Read Ndebele-IBhayibhili Elingcwele 2006 Uduteronomi 28 Bible Online

Uduteronomi 28 - Ndebele-IBhayibhili Elingcwele 2006 bible

Uduteronomi 28

¹Kuzakuthi-ke, uba ulalela lokulalela ilizwi le Nkosi uNkulunkulu wakho, ukugcina ukwenza yonke imilayo yayo engikulaya yona lamuhla, i Nkosi uNkulunkulu wakho izakumisa phezulu phezu kwazo zonke izizwe zomhlaba.

²Lalezizibusiso zonke zizakuza phezu kwakho, zikufice, nxa ulalela ilizwi le Nkosi uNkulunkulu wakho.

³Uzabusiswa emzini, ubusiswe futhi ensimini.

⁴Sizabusiswa isithelo sesizalo sakho, lesithelo somhlaba wakho, lenzalo yezifuyo zakho, umqegu wenkomo zakho, lamazinyane ezimvu zakho.

⁵Kuzabusiswa isitsha sakho, lomganu wakho wokuxovela izinkwa.

⁶Uzabusiswa ekungeneni kwakho, ubusiswe ekuphumeni kwakho.

⁷I Nkosi izakwenza izitha zakho ezikuvukelayo zitshaywe phambi kwakho; zizaphuma ukumelana lawe ngandlelanye, zibaleke phambi kwakho ngezindlela eziyisikhombisa.

⁸I Nkosi izalaya isibusiso phezu kwakho, eziphaleni zakho lakukho konke obeka kukho isandla sakho, ikubusise elizweni i Nkosi uNkulunkulu wakho ekunika lona.

⁹I Nkosi izazimisela wena ube yisizwe esingcwele, njengokufunga kwayo kuwe, uba ugcina imilayo ye Nkosi uNkulunkulu wakho, uhambe endleleni zayo.

¹⁰Labo bonke abantu basemhlabeni bazabona ukuthi ibizo le Nkosi libizwa phezu kwakho, bakwesabe.

¹¹Le Nkosi izakwandisela okuhle, esithelweni sesizalo sakho, lenzalweni yezifuyo zakho, lesithelweni somhlaba wakho, elizweni i Nkosi eyafungela oyihlo ukukunika lona.

¹²I Nkosi izakuvulela okuligugu kwayo okulungileyo, amazulu, ukunika izulu elizweni lakho ngesikhathi salo, lokubusisa umsebenzi wonke wesandla sakho; njalo uzakweboleka izizwe ezinengi, kodwa wena ungeboleki kuzo.

¹³I Nkosi izakwenza ube yinhloko, ungabi ngumsila; uzakuba ngaphezulu kuphela, ungabi ngaphansi, uba ulalela imilayo ye Nkosi uNkulunkulu wakho engikulaya yona lamuhla ukuyigcina lokuyenza.

¹⁴Ungaphambuki lakwelilodwa lamazwi engililaya wona lamuhla, ukuya ngakwesokunene langakwesokhohlo, ukulandela abanye onkulunkulu ukubakhonza.

¹⁵Kodwa kuzakuthi, uba ungalaleli ilizwi le Nkosi uNkulunkulu wakho, ukugcina ukwenza yonke imilayo yayo lezimiso zayo engikulaya zona lamuhla, leziziqalekiso zonke zize phezu kwakho zikufice.

¹⁶Uzaqalekiswa emzini, uqalekiswe futhi ensimini.

¹⁷Kuzaqalekiswa isitsha sakho lomganu wakho wokuxovela izinkwa.

¹⁸Kuzaqalekiswa isithelo sesizalo sakho, lesithelo somhlaba wakho, umqegu wenkomo zakho, lamazinyane ezimvu zakho.

¹⁹Uzaqalekiswa ekungeneni kwakho, uqalekiswe ekuphumeni kwakho.

²⁰I Nkosi izathumela phakathi kwakho isiqalekiso, inhlupheko, lokukhuza, kukho konke obeka isandla sakho kukho ukukwenza, uze uchithwe, njalo uze ubhubhe masinyane, ngenxa yobubi bezenzo zakho, ongidele ngazo.

²¹I Nkosi izanamathelisa kuwe umatshayabhuqe wesifo, aze akuqede usuke elizweni oya kulo ukudla ilifa lalo.

²²I Nkosi izakutshaya ngesifo esicakisayo, langoqhuqho, langokuvuvuka komzimba, langokutshisa okukhulukazi, langenkemba, langokuhanguka, langengumane; njalo kuzakuxotsha uze ubhubhe.

²³Lesibhakabhaka sakho esiphezu kwekhanda lakho sizakuba lithusi, lomhlaba ongaphansi kwakho ube yinsimbi.

²⁴I Nkosi izakwenza izulu lelizwe lakho libe ngumsizi lothuli, kwehlele phezu kwakho kuvela emazulwini, uze ubhujiswe.

