Read Ndebele-IBhayibhili Elingcwele 2006 Ulukasi 4 Bible Online

Ulukasi 4 - Ndebele-IBhayibhili Elingcwele 2006 bible

Ulukasi 4

¹Kwathi uJesu egcwele uMoya oNgcwele wabuya evela eJordani, wakhokhelelwa nguMoya enkangala,

²walingwa nguSathane insuku ezingamatshumi amane. Njalo kadlanga lutho ngalezonsuku; kwathi seziphelile, ekucineni walamba.

³USathane wasesithi kuye: Uba uyiNdodana kaNkulunkulu, tshono kulelilitshe ukuthi libe yisinkwa.

⁴UJesu wasemphendula, wathi: Kulotshiwe ukuthi: Umuntu kayikuphila ngesinkwa sodwa, kodwa ngalo lonke ilizwi likaNkulunkulu.

⁵USathane wasemkhokhelela entabeni ende wamtshengisa yonke imibuso yomhlaba ngesikhatshana.

⁶USathane wasesithi kuye: Amandla wonke la lobukhosi bayo ngizakunika; ngoba anikwe mina, njalo ngiwanika loba ngubani engithandayo.

⁷Ngakho wena uba ukhonza phambi kwami, konke kuzakuba ngokwakho.

⁸UJesu wasemphendula wathi: Suka ngemva kwami, Sathane; ngoba kulotshiwe ukuthi: Uzakhothamela eNkosini uNkulunkulu wakho, njalo umkhonze yena yedwa.

⁹Wasemkhokhelela eJerusalema, wammisa engqongeni yethempeli, wasesithi kuye: Uba uyiNdodana kaNkulunkulu, ziwisele phansi usuka lapha;

¹⁰ngoba kulotshiwe ukuthi: Uzalaya ingilosi zakhe ngawe, ukukulondoloza;

¹¹lokuthi: Zizakuphatha ngezandla, hlezi loba nini ukhube unyawo lwakho elitsheni.

¹²UJesu wasephendula wathi kuye: Kuthiwa: Ungayilingi iNkosi uNkulunkulu wakho.

¹³USathane eseqedile ukulinga konke, wasuka kuye kwaze kwaba ngesinye isikhathi.

¹⁴UJesu wasebuyela eGalili ngamandla kaMoya; lendumela yakhe yaphuma kuso sonke isigaba esizingelezeleyo.

¹⁵Yena wasefundisa emasinagogeni abo, edunyiswa yibo bonke.

¹⁶Wasefika eNazaretha, lapho ayondliwe khona; njengokwejwayela kwakhe wasengena esinagogeni ngosuku lwesabatha, wasukuma ukuze afunde.

¹⁷Wasenikwa ugwalo lomprofethi uIsaya. Waseluvula ugwalo, wayithola indawo okubhalwe kuyo ukuthi:

¹⁸UMoya weNkosi uphezu kwami, ngakho ingigcobile ukuthi ngitshumayele ivangeli kubayanga; ingithumile ukusilisa abadabukileyo enhliziyweni; ukumemezela ukukhululwa kwabathunjiweyo, lokubona kwabayiziphofu, ukukhulula ababandezelweyo,

¹⁹ukumemezela umnyaka womusa weNkosi.

²⁰Waselugoqa ugwalo, wa lu buyisela encekwini, wahlala phansi; lamehlo abo bonke ababesesinagogeni amjolozela.

²¹Waseqala ukuthi kubo: Lamuhla lumbhalo ugcwalisekile endlebeni zenu.

²²Labo bonke bafakaza ngaye, bamangala ngamazwi omusa aphuma emlonyeni wakhe, basebesithi: Lo kayisiyo indodana kaJosefa yini?

²³Wasesithi kubo: Isibili lizakutsho kimi lesisaga: Melaphi, zelaphe wena; konke lokho esikuzwileyo okwenzeke eKapenawume, kwenze lalapha emzini wakini.

²⁴Wathi-ke: Ngiqinisile ngithi kini: Kakho umprofethi owemukelekayo elizweni lakibo.

²⁵Kodwa ngeqiniso ngithi kini: Abafelokazi abanengi babekhona koIsrayeli ensukwini zikaElija, lapho izulu lalivalekile iminyaka emithathu lenyanga eziyisithupha, kwaze kwaba khona indlala enkulu emhlabeni wonke;

²⁶kodwa uElija kathunyelwanga lakomunye wabo, ngaphandle kweSarepita yeSidoni kowesifazana ong umfelokazi.

²⁷Futhi amalephero amanengi ayekhona koIsrayeli ngesikhathi sikaElisha umprofethi; kodwa kakuhlanjululwanga lamunye wawo, ngaphandle kukaNamani umSiriya.

²⁸Kwathi bonke ababesesinagogeni bagcwala ulaka, bezizwa lezizinto,

²⁹basebesukuma, bamkhuphela ngaphandle komuzi, bamqhubela eliweni lentaba umuzi wabo owawakhiwe phezu kwayo, ukuze bamphosele phansi eliweni.

³⁰Kodwa yena edabula phakathi kwabo wahamba.

³¹Wasesehlela eKapenawume umuzi weGalili; njalo wayebafundisa ngamasabatha.

³²Basebebabaza ngemfundiso yakhe, ngoba ilizwi lakhe lalilamandla.

³³Futhi kwakukhona esinagogeni umuntu owayelomoya wedimoni ongcolileyo, wasememeza ngelizwi elikhulu

³⁴wathi: Yekela! Silani lawe, Jesu weNazaretha? Uze ukusibhubhisa yini? Ngiyakwazi wena ukuthi ungubani: ONgcwele kaNkulunkulu.

³⁵UJesu wasemkhuza, esithi: Thula, uphume kuye ! Ledimoni selimwisele phakathi laphuma kuye, lingamlimazanga.

³⁶Kwasekubafikela bonke ukumangala, bakhulumisana, besithi: Yilizwi bani leli, ukuthi ngegunya langamandla uyalaya omoya abangcolileyo, baphume?

³⁷Yasiphuma indumela yakhe kuyo yonke indawo yesigaba esizingelezeleyo.

³⁸Wasesukuma waphuma esinagogeni, wayangena endlini kaSimoni; njalo uninazala kaSimoni wayebanjwe luqhuqho olukhulu; basebemcelela kuye.

³⁹Wasemengama, wakhuza uqhuqho, khona lwamyekela; njalo wahle wasukuma wabasebenzela.

⁴⁰Kwathi ekutshoneni kwelanga, bonke ababelababegula izifo ezitshiyeneyo babaletha kuye; wasebeka izandla kulowo lalowo wabo wabasilisa.

⁴¹Kwasekuphuma lamadimoni kwabanengi, ememeza esithi: Wena unguKristu iNdodana kaNkulunkulu. Wase wa khuza engawavumeli ukuthi akhulume, ngoba ayemazi ukuthi unguKristu.

⁴²Kwathi sekusile, waphuma waya endaweni eyinkangala, lamaxuku amdinga, eza kuye, amvimbela ukuthi angasuki kiwo.

⁴³Kodwa wathi kuwo: Ngimele ukutshumayela ivangeli lombuso kaNkulunkulu lakweminye imizi; ngoba ngithunyelwe lokho.

⁴⁴Wayesetshumayela emasinagogeni eGalili.