Read Ndebele-IBhayibhili Elingcwele 2006 Uduteronomi 1 Bible Online

Uduteronomi 1 - Ndebele-IBhayibhili Elingcwele 2006 bible

Uduteronomi 1

¹La ngamazwi uMozisi awakhuluma kuIsrayeli wonke nganeno kweJordani enkangala, egcekeni eliqondene leSufi, phakathi kweParani leTofeli leLabani leHazerothi leDizahabi.

²Kulensuku ezilitshumi lanye kusukela eHorebe ngendlela yentaba yeSeyiri kusiya eKadeshi-Bhaneya.

³Kwasekusithi ngomnyaka wamatshumi amane, ngenyanga yetshumi lanye, ngolokuqala lwenyanga, uMozisi wakhuluma kubantwana bakoIsrayeli njengakho konke i Nkosi eyamlaya ngakho kubo,

⁴esemtshayile uSihoni inkosi yamaAmori owayehlala eHeshiboni, loOgi inkosi yeBashani owayehlala eAshitarothi eEdreyi.

⁵Nganeno kweJordani, elizweni lakoMowabi, uMozisi waqala ukuchasisa lumlayo esithi:

⁶I Nkosi uNkulunkulu wethu yakhuluma kithi eHorebe isithi: Selihlale isikhathi eseneleyo kulintaba.

⁷Phendukani lisuke, liye entabeni yamaAmori, lakubomakhelwane bawo, egcekeni, entabeni, lesihotsheni, leningizimu, lekhunjini lolwandle, ilizwe lamaKhanani, leLebhanoni, kuze kube semfuleni omkhulu, umfula iYufrathi.

⁸Bonani, ngibeke ilizwe phambi kwenu. Ngenani, lidle ilifa lelizwe i Nkosi eyalifungela oyihlo, oAbrahama, uIsaka, loJakobe, ukubanika lona lenzalo yabo emva kwabo.

⁹Njalo ngakhuluma kini ngalesosikhathi ngisithi: Kangilakulithwala ngingedwa.

¹⁰I Nkosi uNkulunkulu wenu ilandisile, khangelani-ke, lamuhla linjengenkanyezi zamazulu ngobunengi.

¹¹I Nkosi, uNkulunkulu waboyihlo, kayandise kini, njengoba linjalo, ngokuphindwe kankulungwane, ilibusise, njengokukhuluma kwayo kini.

¹²Ngingedwa ngingathwala njani ubunzima benu lomthwalo wenu lenkani yenu?

¹³Zithatheleni amadoda ahlakaniphileyo, azwisisayo, laziwayo ezizweni zenu, ngiwabeke-ke abe zinhloko zenu.

¹⁴Laselingiphendula lisithi: Ilizwi olikhulumileyo lilungile ukulenza.

¹⁵Ngasengithatha inhloko zezizwe zenu, amadoda ahlakaniphileyo, aziwayo, ngawabeka aba zinhloko phezu kwenu, induna zezinkulungwane, lenduna zamakhulu, lenduna zamatshumi amahlanu, lenduna zamatshumi, leziphathamandla zezizwe zenu.

¹⁶Ngasengilaya abahluleli benu ngalesosikhathi ngisithi: Zwanini oku phakathi kwabafowenu, lahlulele ngokulunga phakathi komuntu lomfowabo lowezizweni oku ye.

¹⁷Lingakhangeli ubuso ekwahluleleni, zwanini omncinyane njengomkhulu; lingesabi ubuso bomuntu, ngoba ukwahlulela kungokukaNkulunkulu. Lendaba elukhuni kini lizayiletha kimi, besengiyizwa.

¹⁸Langalesosikhathi ngalilaya zonke izinto elifanele ukuzenza.

¹⁹Sasesisuka eHorebe, sahamba kuyo yonke leyonkangala enkulu leyesabekayo elayibonayo ngendlela yentaba yamaAmori, njengokusilaya kwe Nkosi uNkulunkulu wethu, saze safika eKadeshi-Bhaneya.

²⁰Ngasengisithi kini: Selifikile entabeni yamaAmori i Nkosi uNkulunkulu wethu ezasinika yona.

²¹Bona, i Nkosi uNkulunkulu wakho ilinikile ilizwe phambi kwakho; yenyuka udle ilifa lalo, njengokutsho kwe Nkosi uNkulunkulu waboyihlo kuwe; ungesabi, ungadideki.

