Read Ndebele-IBhayibhili Elingcwele 2006 Uduteronomi 11 Bible Online

Uduteronomi 11 - Ndebele-IBhayibhili Elingcwele 2006 bible

Uduteronomi 11

¹Ngakho wothanda i Nkosi uNkulunkulu wakho, ugcine umlayo wayo lezimiso zayo lezahlulelo zayo lemithetho yayo insuku zonke.

²Yazini lamuhla, ngoba kangikhulumi ebantwaneni benu abangakwaziyo labangakubonanga ukulaya kwe Nkosi uNkulunkulu wenu, ubukhulu bayo, isandla sayo esilamandla, lengalo yayo eyeluliweyo,

³lezibonakaliso zayo lezenzo zayo eyazenza phakathi kweGibhithe kuFaro inkosi yeGibhithe, lelizweni lakhe lonke,

⁴lalokho eyakwenza ebuthweni leGibhithe, emabhizeni ayo lenqoleni zayo, lokuthi yenza amanzi oLwandle oluBomvu abakhukhule lapho bexotshana lani, lokuthi i Nkosi yababhubhisa, kuze kube lamuhla,

⁵lalokho eyakwenza kini enkangala laze lafika kulindawo,

⁶lalokho eyakwenza kuDathani lakuAbiramu amadodana kaEliyabi indodana kaRubeni, ukuthi umhlaba wakhamisa umlomo wawo wabaginya bona labezindlu zabo, lamathente abo, lakho konke okwakungokwabo, phakathi kukaIsrayeli wonke.

⁷Kodwa amehlo enu abonile zonke izenzo ezinkulu ze Nkosi eyazenzayo.

⁸Ngakho lizagcina yonke imithetho engikulaya yona lamuhla, ukuze libe lamandla lingene lidle ilifa lelizwe, elichaphela kulo ukuyakudla ilifa lalo,

⁹lokuthi lelule izinsuku elizweni i Nkosi eyalifungela oyihlo ukubanika lona lenzalo yabo, ilizwe eligeleza uchago loluju.

¹⁰Ngoba ilizwe ongena kilo ukudla ilifa lalo kalinjengelizwe leGibhithe eliphuma kilo, lapho owahlanyela khona inhlanyelo yakho, wakuthelela ngonyawo lwakho, njengesivande semibhida;

¹¹kodwa ilizwe elichaphela kilo ukudla ilifa lalo liyilizwe lamaqaqa lezigodi, linatha amanzi ezulwini lamazulu;

¹²ilizwe i Nkosi uNkulunkulu wakho elikhathalelayo; amehlo e Nkosi uNkulunkulu wakho aphezu kwalo njalo, kusukela ekuqaleni komnyaka kuze kube sekupheleni komnyaka.

¹³Kuzakuthi-ke, uba lilalela lokulalela imithetho yami engililaya yona lamuhla, ukuthanda i Nkosi uNkulunkulu wenu, lokuyikhonza ngenhliziyo yenu yonke langomphefumulo wenu wonke,

¹⁴ngizanika izulu lelizwe lenu ngesikhathi salo, izulu elokuqala lezulu lokucina, ukuze ubuthe amabele akho lewayini lakho elitsha lamafutha akho.

¹⁵Ngizanika izifuyo zakho utshani edlelweni lakho, njalo uzakudla, usuthe.

¹⁶Ziqapheleni, hlezi inhliziyo yenu ikhohliseke, liphambuke, likhonze abanye onkulunkulu, libakhothamele,

¹⁷ukuze ulaka lwe Nkosi lulivuthele, njalo ivale amazulu, ukuze kungabi khona izulu, lelizwe lingatheli isivuno salo, libhubhe masinyane lisuke elizweni elihle i Nkosi elinika lona.

¹⁸Ngakho lizabeka lamazwi ami enhliziyweni yenu lemphefumulweni wenu, liwabophele esandleni senu abe luphawu, ukuze abe ngamafilakteriyu* phakathi laphakathi kwamehlo enu.

¹⁹Lizawafundisa abantwana benu, ukhulume ngawo lapho uhlezi endlini yakho, lalapho uhamba endleleni, lalapho ulala, lalapho uvuka.

²⁰Liwabhale emigubazini yendlu yakho lemasangweni akho,

²¹ukuze zande insuku zenu lensuku zabantwana benu, elizweni i Nkosi eyalifungela oyihlo ukubanika lona, njengensuku zamazulu phezu komhlaba.

²²Ngoba uba ligcina lokugcina yonke imithetho le engililaya ukuthi liyenze, ukuthanda i Nkosi uNkulunkulu wenu, ukuhamba ngendlela zayo zonke, lokunamathela kuyo,

²³khona i Nkosi izaxotsha elifeni zonke lezizizwe zisuke phambi kwenu, lidle ilifa lezizwe ezinkulu lezilamandla kulani.

²⁴Yonke indawo lapho ingaphansi yonyawo lwenu ezanyathela khona izakuba ngeyenu; kusukela enkangala, leLebhanoni, kusukela emfuleni, umfula iYufrathi, kuze kufike elwandle lokucina, kuzakuba ngumngcele wenu.

²⁵Kakulamuntu ozakuma phambi kwenu; i Nkosi uNkulunkulu wenu izabeka ukwesabeka kwenu lokutshaywa luvalo ngani phezu kwalo lonke ilizwe elizanyathela kulo, njengalokhu etshilo kini.

²⁶Khangelani, lamuhla ngiyabeka phambi kwenu isibusiso lesiqalekiso;

²⁷isibusiso, uba lilalela imithetho ye Nkosi uNkulunkulu wenu engililaya yona lamuhla;

²⁸lesiqalekiso, uba lingalaleli imithetho ye Nkosi uNkulunkulu wenu, kodwa liphambuka endleleni engililaya yona lamuhla, ukulandela abanye onkulunkulu elingabazanga.

²⁹Kuzakuthi lapho i Nkosi uNkulunkulu wakho esekungenisile elizweni oya kulo ukudla ilifa lalo, uzabeka isibusiso phezu kwentaba yeGerizimi, lesiqalekiso phezu kwentaba yeEbhali.

³⁰Angithi zona ziphetsheya kweJordani emva kwendlela yekutshoneni kwelanga, elizweni lamaKhanani ahlala emagcekeni maqondana leGiligali, eduze lezihlahla zamaokhi * zeMore?

³¹Ngoba lizachapha iJordani ukuze lingene lidle ilifa lelizwe i Nkosi uNkulunkulu wenu elinika lona. Lizakudla ilifa lalo, lihlale kilo,

³²ligcine ukwenza zonke izimiso lezahlulelo engizibeka phambi kwenu lamuhla.