Ngamazwi bani la elikhulumisana ngawo lihamba, lidanile?

¹⁸Omunye, obizo lakhe linguKleyopha, wasephendula wathi kuye: Wena nguwe wedwa isihambi eJerusalema, njalo esingaziyo yini izinto ezenzekileyo phakathi kwayo kulezinsuku?

¹⁹Wasesithi kubo: Yizinto bani? Basebesithi kuye: Ezimayelana loJesu weNazaretha, obeyindoda umprofethi olamandla ngesenzo langelizwi phambi kukaNkulunkulu labantu bonke;

²⁰lokuthi abapristi abakhulu lababusi bethu bamnikela njani ekulahlweni kokufa, bambethela.

²¹Kodwa thina besithemba ukuthi nguye obezakhulula uIsrayeli. Kodwa-ke phezu kwakho konke lokhu lamuhla lusuku lwesithathu selokhu lezizinto zenzakele.

²²Kodwa njalo abesifazana abathile abangakithi basimangalisile, ababesengcwabeni ekuseni kakhulu;

²³kuthe bengasitholi isidumbu sakhe, babuya besithi babone lombono wezingilosi, ezithe uyaphila.

²⁴Labathile abebelathi baya engcwabeni, bafica kunjalo njengokutsho kwabesifazana labo; kodwa yena kabambonanga.

²⁵Yena wasesithi kubo: O lina elingelakuqedisisa elilenhliziyo ezivilaphela ukukholwa konke lokho abaprofethi abalitshela khona!

²⁶UKristu ubengamele yini ukuthi ahlupheke ngalezizinto, abesengena ebukhosini bakhe?

²⁷Esesusela kuMozisi lakubo bonke abaprofethi, wabachasisela emibhalweni yonke izinto eziqondene laye.

²⁸Basebesondela emzaneni ababesiya kuwo; yena wasesenza angathi uyedlula.

²⁹Kodwa bamcindezela, besithi: Hlala lathi, ngoba sekuzakuhlwa, lelanga selitshonile. Wangena-ke ukuze ahlale labo.

³⁰Kwasekusithi ehlezi ekudleni labo, wathatha isinkwa wa si busisa, wa si hlephuna wabanika.

³¹Amehlo abo asevuleka, basebemazi; wasenyamalala esuka emehlweni abo.

³²Basebekhulumisana besithi: Kambe inhliziyo zethu bezingavuthi yini phakathi kwethu, lapho ekhuluma lathi endleleni, lalapho esivulela imibhalo?

³³Basebesukuma ngalelohola, babuyela eJerusalema, bafica abalitshumi lanye bebuthene ndawonye lalabo ababelabo,

³⁴besithi: Isibili iNkosi ivukile, ibonwe nguSimoni.

³⁵Basebelandisa okw enzekileyo endleleni, lokuthi yaziwa njani yibo ekuhlephuneni isinkwa.

³⁶Besakhuluma lezizinto, uJesu uqobo wema phakathi kwabo, wathi kubo: Ukuthula kakube kini.

³⁷Kodwa batshaywa luvalo besaba becabanga ukuthi babona umoya.

³⁸Wasesithi kubo: Likhathazekelani, njalo kuvukelani imicabango enhliziyweni zenu?

³⁹Khangelani izandla zami lenyawo zami, ukuthi yimi uqobo; ngibambani libone, ngoba umoya kawulanyama lamathambo, njengoba lingibona ngilakho.

⁴⁰Esekutshilo lokho wabatshengisa izandla lenyawo zakhe.

⁴¹Kodwa belokhu bengakholwa ngenxa yentokozo bemangala, wathi kubo: Lilalo ulutho lokudla lapha yini?

⁴²Bamnika iqatha lenhlanzi eyosiweyo, lohlanga lwenyosi.

⁴³Wase ku thatha wa ku dla phambi kwabo.

⁴⁴Wasesithi kubo: Yila amazwi, engawakhuluma kini ngiseselani okuthi, kumele ukuthi kugcwaliseke konke okwabhalwa ngami emlayweni kaMozisi labaprofethi leziHlabelelo.

⁴⁵Wasevula ingqondo yabo, ukuze baqedisise imibhalo;

⁴⁶wasesithi kubo: Kulotshiwe kanje, njalo uKristu kumele ahlupheke kanje, njalo avuke kwabafileyo ngosuku lwesithathu,

⁴⁷njalo kutshunyayelwe ebizweni lakhe ukuphenduka lothethelelo lwezono ezizweni zonke, kuqalwa eJerusalema.

⁴⁸Lina-ke lingabafakazi balezizinto.

⁴⁹Futhi khangelani, mina ngiyathumela kini isithembiso sikaBaba; kodwa lina hlalani emzini weJerusalema, lize lembathiswe amandla avela phezulu.

⁵⁰Wasebakhokhela ephuma phandle baze bafika eBethani; ephakamisa izandla zakhe wababusisa.

⁵¹Kwasekusithi esababusisa, wehlukana labo, wenyukiselwa ezulwini.

⁵²Basebemkhonza, babuyela eJerusalema belentokozo enkulu;

⁵³baqhubeka besethempelini, bebonga bedumisa uNkulunkulu. Ameni.