Read Ndebele-IBhayibhili Elingcwele 2006 Ulukasi 3 Bible Online

Ulukasi 3 - Ndebele-IBhayibhili Elingcwele 2006 bible

Ulukasi 3

¹Kwathi ngomnyaka wetshumi lanhlanu wokubusa kukaTiberiyosi uKesari, uPontiyusi Pilatu engumbusi weJudiya, loHerodi engumtetrarki* weGalili, loFiliphu umfowabo engumtetrarki weIturiya lelizweni iTrakoniti, loLisaniya engumtetrarki weAbilene,

²uAnasi loKayafasi bengabapristi abakhulu, ilizwi likaNkulunkulu lafika kuJohane indodana kaZakariya enkangala.

³Wasesiza esigabeni sonke seJordani esizingelezeleyo, etshumayela ubhabhathizo lokuphenduka kube yikuthethelelwa kwezono;

⁴njengokulotshiweyo egwalweni lwamazwi kaIsaya umprofethi, esithi: Ilizwi lomemezayo enkangala lithi: Lungisani indlela yeNkosi; qondisani indledlana zayo.

⁵Sonke isigodi sizagqitshwa, layo yonke intaba loqaqa kuzakwehliswa; njalo kuzaqondiswa amazombazombe, lamaxhakaxhaka ezindlela azalungiswa;

⁶layo yonke inyama izabona usindiso lukaNkulunkulu.

⁷Ngakho wathi emaxukwini aphumela ukubhabhathizwa nguye: Nzalo yezinyoka, ngubani olixwayise ukubalekela ulaka oluzayo?

⁸Ngakho thelani izithelo ezifanele ukuphenduka; njalo lingaqali ukuthi phakathi kwenu: SiloAbrahama ongubaba wethu; ngoba ngithi kini: UNkulunkulu ulamandla okumvusela uAbrahama abantwana kulamatshe.

⁹Lakhathesi lehloka selibekiwe empandeni zezihlahla; ngakho sonke isihlahla esingatheli isithelo esihle siyaganyulwa siphoselwe emlilweni.

¹⁰Amaxuku asembuza, athi: Pho thina sizakwenzani?

¹¹Wasephendula wathi kubo: Olezembatho ezimbili, kamuphe ongelaso; lolokudla kenze njalo.

¹²Kwasekufika labathelisi ukuze babhabhathizwe, basebesithi kuye: Mfundisi, sizakwenzani?

¹³Wasesithi kubo: Lingabizi okwedlula elikumiselweyo.

¹⁴Lamabutho lawo ambuza, athi: Thina-ke sizakwenzani? Wasesithi kuwo: Lingenzi udlakela emuntwini, njalo lingacali ngamanga; njalo yeneliswani yimivuzo yenu.

¹⁵Kwathi abantu belindile, futhi bonke bezibuza enhliziyweni zabo ngoJohane, ukuthi kambe yena angaba enguKristu,

¹⁶uJohane waphendula, esithi kubo bonke: Mina-ke ngilibhabhathiza ngamanzi; kodwa uyeza olamandla kulami, engingafanele ukuthukulula umchilo wamanyathela akhe; yena uzalibhabhathiza ngoMoya oNgcwele langomlilo;

¹⁷okhomane lwakhe lokwela lusesandleni sakhe, njalo uzahlambululisisa isibuya sakhe, abesebuthela amabele esiphaleni sakhe, kodwa amakhoba uzawatshisa ngomlilo ongacitshekiyo.

¹⁸Langokulaya ngezinye izinto ezinengi, watshumayela ivangeli ebantwini.

¹⁹Kodwa uHerodi umtetrarki, owayesolwe nguye ngoHerodiyasi umkaFiliphu umfowabo, langakho konke okubi ayekwenzile uHerodi,

²⁰wengezelela lalokhu phezu kwakho konke, ukuthi wamvalela uJohane entolongweni.

²¹Kwasekusithi sebebhabhathiziwe bonke abantu, laye uJesu esebhabhathiziwe, ekhuleka, izulu lavulwa,

²²uMoya oyiNgcwele wasesehlela phezu kwakhe elesimo somzimba onjengowejuba, lelizwi lavela ezulwini, lisithi: Wena uyiNdodana yami ethandekayo, ngithokoza ngawe.

²³Yena uJesu waseqala ukuba leminyaka engaba ngamatshumi amathathu, yena (njengokunakana kwabo) eyindodana kaJosefa, kaEli,

²⁴kaMathati, kaLevi, kaMeliki, kaJanayi, kaJosefa,

²⁵kaMatathiya, kaAmosi, kaNahume, kaEseli, kaNagayi,

²⁶kaMahati, kaMatathiya, kaSemeyini, kaJosefa, kaJuda,

²⁷kaJohanani, kaResa, kaZerubhabheli, kaSalatiyeli, kaNeri,

²⁸kaMeliki, kaAdi, kaKosamu, kaElimodamu, kaEri,

²⁹kaJose, kaEliyezeri, kaJorima, kaMathati, kaLevi,

³⁰kaSimeyoni, kaJuda, kaJosefa, kaJonanu, kaEliyakhimi,

³¹kaMeleya, kaMena, kaMathata, kaNathani, kaDavida,

³²kaJese, kaObedi, kaBowosi, kaSalimoni, kaNashoni,

³³kaAminadaba, kaAramu, kaEsiromu, kaFaresi, kaJuda,

³⁴kaJakobe, kaIsaka, kaAbrahama, kaThara, kaNahori,

³⁵kaSarugi, kaRagawu, kaFaleki, kaEberi, kaSala,

³⁶kaKayinani, kaArpakishadi, kaShemu, kaNowe, kaLameki,

³⁷kaMethusala, kaEnoki, kaJaredi, kaMaleleyeli, kaKayinani,

³⁸kaEnosi, kaSeti, kaAdamu, kaNkulunkulu.