²⁵I Nkosi izakwenza utshaywe phambi kwezitha zakho; uzaphuma umelane lazo ngandlelanye, njalo uzabaleka phambi kwazo ngezindlela eziyisikhombisa; uzakuba yinto eyesabekayo kuyo yonke imibuso yomhlaba.

²⁶Lesidumbu sakho sizakuba yikudla kwenyoni zonke zamazulu lokwezinyamazana zomhlaba, njalo kungabi khona ozethusayo.

²⁷I Nkosi izakutshaya ngamathumba eGibhithe, lamaqhubu, loqweqwe, lenkomo, ongelakwelatshwa kukho.

²⁸I Nkosi izakutshaya ngobuhlanya langobuphofu langokudideka kwenhliziyo.

²⁹Njalo uzaphumputha emini njengesiphofu siphumputha emnyameni, ungenzi indlela zakho ziphumelele; ucindezelwe kuphela, uphangwe insuku zonke, kungabi khona osindisayo.

³⁰Uzagana umfazi, kodwa enye indoda ilale laye; uzakwakha indlu, kodwa ungahlali kuyo; uhlanyele isivini, kodwa ungakhi izithelo zaso.

³¹Inkabi yakho izahlatshwa phambi kwamehlo akho, ungadli okwayo; ubabhemi wakho athathwe ngodlakela phambi kobuso bakho, angabuyeli kuwe; izimvu zakho zizanikwa izitha zakho, kungabi khona okusindiselayo.

³²Amadodana akho lamadodakazi akho azanikelwa kwesinye isizwe, lamehlo akho azakhangela abalangathe usuku lonke; kodwa kungabi lamandla esandleni sakho.

³³Isithelo somhlaba wakho, lomsebenzi wakho wonke, isizwe ongasaziyo sizakudla. Uzacindezelwa kuphela, uchotshozwe insuku zonke,

³⁴uze uhlanye ngenxa yokubona kwamehlo akho ozakubona.

³⁵I Nkosi izakutshaya emadolweni lemilenzeni ngamathumba amabi angelakwelatshwa, kusukela kungaphansi yonyawo lwakho kuze kube senkanda yakho.

³⁶I Nkosi izakusa wena lenkosi yakho owayibeka phezu kwakho esizweni ongasaziyo wena laboyihlo, ukhonze lapho abanye onkulunkulu, isigodo lelitshe.

³⁷Uzakuba yinto eyesabekayo, isaga, lenhlekisa phakathi kwazo zonke izizwe, lapho i Nkosi ezakusa khona.

³⁸Uzaphuma lenhlanyelo enengi uye ensimini, kodwa ubuthelele okulutshwana, ngoba isikhonyane sizakudla.

³⁹Uzahlanyela izivini, uzisebenze, kodwa kawuyikunatha iwayini, kawuyikubutha lutho, ngoba imihogoyi izazidla.

⁴⁰Uzakuba lezihlahla zemihlwathi phakathi kwemingcele yakho yonke, kodwa kawuyikugcoba ngamafutha, ngoba isihlahla somhlwathi sizawohloza.

⁴¹Uzazala amadodana lamadodakazi, kodwa kawayikuba ngawakho, ngoba azakuya ekuthunjweni.

⁴²Zonke izihlahla zakho lezithelo zomhlaba wakho zizakuba ngezesikhonyane.

⁴³Owemzini ophakathi kwakho uzaphakama phezu kwakho aqonge phezulu, wena-ke uzakwehlela phansi phansi.

⁴⁴Yena uzakweboleka, kodwa wena ungameboleki; yena uzakuba yinhloko, kodwa wena ube ngumsila.

⁴⁵Lazo zonke leziziqalekiso zizakwehlela, zixotshane lawe, zikufice, uze ubhujiswe, ngoba ungalilalelanga ilizwi le Nkosi uNkulunkulu wakho, ukugcina imilayo yayo lezimiso zayo eyakulaya zona.

⁴⁶Njalo zizakuba phezu kwakho ukuba yisibonakaliso lokuba yisimangaliso, laphezu kwenzalo yakho kuze kube nininini.

⁴⁷Njengoba ungayikhonzanga i Nkosi uNkulunkulu wakho ngentokozo langenjabulo yenhliziyo, ngenxa yobunengi bakho konke,

⁴⁸ngakho uzakhonza izitha zakho i Nkosi ezazithuma ukumelana lawe, endlaleni, lekomeni, lekuhambenize, lekusweleni konke. Njalo izabeka ijogwe lensimbi entanyeni yakho, ize ikubhubhise.

⁴⁹I Nkosi izakuvusela isizwe esivela khatshana, emkhawulweni womhlaba, njengokuphapha kokhozi, isizwe olimi lwaso ongayikuluzwa,

⁵⁰isizwe esilobuso obesabekayo, esingemukeli ubuso bomdala, esingelamusa komutsha.

