Read Ndebele-IBhayibhili Elingcwele 2006 Uduteronomi 21 Bible Online

Uduteronomi 21 - Ndebele-IBhayibhili Elingcwele 2006 bible

Uduteronomi 21

¹Uba kutholakala obuleweyo elizweni i Nkosi uNkulunkulu wakho ekunika lona ukudla ilifa lalo, elele egangeni, kungaziwa ukuthi ngubani omtshayileyo,

²abadala bakho labahluleli bakho bazaphuma, balinganise ukuya emizini ezingelezele obuleweyo.

³Kuzakuthi-ke umuzi oseduze lobuleweyo, abadala balowomuzi bazathatha ithokazi enkomeni, okungasetshenzwanga ngalo, elingadonsanga ejogweni.

⁴Labadala balowomuzi balehlisele ithokazi esigodini esilamanzi angacitshiyo, esingalinywanga lesingahlanyelwanga, bephule intamo yethokazi lapho esigodini.

⁵Abapristi, amadodana kaLevi, bazasondela-ke; ngoba i Nkosi uNkulunkulu wakho ibakhethile ukuyikhonza lokubusisa ebizweni le Nkosi, langomlomo wabo kuzaqunywa konke ukuxabana lakho konke ukutshaya.

⁶Labo bonke abadala balowomuzi oseduze lobuleweyo bazagezela izandla zabo phezu kwethokazi elephulwe intamo esigodini,

⁷baphendule bathi: Izandla zethu kazichithanga leligazi, lamehlo ethu kawakubonanga.

⁸Bathethelele abantu bakho uIsrayeli owamhlengayo, Nkosi, ungabeki igazi elingelacala phakathi kwesizwe sakho uIsrayeli. Legazi bazalithethelelwa.

⁹Ngalokhu wena uzakhupha igazi elingelacala phakathi kwakho nxa usenza okulungileyo emehlweni e Nkosi.

¹⁰Lapho uphuma impi ukumelana lezitha zakho, i Nkosi uNkulunkulu wakho isizinikele esandleni sakho, usuthumbe abathunjwa bazo,

¹¹ubusubona phakathi kwabathunjiweyo owesifazana omuhle ngesimo, umfise, ukuthi ungamthatha abe ngumkakho,

¹²uzamngenisa phakathi komuzi wakho, njalo aphuce ikhanda lakhe, aqume inzipho zakhe,

¹³akhulule izembatho zokuthunjwa kwakhe, ahlale emzini wakho abeselilela uyise lonina inyanga yonke. Emva kwalokho ubusungena kuye, ube yindoda yakhe, laye abe ngumkakho.

¹⁴Kuzakuthi-ke, uba ungathokozi ngaye, uzamyekela ahambe njengokuthanda kwakhe; kodwa ungamthengisi lokumthengisa ngemali, ungamphathi njengesigqili, ngoba usumthobisile.

¹⁵Uba indoda ilabafazi ababili, omunye eyintandokazi lomunye eyisaliwakazi, njalo bamzalele abantwana, intandokazi lesaliwakazi, uba izibulo libe yindodana yesaliwakazi,

¹⁶kuzakuthi, mhla esenza amadodana akhe ukuthi adle ilifa lalokho alakho, kangayenzi indodana yentandokazi ibe lizibulo phambi kwendodana yesaliwakazi, elizibulo.

¹⁷Kodwa izibulo, indodana yesaliwakazi, uzalivuma ngokulinika isabelo esiphindwe kabili sakho konke okuficwayo kuye, ngoba liyikuqala kwamandla akhe; ilungelo lobuzibulo ngelalo.

¹⁸Uba indoda ilendodana elenkani lengezwayo, engalaleli ilizwi likayise kumbe ilizwi likanina, sebeyijezisile, njalo ingabalaleli,

¹⁹khona uyise lonina bazayibamba, bayikhuphele ebadaleni bomuzi wayo, lesangweni lendawo yayo,

²⁰bathi ebadaleni bomuzi wayo: Lindodana yethu ilenkani, kayizwa, kayilaleli ilizwi lethu; iyisiminzi lesidakwa.

²¹Khona wonke amadoda omuzi wayo azayikhanda ngamatshe ize ife; ngalokho uzakhupha ububi phakathi kwakho; njalo uIsrayeli wonke uzakuzwa, esabe.

²²Njalo uba kuzakuba lesono emuntwini esifanele ukufa, abulawe, uzamphanyeka esihlahleni.

²³Isidumbu sakhe singahlali esihlahleni ubusuku bonke, kodwa lizamngcwaba lokumngcwaba ngalolosuku (ngoba ophanyekiweyo uqalekisiwe nguNkulunkulu ), ukuze lingangcoliswa ilizwe lakho, i Nkosi uNkulunkulu wakho ekunika lona ukuba yilifa.