Read Ndebele-IBhayibhili Elingcwele 2006 Uduteronomi 29 Bible Online

Uduteronomi 29 - Ndebele-IBhayibhili Elingcwele 2006 bible

Uduteronomi 29

¹La ngamazwi esivumelwano i Nkosi eyamlaya uMozisi ukusenza labantwana bakoIsrayeli elizweni lakoMowabi, ngaphandle kwesivumelwano eyayisenze labo eHorebe.

²UMozisi wasebiza uIsrayeli wonke, wathi kubo: Lina libonile konke i Nkosi eyakwenza phambi kwamehlo enu elizweni leGibhithe, kuFaro lakuzo zonke inceku zakhe lakulo lonke ilizwe lakhe,

³izilingo ezinkulu amehlo akho azibonileyo, izibonakaliso lalezozimangaliso ezinkulu.

⁴Kodwa i Nkosi kayilinikanga inhliziyo yokuqedisisa lamehlo okubona lendlebe zokuzwa kuze kube lamuhla.

⁵Ngilihambise iminyaka engamatshumi amane enkangala. Izembatho zenu kaziguganga phezu kwenu, lenyathela lakho kaliguganga enyaweni lwakho;

⁶kalidlanga sinkwa, kalinathanga iwayini lokunathwayo okulamandla, ukuze lazi ukuthi ngiyi Nkosi uNkulunkulu wenu.

⁷Ekufikeni kwenu kulindawo, uSihoni inkosi yeHeshiboni loOgi inkosi yeBashani baphuma ukumelana lathi empini, kodwa sabatshaya,

⁸sathatha ilizwe labo, salinika laba yilifa kwabakoRubeni lakwabakoGadi lakungxenye eyodwa kwezimbili yesizwe sakoManase.

⁹Ngakho gcinani amazwi alesisivumelwano liwenze, ukuze liphumelele kukho konke elikwenzayo.

¹⁰Lina lonke limi phambi kwe Nkosi uNkulunkulu wenu lamuhla, inhloko zenu, izizwe zenu, abadala benu, lezinduna zenu, wonke amadoda akoIsrayeli,

¹¹abantwanyana benu, omkenu, lowemzini ophakathi kwenkamba yakho, kusukela kumgamuli wenkuni zakho kuze kube kumukhi wamanzi akho,

¹²ukwedlulela esivumelwaneni se Nkosi uNkulunkulu wakho lesifungweni sayo, i Nkosi uNkulunkulu wakho esenza lawe lamuhla,

¹³ukuze ikumise lamuhla ube yisizwe sayo, lokuthi yona ibe nguNkulunkulu wakho, njengokutsho kwayo kuwe lanjengokufunga kwayo kuboyihlo, kuAbrahama, kuIsaka lakuJakobe.

¹⁴Njalo kangisenzi lani lodwa lesisivumelwano lalesisifungo,

¹⁵kodwa lalowo olapha lathi, omiyo lamuhla phambi kwe Nkosi uNkulunkulu wethu, njalo lalowo ongekho lapha lathi lamuhla.

¹⁶Ngoba lina liyazi ukuthi sahlala njani elizweni leGibhithe, lokuthi sadabula njani phakathi kwezizwe eladabula kuzo;

¹⁷njalo libonile izinengiso zazo, lezithombe zazo, isigodo lelitshe, isiliva legolide, ezazilazo.

¹⁸Hlezi kube khona phakathi kwenu indoda kumbe owesifazana kumbe usapho kumbe isizwe, onhliziyo yakhe iphambuka lamuhla isuka e Nkosi ni uNkulunkulu wethu ukuyakhonza onkulunkulu balezizizwe. Hlezi kube khona phakathi kwenu impande ethela izithelo ezilobuhlungu lezibabayo.

¹⁹Njalo kuzakuthi nxa esizwa amazwi alesisiqalekiso, azibusise enhliziyweni yakhe esithi: Ngizakuba lokuthula lanxa ngihamba ebuqholweni benhliziyo yami; ukuze kuqedwe okumanzi kanye lokomileyo.

²⁰I Nkosi kayiyikuvuma ukumthethelela, kodwa khona intukuthelo ye Nkosi lobukhwele bayo kuzathunqela leyondoda, njalo sonke isiqalekiso esibhaliweyo egwalweni lolu sizalala phezu kwayo, le Nkosi icitshe ibizo layo lisuke ngaphansi kwamazulu.

²¹Le Nkosi izayehlukanisela ububi iyikhuphe kuzo zonke izizwe zakoIsrayeli, njengazo zonke iziqalekiso zesivumelwano ezibhaliweyo egwalweni lwalumlayo.

²²Khona sizakuthi isizukulwana esizayo, abantwana benu, abazavela emva kwenu, lowezizwe ovela elizweni elikhatshana, lapho bebona inhlupheko zalelilizwe lezifo i Nkosi eligulise ngazo,

²³ilizwe lonke lalo lizakuba yisibabule letswayi lokutshiswa, alihlanyelwanga, kalimilisi, kakulalatshani obumila kulo, njengokubhujiswa kweSodoma leGomora, iAdima leZeboyimi, i Nkosi eyayibhubhisa entukuthelweni yayo lelakeni lwayo,

²⁴lazo zonke izizwe zizakuthi: Kungani i Nkosi yenze kanje kulelilizwe? Kuyini ukuvutha kwalolulaka olukhulu?

²⁵Khona bazakuthi: Ngoba batshiyile isivumelwano se Nkosi uNkulunkulu waboyise, eyasenza labo ekubakhupheni kwayo elizweni leGibhithe.

²⁶Bahamba bakhonza abanye onkulunkulu babakhothamela, onkulunkulu abangabaziyo, eyayingababelanga.

²⁷Lentukuthelo ye Nkosi yalivuthela lelilizwe, ukwehlisela kulo zonke iziqalekiso ezibhaliweyo egwalweni lolu.

²⁸Njalo i Nkosi yabasiphuna elizweni labo ngentukuthelo langolaka langenzondo enkulu, yabaphosela kwelinye ilizwe njengalamuhla.

²⁹Imfihlo ngeze Nkosi uNkulunkulu wethu, kodwa izinto ezembuliweyo zingezethu lezabantwana bethu kuze kube nininini, ukwenza wonke amazwi alumlayo.