⁵¹Sizakudla isithelo sezifuyo zakho lesithelo somhlaba wakho, uze ubhujiswe; okungayikukutshiyela amabele, iwayini elitsha, lamafutha, umqegu wenkomo zakho, lamazinyane ezimvu zakho, size sikuchithe.

⁵²Sizakuvimbezela emasangweni akho wonke, ize idilike imiduli yakho ephakemeyo lebiyelwe ngemithangala obuthembela kuyo, elizweni lonke lakho; njalo sizakuvimbezela emasangweni akho wonke elizweni lonke lakho i Nkosi uNkulunkulu wakho ekunike lona.

⁵³Njalo uzakudla isithelo sesizalo sakho, inyama yamadodana leyamadodakazi akho, i Nkosi uNkulunkulu wakho ekunike wona, ekuvinjezelweni lekucindezelweni, izitha zakho ezizakucindezela ngakho.

⁵⁴Indoda ebuthakathaka phakathi kwakho letotoziweyo kakhulu, ilihlo layo lizakuba libi kumfowabo, lakumka yo wesifuba sayo, lakunsali yabantwana bayo ezabatshiya;

⁵⁵ukuze inganiki lamunye wabo okwenyama yabantwana bayo ebadlayo, ngoba ingasalelwanga lutho ekuvinjezelweni lekucindezelweni, izitha zakho ezizakucindezela ngakho emasangweni akho wonke.

⁵⁶Owesifazana obuthakathaka lototoziweyo phakathi kwakho ongazamanga ukubeka ingaphansi yonyawo lwakhe emhlabathini ngenxa yokutotozwa lobuthakathaka, ilihlo lakhe lizakuba libi endodeni yesifuba sakhe, lasendodaneni yakhe, lasendodakazini yakhe,

⁵⁷lakumnakwabo ophuma phakathi kwenyawo zakhe, lebantwaneni azabazala; ngoba uzabadla ensitha ngenxa yokuswela konke, ekuvinjezelweni lekucindezelweni, isitha sakho esizakucindezela ngakho emasangweni akho.

⁵⁸Uba ungayikugcina ukwenza wonke amazwi alumlayo abhaliweyo egwalweni lolu, ukwesaba lelibizo elilodumo lelesabekayo, i Nkosi uNkulunkulu wakho,

⁵⁹i Nkosi izakwenza-ke inhlupheko zakho zimangalise, lenhlupheko zenzalo yakho, inhlupheko ezinkulu leziqhubekayo, lemikhuhlane emibi leqhubekayo.

⁶⁰Njalo izabuyisela kuwe zonke izifo zeGibhithe owawuzesaba, zizanamathela kuwe,

⁶¹lawo wonke umkhuhlane layo yonke inhlupheko engabhalwanga egwalweni lwalumlayo, i Nkosi izakwehlisela zona uze ubhujiswe.

⁶²Njalo lizasala lilabantu abalutshwana, endaweni yokuthi lalinjengenkanyezi zamazulu ngobunengi, ngoba kawulalelanga ilizwi le Nkosi uNkulunkulu wakho.

⁶³Kuzakuthi-ke, njengalokhu i Nkosi yathokoza ngani ukulenzela okuhle lokulandisa, ngokunjalo i Nkosi izajabula ngani ukulichitha lokuliqeda, lihluthunwe elizweni ongena kulo ukudla ilifa lalo.

⁶⁴I Nkosi izakuhlakazela-ke phakathi kwezizwe zonke, kusukela komunye umkhawulo womhlaba kuze kube komunye umkhawulo womhlaba, ukhonze lapho abanye onkulunkulu, wena laboyihlo elingabazanga, isigodo lelitshe.

⁶⁵Laphakathi kwalezozizwe kawuyikuphumula, lengaphansi yonyawo lwakho kayiyikuba lendawo yokuphumula; kodwa lapho i Nkosi izakupha inhliziyo ethuthumelayo, lokufiphala kwamehlo, lokudangala komphefumulo.

⁶⁶Lempilo yakho izahlala isevalweni phambi kwakho; uzatshaywa luvalo ebusuku lemini, ungabi lethemba lempilo yakho.

⁶⁷Ekuseni uzakuthi: Kungathi kungahlwa! Lakusihlwa uzakuthi: Kungathi kungasa! ngenxa yokwesaba kwenhliziyo ozakwesaba ngakho, langenxa yokubona kwamehlo akho ozakubona.

⁶⁸Le Nkosi izakubuyisela eGibhithe ngemikhumbi, ngendlela engatsho ngayo kuwe ukuthi: Kawusayikuyibona futhi. Lapho lizazithengisa ezitheni zakho libe yizigqili lezigqilikazi, kodwa kakuyikuba lomthengi.