Read Ndebele-IBhayibhili Elingcwele 2006 Ulukasi 7 Bible Online

Ulukasi 7 - Ndebele-IBhayibhili Elingcwele 2006 bible

Ulukasi 7

¹Kwathi eseqedile amazwi akhe wonke endlebeni zabantu, wangena eKapenawume.

²Njalo inceku yenduna yekhulu ethile, eyayiligugu kuyo, yayigula isizakufa.

³Kwathi isizwile ngoJesu, yathuma kuye abadala bamaJuda, imcela, ukuze eze asilise inceku yayo.

⁴Kwathi bona, sebefikile kuJesu, bamncenga kakhulu, besithi: Yona kufanele ukuthi uyenzele lokhu;

⁵ngoba iyasithanda isizwe sakithi, njalo yiyo eyasakhela isinagoge.

⁶UJesu wasehamba labo. Kwathi engasekhatshana lendlu, induna yekhulu yathuma abangane, isithi kuye: Nkosi, ungazikhathazi; ngoba kangifanele ukuthi ungene ngaphansi kophahla lwami;

⁷yikho kangizibonanga ngifanele ukuza kuwe; kodwa khuluma ilizwi, njalo inceku yami izasiliswa.

⁸Ngoba lami ngingumuntu obekwe ngaphansi kwamandla, ngilamabutho ngaphansi kwami, njalo ngithi kuleli: Hamba, njalo lihambe; lakwelinye: Woza, njalo lize; lencekwini yami: Yenza lokhu, njalo ikwenze.

⁹Kwathi uJesu ezizwa lezizinto wamangala ngayo, watshibilika, wathi exukwini elimlandelayo: Ngithi kini, angitholanga ukholo olungaka ngitsho lakoIsrayeli.

¹⁰Kwathi ababethunyiwe sebebuyele endlini bafica inceku eyayigula isisilile.

¹¹Kwasekusithi nge langa elilandelayo, waya emzini othiwa yiNayini; abafundi bakhe abanengi basebehamba laye, lexuku elikhulu.

¹²Kwathi esesondela esangweni lomuzi, njalo khangela, wabona ofileyo ethwelwe kuphunywa, indodana engeyodwa kanina, futhi yena engumfelokazi; lexuku elikhulu lomuzi lalilaye.

¹³INkosi imbona, yasisiba lesihelo ngaye, yathi kuye: Ungakhali.

¹⁴Yasondela yathinta ithala; aba li thweleyo basebesima; yasisithi: Jaha, ngithi kuwe: Vuka !

¹⁵Ofileyo wasevuka wahlala waqala ukukhuluma. Yasimnika unina.

¹⁶Ukwesaba kwasekubabamba bonke, basebemdumisa uNkulunkulu, besithi: Umprofethi omkhulu usevukile phakathi kwethu; lokuthi: UNkulunkulu uhambele abantu bakhe.

¹⁷Le indumela ngaye yasiphumela kuyo yonke iJudiya, lakuso sonke isigaba esizingelezeleyo.

¹⁸Abafundi bakaJohane basebembikela ngazo zonke lezizinto.

¹⁹UJohane wasebizela kuye ababili abathile kubafundi bakhe wa ba thuma kuJesu, esithi: Wena unguye ozayo yini, kumbe silindele omunye?

²⁰Lamadoda esefikile kuye athi: UJohane uMbhabhathizi usithumile kuwe, esithi: Wena unguye ozayo yini, kumbe silindele omunye?

²¹Langalelohola wasilisa abanengi ezifweni lemikhuhlaneni lakubomoya ababi, labayiziphofu abanengi wabapha ukubona.

²²UJesu wasephendula wathi kubo: Hambani limtshele uJohane izinto elizibonileyo lelizizwileyo: Ukuthi iziphofu ziyabona, iziqhuli ziyahamba, amalephero ayahlanjululwa, izacuthe ziyezwa, abafileyo bayavuswa, abayanga bayatshunyayezwa ivangeli;

²³njalo ubusisiwe loba ngubani ongakhubekiyo ngami.

²⁴Kwathi sezihambile izithunywa zikaJohane, waqala ukukhuluma lamaxuku ngoJohane esithi: Laphuma laya enkangala ukuyabonani? Umhlanga onyikinywa ngumoya yini?

²⁵Kanti laphumela ukuyabonani? Umuntu owembethe izembatho ezicolekileyo yini? Khangelani, abe mbethe ezikhazimulayo baphila mnandi basezindlini zamakhosi.