²²Laselisondela kimi lonke lathi: Asithume amadoda phambi kwethu ukuze asihlolele ilizwe, abuyise ilizwi kithi, indlela esizakwenyuka ngayo, lemizi esizangena kuyo.

²³Lendaba yayinhle emehlweni ami; ngakho ngathatha kini amadoda alitshumi lambili, indodanye ngesizwe.

²⁴Wona aphenduka, enyukela entabeni aze afika esihotsheni seEshikoli, asihlola.

²⁵Asethatha okwezithelo zelizwe esandleni sabo, azehlisela kithi; abuyisa ilizwi kithi athi: Ilizwe lihle i Nkosi uNkulunkulu wethu esinika lona.

²⁶Kanti kalifunanga ukwenyuka, kodwa lavukela umlomo we Nkosi uNkulunkulu wenu,

²⁷langunguna emathenteni enu lathi: Ngoba i Nkosi yayisizonda, yasikhupha elizweni leGibhithe ukusinikela esandleni samaAmori ukusibhubhisa.

²⁸Sizakwenyukela ngaphi? Abafowethu benze inhliziyo yethu iphele amandla besithi: Abantu bakhulu bade kulathi; imizi mikhulu, ibiyelwe ngemithangala efika emazulwini; futhi-ke sibonile khona amadodana amaAnaki.

²⁹Ngasengisithi kini: Lingatshaywa luvalo, libesabe.

³⁰I Nkosi uNkulunkulu wenu ehamba phambi kwenu, yona izalilwela njengakho konke eyalenzela khona eGibhithe phambi kwamehlo enu,

³¹lenkangala, lapho obone khona ukuthi i Nkosi uNkulunkulu wakho yakuthwala njengendoda ithwala indodana yayo, endleleni yonke elahamba ngayo laze lafika kulindawo.

³²Kodwa ngalelilizwi kalikholwanga i Nkosi uNkulunkulu wenu

³³eyahamba phambi kwenu endleleni, ukulidingela indawo ukuze limise inkamba, ngomlilo ebusuku, ukulitshengisa indlela elizahamba ngayo, langeyezi emini.

³⁴Kwathi i Nkosi isizwile ilizwi lamazwi enu, yathukuthela yafunga yathi:

³⁵Isibili kakho kulamadoda alesisizukulwana esibi ozabona ilizwe elihle engafunga ukulinika oyihlo,

³⁶ngaphandle kukaKalebi indodana kaJefune; yena uzalibona. Njalo ngizanika kuye ilizwe anyathela kulo, lakubantwana bakhe, ngoba ulandele i Nkosi ngokupheleleyo.

³⁷Lami i Nkosi yangithukuthelela ngenxa yenu, isithi: Lawe kawuyikungena khona.

³⁸UJoshuwa indodana kaNuni oma phambi kwakho, yena uzangena khona; mqinise, ngoba yena uzakwenza uIsrayeli adle ilifa lalo.

³⁹Labantwanyana benu elalisithi bazakuba yimpango, labantwana benu, abangaziyo lamuhla okuhle lokubi, bona bazangena khona; lakubo ngizalinika, bona-ke bazakudla ilifa lalo.

⁴⁰Kodwa lina ziphendukeleni, lisuke liye enkangala, indlela yoLwandle oluBomvu.

⁴¹Laseliphendula lisithi kimi: Sonile e Nkosi ni; thina sizakwenyuka siyekulwa, njengakho konke i Nkosi uNkulunkulu wethu eyasilaya khona. Selihlomile, ngulowo lalowo isikhali sakhe sempi, lacabanga ukuthi kulula ukwenyukela entabeni.

⁴²I Nkosi yasisithi kimi: Tshono kubo: Lingenyuki, lingalwi, ngoba kangikho phakathi kwenu, hlezi litshaywe phambi kwezitha zenu.

⁴³Ngasengikhuluma kini, kodwa kalilalelanga, lavukela umlomo we Nkosi, laqholoza lenyukela entabeni.

⁴⁴Kwathi amaAmori ayehlala entabeni leyo aphuma ukumelana lani, alixotsha njengokwenziwa zinyosi, alihlakaza eSeyiri, kwaze kwaba seHorma.

⁴⁵Laselibuya, lakhala inyembezi phambi kwe Nkosi, kodwa i Nkosi kayilizwanga ilizwi lenu, kayibekanga indlebe kini.

⁴⁶Laselihlala eKadeshi insuku ezinengi, njengensuku elahlala ngazo.