Read Ndebele-IBhayibhili Elingcwele 2006 Uduteronomi 19 Bible Online

Uduteronomi 19 - Ndebele-IBhayibhili Elingcwele 2006 bible

Uduteronomi 19

¹Lapho i Nkosi uNkulunkulu wakho isiqumile izizwe, olizwe lazo i Nkosi uNkulunkulu wakho ekunike lona, osusidla ilifa lazo, osuhlala emizini yazo lezindlini zazo,

²imizi emithathu uzazehlukanisela yona phakathi kwelizwe i Nkosi uNkulunkulu wakho ekunika lona ukudla ilifa lalo.

³Uzazilungisela indlela, wehlukanise umngcele welizwe lakho i Nkosi uNkulunkulu wakho ekunika lona ukudla ilifa lalo, ube lezigaba ezintathu, ukuze wonke umbulali abalekele khona.

⁴Lalolu ludaba lombulali ongabalekela khona ukuze aphile: Lowo otshaya umakhelwane wakhe kungeyisikho ngabomo, obengamzondi mandulo,

⁵njengongena egangeni lomakhelwane wakhe ukuyagamula izihlahla, lesandla sakhe sitshaya ngehloka ukugamula isihlahla, lensimbi ikhumuke emphinini, imtshaye umakhelwane wakhe aze afe, yena uzabalekela komunye waleyomizi ukuze aphile.

⁶Hlezi umphindiseli wegazi axotshane lombulali, inhliziyo yakhe isatshisa, amfice ngoba indlela inde, amtshaye ambulale, lanxa bekungelasigwebo sokufa kuye, ngoba ebengamzondi mandulo.

⁷Ngalokhu ngiyalilaya ngisithi: Uzazehlukanisela imizi emithathu.

⁸Uba-ke i Nkosi uNkulunkulu wakho iqhelisa umngcele wakho, njengokufunga kwayo kuboyihlo, ikunika ilizwe lonke eyakhuluma ngalo ukubanika oyihlo,

⁹uba ugcina yonke limithetho ukuyenza engikulaya yona lamuhla, ukuthanda i Nkosi uNkulunkulu wakho, lokuhamba endleleni zayo izinsuku zonke, khona uzazengezelelela eminye imizi emithathu ngaphandle kwaleyo emithathu.

¹⁰Ukuze kungachithwa igazi elingelacala phakathi kwelizwe lakho i Nkosi uNkulunkulu wakho ekunika lona ukuba yilifa, ube lecala legazi phezu kwakho.

¹¹Kodwa uba umuntu elenzondo kumakhelwane wakhe, amcathamele, amvukele, amtshaye okokufa aze afe, abalekele komunye walimizi,

¹²khona abadala bomuzi wakhe bazathumela bamthathe lapho, bamnikele esandleni somphindiseli wegazi ukuthi afe.

¹³Ilihlo lakho lingamhawukeli, kodwa uzakhupha igazi elingelacala koIsrayeli, ukuze kukulungele.

¹⁴Ungatshedisi isikhonkwane somngcele womakhelwane wakho abendulo abasibethelayo elifeni lakho, ozakudla ilifa lalo elizweni i Nkosi uNkulunkulu wakho ekunika lona ukudla ilifa lalo.

¹⁵Umfakazi oyedwa kayikusukumela umuntu loba ngabuphi ububi loba ngasiphi isono, loba kusiphi isono one ngaso. Ngomlomo wabafakazi ababili kumbe ngomlomo wabafakazi abathathu udaba lungaqiniswa.

¹⁶Uba kusukuma umfakazi wamanga amelane lomuntu emfakazela ngokubi,

¹⁷khona abantu bobabili, abalokuxabana, bazakuma phambi kwe Nkosi, phambi kwabapristi labahluleli abazakuba bekhona ngalezonsuku.

¹⁸Labahluleli bazachwayisisa; khangela-ke umfakazi ngumfakazi wamanga, ufakaze amanga ngomfowabo,

¹⁹khona lizakwenza kuye lokho abehlose ukukwenza kumfowabo; ngalokhu uzakhupha ububi phakathi kwakho.

²⁰Lalabo abaseleyo bazakuzwa, besabe, kusukela lapho bangabe besenza ububi obunjengalobu phakathi kwakho.

²¹Lelihlo lakho lingabi lesihawu; impilo ngempilo, ilihlo ngelihlo, izinyo ngezinyo, isandla ngesandla, unyawo ngonyawo.