²⁶Pho laphumela ukuyabonani? Umprofethi yini? Yebo, ngithi kini: Loba odlula kakhulu umprofethi.

²⁷Lo nguye okubhalwe ngaye ukuthi: Khangela, mina ngiyathuma isithunywa sami phambi kobuso bakho, esizalungisa indlela yakho phambi kwakho.

²⁸Ngoba ngithi kini: Phakathi kwabazelwe ngabesifazana kakho umprofethi omkhulu kuloJohane uMbhabhathizi; kodwa omncinyane embusweni kaNkulunkulu mkhulu kulaye.

²⁹Labantu bonke bekuzwa, labathelisi, bathi ulungile uNkulunkulu, sebebhabhathiziwe ngobhabhathizo lukaJohane;

³⁰kodwa abaFarisi lezazumthetho balala icebo likaNkulunkulu bemelene labo, ngoba bengabhabhathizwanga nguye.

³¹Yasisithi iNkosi: Pho-ke abantu balesisizukulwana ngizabafananisa lani? Kanti bafanana lani?

³²Banjengabantwana abancane abahlezi emakethe bememezana besithi: Silitshayele umhlanga, kodwa kalisinanga; silililele, kodwa kalikhalanga.

³³Ngoba uJohane uMbhabhathizi wafika engadli isinkwa njalo enganathi iwayini, laselisithi: Uledimoni;

³⁴iNdodana yomuntu ifikile isidla, inatha, laselisithi: Khangelani, umuntu oligovu lesinathi sewayini, umngane wabathelisi lezoni.

³⁵Kodwa inhlakanipho ithiwa ilungile ngabantwana bayo bonke.

³⁶Omunye wabaFarisi wasemcela ukuthi adle laye; esengenile endlini yomFarisi wahlala ekudleni.

³⁷Njalo khangela, owesifazana kulowomuzi, owayeyisoni, esekwazi ukuthi uJesu uhlezi ekudleni endlini yomFarisi, waletha umfuma we-alibasta* owamagcobo,

³⁸wasesima eceleni kwenyawo zakhe ngemva kwakhe ekhala, waqala ukuthambisa inyawo zakhe ngenyembezi, wa ze sula ngenwele zekhanda lakhe, wanga inyawo zakhe, wa zi gcoba ngamagcobo.

³⁹Kuthe umFarisi obemnxusile e ku bona wakhulumela ngaphakathi kwakhe wathi: Lo, uba ebengumprofethi, ngabe uyamazi ukuthi ungubani lokuthi unjani lo owesifazana omthintayo, ngoba uyisoni.

⁴⁰UJesu wasephendula wathi kuye: Simoni, ngilolutho olokulukhuluma lawe. Yena wasesithi: Khuluma, Mfundisi.

⁴¹Kwakukhona ababili ababelezikwelede kumkweledisi othile; omunye wayelomlandu wabodenariyo* abangamakhulu amahlanu, lomunye abangamatshumi amahlanu.

⁴²Kwathi bengelakho okokuhlawula ngakho, wabaxolela bobabili. Kambe nguwuphi kubo, tshono, ozamthanda okwedlulisileyo?

⁴³USimoni wasephendula wathi: Ngicabanga ngulowo amxolela okwedlulisileyo. Wathi kuye: Wahlulele ngokuqonda.

⁴⁴Wasetshibilikela kowesifazana, wathi kuSimoni: Uyambona lo owesifazana yini? Ngingene endlini yakho, amanzi enyaweni zami kawu ngi nikanga; kodwa yena uzithambisile inyawo zami ngenyembezi zakhe, wa ze sula ngenwele zekhanda lakhe.

⁴⁵Kawunganganga; kodwa yena, lokhu ngingenile, kayekelanga ukwanga inyawo zami.

⁴⁶Ngamagcobo ikhanda lami kawuligcobanga; kodwa yena ugcobile inyawo zami ngamakha.

⁴⁷Ngenxa yalokhu, ngithi kuwe: Izono zakhe ezinengi zithethelelwe, ngoba uthandile kakhulu; kodwa lowo othethelelwa kancinyane, uthanda kancinyane.

⁴⁸Wasesithi kuye: Zithethelelwe izono zakho.

⁴⁹Ababehlezi laye ekudleni basebeqala ukukhulumisana bodwa besithi: Ngubani lo othethelela lezono?

⁵⁰Wasesithi kowesifazana: Ukholo lwakho lukusindisile; hamba ngokuthula.