Read Ndebele-IBhayibhili Elingcwele 2006 Uduteronomi 14 Bible Online

Uduteronomi 14 - Ndebele-IBhayibhili Elingcwele 2006 bible

Uduteronomi 14

¹Lingabantwana be Nkosi uNkulunkulu wenu. Kaliyikuzisika, lingenzi impabanga phakathi laphakathi kwamehlo enu ngenxa yabafileyo.

²Ngoba uyisizwe esingcwele e Nkosi ni uNkulunkulu wakho; le Nkosi ikukhethile ukuthi ube yisizwe esikhethekileyo kuyo, ngaphezu kwezizwe zonke ezisebusweni bomhlaba.

³Ungadli loba yikuphi okunengekayo.

⁴Yilezi inyamazana elingazidla: Inkabi, imvu, lezinyane lembuzi,

⁵indluzele, lomziki, lomziki olempondo ezilembaxambaxa, lembuzi yeganga, lomtshwayeli, lenkabi yeganga, legogo,

⁶layo yonke inyamazana edabula isondo, edabula okudabukileyo kube zinklagu ezimbili, eyetshisayo phakathi kwezinyamazana; leyo lingayidla.

⁷Kodwa lezi kaliyikuzidla kuzo ezetshisayo, lakuzo ezidabula isondo elidabukileyo: Ikamela lomvundla lembila, ngoba ziyetshisa kodwa kazidabulanga isondo; zingcolile kini.

⁸Lengulube, ngoba idabula isondo kodwa kayetshisi; ingcolile kini. Lingadli okwenyama yazo, lingathinti izidumbu zazo.

⁹Lezi lingazidla kuzo zonke ezisemanzini: Zonke ezilempiko lamaxolo lingazidla.

¹⁰Kodwa loba yikuphi okungelampiko lamaxolo lingakudli; kungcolile kini.

¹¹Zonke inyoni ezihlambulukileyo lingazidla.

¹²Kodwa yilezi elingayikudla kuzo: Ukhozi lelinqe lengqungqulu edla inhlanzi,

¹³lomzwazwa, lohelwane, lelinqe ngohlobo lwalo,

¹⁴lalo lonke iwabayi ngohlobo lwalo,

¹⁵lesikhova, lomandukulo, lenkanku, lokhozi ngohlobo lwalo,

¹⁶isikhova esincinyane, lesikhova esikhulu, lesikhova esimhlophe,

¹⁷lewunkwe, lelinqe elikhulu, letshayamanzi,

¹⁸lengabuzane, lehemu ngohlobo lwalo, lemvenduna, lolulwane.

¹⁹Lazo zonke izibungu ezilempiko zingcolile kini; kazingadliwa.

²⁰Zonke izinyoni ezihlambulukileyo lingazidla.

²¹Lingabokudla langcuba; ungayinika owemzini ophakathi kwamasango akho ukuthi ayidle, loba uyithengise kowezizwe; ngoba uyisizwe esingcwele e Nkosi ni uNkulunkulu wakho. Ungapheki izinyane lembuzi ngochago lukanina.

²²Uzanikela ngoqotho ingxenye yetshumi yesithelo sonke senhlanyelo yakho, insimu ekuthelayo iminyaka ngeminyaka.

²³Njalo uzakudla phambi kwe Nkosi uNkulunkulu wakho, endaweni ezayikhetha ukuthi ibeke ibizo layo khona, ingxenye yetshumi yamabele akho, eyewayini lakho elitsha, leyamafutha akho, lamazibulo enkomo zakho lawezimvu zakho, ukuze ufunde ukuyesaba i Nkosi uNkulunkulu wakho insuku zonke.

²⁴Uba-ke indlela inde kakhulu kuwe, uze wehluleke ukukuthwala, ngoba ikhatshana kakhulu lawe indawo i Nkosi uNkulunkulu wakho ezayikhetha ukuthi ibeke ibizo layo khona, lapho i Nkosi uNkulunkulu wakho ikubusisile,

²⁵uzakuguqula-ke kube yimali, ubophele imali esandleni sakho, uye endaweni i Nkosi uNkulunkulu wakho ezayikhetha,

²⁶uthenge ngaleyomali loba kuyini umphefumulo wakho okufisayo, izinkabi loba izimvu loba iwayini loba okunathwayo okulamandla, loba kuyini umphefumulo wakho okufisayo; udle khona phambi kwe Nkosi uNkulunkulu wakho, uthabe wena lendlu yakho.

²⁷LomLevi ophakathi kwamasango akho, ungamdeli, ngoba kalasabelo lelifa kanye lawe.

²⁸Ekupheleni kweminyaka emithathu uzakhupha yonke ingxenye yetshumi yezithelo zakho ngalowomnyaka, uyigcine phakathi kwamasango akho.

²⁹LomLevi, lokhu engelasabelo lelifa kanye lawe, lowemzini, lentandane, lomfelokazi, abaphakathi kwamasango akho, bazakuza, badle, basuthe, ukuze i Nkosi uNkulunkulu wakho ikubusise emsebenzini wonke wesandla sakho owenzayo.