Read Ndebele-IBhayibhili Elingcwele 2006 Uduteronomi 17 Bible Online

Uduteronomi 17 - Ndebele-IBhayibhili Elingcwele 2006 bible

Uduteronomi 17

¹Ungahlabeli i Nkosi uNkulunkulu wakho inkabi kumbe imvu okukuyo isici, loba yiyiphi into embi, ngoba kuyisinengiso e Nkosi ni uNkulunkulu wakho.

²Uba kutholakala phakathi kwakho, loba phakathi kwaliphi lamasango akho, i Nkosi uNkulunkulu wakho ekunika wona, owesilisa loba owesifazana owenza okubi emehlweni e Nkosi uNkulunkulu wakho, ngokweqa isivumelwano sayo,

³abesesiyakhonza abanye onkulunkulu, abakhothamele, loba ilanga kumbe inyanga, kumbe enye yebutho lamazulu, engingakulayanga,

⁴ube usukubikelwa, ukuzwe, uzakubuzisisa, khangela-ke, kuliqiniso, indaba iqinisekile, lesosinengiso senziwe koIsrayeli,

⁵uzayikhupha leyondoda kumbe lowo owesifazana, abenze leyonto embi, emasangweni akho, leyondoda kumbe lowo owesifazana, ubakhande ngamatshe baze bafe.

⁶Ngomlomo wabafakazi ababili loba wabafakazi abathathu ofanele ukufa uzabulawa; kayikubulawa ngomlomo womfakazi oyedwa.

⁷Isandla sabafakazi sizakuba ngesokuqala phezu kwakhe ukumbulala, lemva kwalokho isandla sabo bonke abantu. Ngalokhu uzakhupha ububi phakathi kwakho.

⁸Uba kulodaba olulukhuni kakhulu kuwe ekwahluleleni, phakathi kwegazi legazi, phakathi kwesahlulelo lesahlulelo, laphakathi kokutshaya lokutshaya, indaba zokuphikisana emasangweni akho, khona uzasukuma uye endaweni i Nkosi uNkulunkulu wakho ezayikhetha,

⁹uze kubapristi abangamaLevi lakumahluleli ozakuba ekhona ngalezonsuku, uzabuza; babesebekutshela isinqumo sesahlulelo.

¹⁰Njalo uzakwenza njengokwesinqumo abazakutshela sona kuleyondawo i Nkosi ezayikhetha; njalo unanzelele ukwenza njengakho konke abazakufundisa khona.

¹¹Njengokomthetho abazakufundisa wona, lanjengokwesahlulelo abazakutshela sona, uzakwenza. Kawuyikuphambuka kusinqumo abazakutshela sona, uye ngakwesokunene kumbe ngakwesokhohlo.

¹²Lendoda eyenza ngokuziqhenya ukuze ingalaleli umpristi omi ukukhonza khona i Nkosi uNkulunkulu wakho, kumbe umahluleli, leyondoda izakufa. Ngalokhu uzakhupha ububi koIsrayeli.

¹³Njalo bonke abantu bazakuzwa, besabe, bangaphindi ukuziqhenya.

¹⁴Lapho usufikile elizweni i Nkosi uNkulunkulu wakho ekunika lona ukuthi udle ilifa lalo, uhlale kilo, ubususithi: Ngizazimisela inkosi njengazo zonke izizwe ezingizingelezeleyo;

¹⁵umbeke lokumbeka abe yinkosi phezu kwakho, yena i Nkosi uNkulunkulu wakho ezamkhetha. Evela phakathi kwabafowenu umbeke abe yinkosi phezu kwakho; kawulakumbeka owezizweni phezu kwakho ongesumfowenu.

¹⁶Kodwa angazandiseli amabhiza, njalo angababuyiseli abantu eGibhithe ukuze andise amabhiza, ngoba i Nkosi ithe kini: Kalisayikubuyela futhi ngaleyondlela.

¹⁷Futhi angazandiseli abafazi, ukuze inhliziyo yakhe ingaphambuki; njalo angazandiseli kakhulu isiliva legolide.

¹⁸Kuzakuthi esehlala esihlalweni sobukhosi sombuso wakhe, uzazibhalela impinda yalumlayo egwalweni, okuvela kulokho okuphambi kwabapristi abangamaLevi.

¹⁹Njalo luzakuba laye, njalo abale kulo insuku zonke zempilo yakhe, ukuze afunde ukuyesaba i Nkosi uNkulunkulu wakhe, agcine wonke amazwi alumlayo lezimiso lezi, azenze,

²⁰ukuze inhliziyo yakhe ingaziphakamisi phezu kwabafowabo, lokuze angaphambuki emthethweni aye ngakwesokunene loba ngakwesokhohlo, ukuze elule izinsuku embusweni wakhe, yena labantwana bakhe, phakathi kukaIsrayeli.