Read Ndebele-IBhayibhili Elingcwele 2006 Uduteronomi 15 Bible Online

Uduteronomi 15 - Ndebele-IBhayibhili Elingcwele 2006 bible

Uduteronomi 15

¹Ekupheleni kweminyaka yonke eyisikhombisa uzakwenza inkululeko.

²Njalo le yindlela yenkululeko: Wonke umkweledisi oweboleka umakhelwane wakhe uzakhulula isikwelede; kayiku si bamba ngamandla kumakhelwane wakhe kumbe kumfowabo, ngoba kumenyezelwe inkululeko e Nkosi ni.

³Kowezizweni uza si bamba ngamandla; kodwa lokho okwakho okukumfowenu isandla sakho sizakukhulula.

⁴Kuphela, ngoba kakuyikuba lomyanga phakathi kwakho, ngoba i Nkosi izakubusisa lokukubusisa elizweni i Nkosi uNkulunkulu wakho ekunika lona ukuthi libe yilifa ukudla ilifa lalo,

⁵kuphela uba ulalela lokulalela ilizwi le Nkosi uNkulunkulu wakho, ugcine ukuyenza limithetho yonke engikulaya yona lamuhla.

⁶Ngoba i Nkosi uNkulunkulu wakho izakubusisa njengokukhuluma kwayo kuwe. Njalo uzakweboleka izizwe ezinengi, kodwa wena kawuyikweboleka kuzo; uzabusa izizwe ezinengi, kodwa wena kaziyikukubusa.

⁷Uba kukhona phakathi kwakho umyanga ongomunye wabafowenu, kwelinye lamasango akho, elizweni lakho, i Nkosi uNkulunkulu wakho ekunika lona, ungenzi lukhuni inhliziyo yakho, ungamvaleli umfowenu ongumyanga isandla sakho,

⁸kodwa uzamvulela lokumvulela isandla sakho, umeboleke lokumeboleka okwanela ukuswela kwakhe, lokho akuswelayo.

⁹Ziqaphele hlezi kube khona ilizwi enhliziyweni yakho embi lisithi: Umnyaka wesikhombisa, umnyaka wenkululeko useduze; lelihlo lakho libe libi limelane lomfowenu ongumyanga, ukuze ungamniki, abesekhala ngawe e Nkosi ni, njalo kube yisono kuwe.

¹⁰Umnike lokumnika, lenhliziyo yakho ingadani nxa umnika; ngoba ngenxa yalinto i Nkosi uNkulunkulu wakho izakubusisa emsebenzini wonke wakho lakukho konke obeka kukho isandla sakho.

¹¹Ngoba umyanga kayikuphela phakathi kwelizwe. Ngakho ngiyakulaya ngithi: Uzamvulela kakhulu isandla sakho umfowenu, umyanga wakho, loswelayo wakho, elizweni lakho.

¹²Uba umfowenu, umHebheru loba umHebherukazi, ethengiswa kuwe, akusebenzele iminyaka eyisithupha, ngakho ngomnyaka wesikhombisa uzamyekela ukuthi ahambe ekhululekile asuke kuwe.

¹³Lalapho umyekela ukuthi ahambe ekhululekile esuka kuwe, ungamyekeli ukuthi ahambe engaphathanga lutho;

¹⁴uzamnakekela lokumnakekela ezimvini zakho, lokwebala lokubhulela lakho, lokwesikhamelo sakho sewayini; ku lokho i Nkosi uNkulunkulu wakho ekubusise ngakho uzamupha.

¹⁵Njalo uzakhumbula ukuthi wawuyisigqili elizweni leGibhithe, lokuthi i Nkosi uNkulunkulu wakho yakuhlenga. Ngalokho ngiyakulaya linto lamuhla.

¹⁶Kodwa kuzakuthi, uba esithi kuwe: Kangiyikusuka kuwe, ngoba ethanda wena lendlu yakho, ngoba kulungile kuye elawe,

¹⁷uzathatha usungulo, ubhobozele indlebe yakhe ngalo esivalweni, ukuze abe yisigqili sakho laphakade. Lakuso isigqilikazi sakho wenze njalo.

¹⁸Kakungabi lukhuni emehlweni akho nxa umyekela ehamba ekhululekile kuwe; ngoba ngokuphindwe kabili kweholo lesiqatshwa ukusebenzele iminyaka eyisithupha. Ngakho i Nkosi uNkulunkulu wakho izakubusisa kukho konke okwenzayo.

¹⁹Wonke amazibulo azazalwa enkomeni zakho lezimvini zakho, amaduna, uzawangcwelisela i Nkosi uNkulunkulu wakho; kawuyikusebenza ngezibulo lejongosi lakho, futhi kawuyikugunda izibulo lezimvu zakho.

²⁰Phambi kwe Nkosi uNkulunkulu wakho uzalidla, umnyaka ngomnyaka, endaweni i Nkosi ezayikhetha, wena lendlu yakho.

²¹Kodwa uba kulesici kulo, liqhula, loba liyisiphofu, loba lilasiphi isici esibi, ungalihlabeli i Nkosi uNkulunkulu wakho.

²²Uzalidla phakathi kwamasango akho, ongahlambulukanga lohlambulukileyo bazalidla bendawonye, njengomziki lanjengendluzele.

²³Kuphela igazi lalo ungalidli; ulichithele emhlabathini njengamanzi.