Read Ndebele-IBhayibhili Elingcwele 2006 Uduteronomi 10 Bible Online

Uduteronomi 10 - Ndebele-IBhayibhili Elingcwele 2006 bible

Uduteronomi 10

¹Ngalesosikhathi i Nkosi yathi kimi: Zibazele izibhebhe ezimbili zamatshe njengezakuqala, wenyukele kimi entabeni, uzenzele umtshokotsho wezigodo.

²Ngizabhala-ke phezu kwezibhebhe amazwi ayesezibhebheni zakuqala owazibulalayo, uzibeke emtshokotshweni.

³Ngasengisenza umtshokotsho ngesihlahla sesinga, ngabaza izibhebhe ezimbili zamatshe njengezakuqala, ngenyukela entabeni, lezibhebhe ezimbili zisesandleni sami.

⁴Yasibhala ezibhebheni njengokubhala kwakuqala, imilayo elitshumi i Nkosi eyayikhuluma kini entabeni iphakathi komlilo ngosuku lokuhlangana; njalo i Nkosi yanginika zona.

⁵Ngasengiphenduka ngisehla entabeni, ngazifaka izibhebhe emtshokotshweni engangiwenzile. Njalo zikhona lapho, njengokungilaya kwe Nkosi.

⁶Abantwana bakoIsrayeli basebesuka eBeyerothi-Bene-Jakani, baya eMosera; uAroni wafela lapho, wangcwatshwa khona; indodana yakhe uEleyazare wasebenza njengompristi esikhundleni sakhe.

⁷Besuka lapho, baya eGudigoda; basuka eGudigoda, baya eJotibatha, ilizwe lezifula zamanzi.

⁸Ngalesosikhathi i Nkosi yehlukanisa isizwe sakoLevi ukuthi sithwale umtshokotsho wesivumelwano se Nkosi, ukuthi sime phambi kwe Nkosi, siyikhonze, sibusise ebizweni layo, kuze kube lamuhla.

⁹Ngalokhu uLevi kalasabelo lelifa kanye labafowabo; i Nkosi iyilifa lakhe, njengokutsho kwe Nkosi uNkulunkulu wakho kuye.

¹⁰Mina ngasengihlala entabeni njengensuku zokuqala, insuku ezingamatshumi amane lobusuku obungamatshumi amane; le Nkosi yangizwa langalesosikhathi; i Nkosi kayithandanga ukukubhubhisa.

¹¹I Nkosi yasisithi kimi: Sukuma, uhambe phambi kwabantu, ukuze bangene badle ilifa lelizwe engafunga kuboyise ukubanika lona.

¹²Khathesi-ke, Israyeli, kuyini i Nkosi uNkulunkulu wakho ekufuna kuwe, ngaphandle kokuyesaba i Nkosi uNkulunkulu wakho, ukuhamba ngendlela zayo zonke, lokuyithanda, lokuyikhonza i Nkosi uNkulunkulu wakho ngenhliziyo yakho yonke langomphefumulo wakho wonke,

¹³ukugcina imilayo ye Nkosi lezimiso zayo engikulaya zona lamuhla, ukuthi kukulungele?

¹⁴Khangela, amazulu, lezulu lamazulu ngawe Nkosi uNkulunkulu wakho, umhlaba lakho konke okukuwo.

¹⁵Kuphela i Nkosi yehlisela uthando lwayo phezu kwaboyihlo, ukubathanda, yakhetha inzalo yabo emva kwabo, ngitsho lina phakathi kwazo zonke izizwe, njengalamuhla.

¹⁶Ngakho sokani ijwabu lenhliziyo yenu, lingabe lisazenza lukhuni intamo zenu.

¹⁷Ngoba i Nkosi uNkulunkulu wenu inguNkulunkulu wabonkulunkulu, leNkosi yamakhosi, uNkulunkulu omkhulu, olamandla, lowesabekayo, ongemukeli ubuso bomuntu, ongemukeli umvuzo.

¹⁸Eyenza isahlulelo sentandane lomfelokazi, njalo ethanda owezizweni ngokumnika ukudla lezembatho.

¹⁹Ngakho lizamthanda owezizweni, ngoba lalingabezizweni elizweni leGibhithe.

²⁰Uzayesaba i Nkosi uNkulunkulu wakho, uyikhonze, unamathele kuyo, ufunge ngebizo layo.

²¹Iludumo lwakho, njalo inguNkulunkulu wakho, okwenzele lezizinto ezinkulu lezesabekayo, amehlo akho azibonileyo.

²²Oyihlo behlela eGibhithe belabantu abangamatshumi ayisikhombisa; khathesi-ke i Nkosi uNkulunkulu wakho ikwenzile waba njengenkanyezi zamazulu ngobunengi.