Read Ndebele-IBhayibhili Elingcwele 2006 Uduteronomi 24 Bible Online

Uduteronomi 24 - Ndebele-IBhayibhili Elingcwele 2006 bible

Uduteronomi 24

¹Uba indoda ithatha umfazi, imgane, kuzakuthi nxa engatholi umusa emehlweni ayo, ngoba ifice kuye into elihlazo, kayimbhalele incwadi yesehlukaniso, ifake esandleni sakhe, imkhuphe endlini yayo.

²Nxa esephumile endlini yayo, angahamba, ayekuba ngowenye indoda.

³Uba lindoda elandelayo imzonda, imbhalele incwadi yesehlukaniso, i yi fake esandleni sakhe, imkhiphe endlini yayo; loba lindoda elandelayo isifa ebimthethe waba ngumkayo,

⁴indoda yakhe yokuqala eyamkhiphayo ingemthathe futhi abe ngumkayo, emva kokuba esengcolisiwe; ngoba kuyisinengiso phambi kwe Nkosi. Ngakho kawuyikwenza ilizwe lone i Nkosi uNkulunkulu wakho ekunika lona ukuba yilifa.

⁵Nxa indoda ithethe umfazi omutsha kayiyikuphuma impi, futhi kayiyikuphathiswa laloba yiwuphi umsebenzi; izakuba sekhaya ikhululekile umnyaka owodwa ukuze ithokozise umkayo emthetheyo.

⁶Kakungabi khona ozathatha ilitshe lokuchola loba imbokodo ukuze kube yisibambiso; ngoba uthatha impilo ibe yisibambiso.

⁷Uba umuntu eficwa eseba umuntu kubafowabo ebantwaneni bakoIsrayeli, amphathe njengesigqili njalo amthengise, lelosela lizakufa. Ngalokhu uzakhupha ububi phakathi kwakho.

⁸Qaphela esifeni sobulephero, ukunanzelelisisa wenze njengakho konke abapristi abangamaLevi abakufundisa khona; njengalokhu ngabalaya, nanzelelani ukukwenza.

⁹Khumbula lokho i Nkosi uNkulunkulu wakho eyakwenza kuMiriyamu endleleni ekuphumeni kwenu eGibhithe.

¹⁰Nxa useboleka umakhelwane wakho ulutho, ungangeni endlini yakhe ukuthi uthathe isibambiso sakhe.

¹¹Uzakuma phandle, lomuntu omebolekayo akukhuphele isibambiso phandle.

¹²Njalo uba umuntu engumyanga, ungalali lesibambiso sakhe;

¹³uzabuyisela lokubuyisela isibambiso kuye lapho ilanga litshona, ukuze alale ngesembatho sakhe, akubusise; lalokho kuzakuba yikulunga kuwe phambi kwe Nkosi uNkulunkulu wakho.

¹⁴Ungacindezeli inceku eqatshiweyo engumyanga leswelayo, ingowabafowenu loba ingowezizweni oselizweni lakini phakathi kwamasango akho.

¹⁵Uzanika iholo layo ngosuku lwayo, lelanga kalingatshoni phezu kwalo, ngoba ingumyanga, ibeke inhliziyo yayo kulo; ukuze ingakhali e Nkosi ni ngawe, njalo kube yisono kuwe.

¹⁶Oyise kabayikubulawa ngenxa yabantwana, labantwana kabayikubulawa ngenxa yaboyise; ngulowo lalowo uzabulawa ngenxa yesakhe isono.

¹⁷Ungaphambuli isahlulelo sowemzini le ntandane; ungathathi isembatho somfelokazi sibe yisibambiso;

¹⁸kodwa ukhumbule ukuthi wawuyisigqili eGibhithe, le Nkosi uNkulunkulu wakho yakuhlenga khona; ngakho ngiyakulaya ukuthi wenze lolulutho.

¹⁹Nxa uvuna isivuno sakho ensimini yakho, ukhohlwe isithungo ensimini, ungabuyeli ukusithatha; sizakuba ngesowemzini, esentandane lesomfelokazi; ukuze i Nkosi uNkulunkulu wakho ikubusise emsebenzini wonke wezandla zakho.

²⁰Nxa uvuthuza isihlahla sakho somhlwathi, ungayihlola izingatsha emva kwakho; kuzakuba ngokowemzini lokwentandane lokomfelokazi.

²¹Nxa usuvunile izithelo zesivini sakho, ungakhothozi emva kwakho; kuzakuba ngokowemzini lokwentandane lokomfelokazi.

²²Uzakhumbula ukuthi wawuyisigqili elizweni leGibhithe; ngakho ngiyakulaya ukwenza lolulutho.