Read Ndebele-IBhayibhili Elingcwele 2006 Uduteronomi 32 Bible Online

Uduteronomi 32 - Ndebele-IBhayibhili Elingcwele 2006 bible

Uduteronomi 32

¹Bekani indlebe, mazulu, ngizakhuluma, njalo zwana, mhlaba, amazwi omlomo wami.

²Imfundiso yami izathonta njengezulu, inkulumo yami izathonta njengamazolo, njengomkhizo phezu kohlaza, lanjengemifefezo emibhideni.

³Ngoba ngizamemezela ibizo le Nkosi. Mnikeni ubukhulu uNkulunkulu wethu.

⁴U liDwala, umsebenzi wakhe uphelele, ngoba zonke indlela zakhe ziyizahlulelo. UNkulunkulu weqiniso, ongelabubi, ulungile, uqondile.

⁵Bonile kuye, kabasibo abantwana bakhe, isici ngesabo, bayisizukulwana esigobileyo lesiphambeneyo.

⁶Lingahlawula lokho e Nkosi ni yini, bantu abayizithutha labangahlakaniphanga? Kayisuye yini uyihlo owakuthengayo, wakwenza, wakumisa?

⁷Khumbula insuku zendulo, unakane iminyaka yesizukulwana ngesizukulwana. Buza uyihlo, uzakulandisela, abadala bakho, bazakutshela.

⁸Lapho oPhezukonke enika izizwe ilifa, lapho esehlukanisa amadodana kaAdamu, wamisa imingcele yezizwe njengenani labantwana bakoIsrayeli.

⁹Ngoba isabelo se Nkosi ngabantu bayo, uJakobe uyinkatho yelifa layo.

¹⁰Wamfica elizweni eliyinkangala, lenkangala engelalutho ebhongayo. Wamkhokhela wambhodisa, wamlondoloza, wamgcina njengenhlamvu yelihlo lakhe.

¹¹Njengokhozi olunyakazisa isidleke salo, lundiza phezu kwamatsiyane alo, luselula impiko zalo, luwathatha, luwathwale ngezimpaphe zalo,

¹²I Nkosi yodwa yamkhokhela, njalo kwakungekho layo unkulunkulu wabezizwe.

¹³Yamgadisa endaweni eziphakemeyo zomhlaba, ukuze adle izithelo zensimu. Yamondla ngoluju oluvela edwaleni, lamafutha aphuma elitsheni elilukhuni ledwala,

¹⁴izankefu zenkomo, lochago lwembuzi, kanye lamafutha amawundlu, lezinqama izifuyo zeBashani, lezimpongo, kanye lamahwahwa ezinso zengqoloyi; wena wasunatha igazi lezithelo zesivini, iwayini.

¹⁵Kodwa uJeshuruni wazimuka wakhaba. Usuzimukile, wakhuluphala, wembeswa ngamahwahwa. Yena wadela uNkulunkulu owamenzayo, wadelela iDwala losindiso lwakhe.

¹⁶Bambangela ubukhwele ngokwezizwe, bamthukuthelisa ngezinengiso.

¹⁷Bahlabela amadimoni, hatshi uNkulunkulu, onkulunkulu ababengabazi, abatsha abavela eduze, oyihlo abangabesabanga.

¹⁸IDwala elakuzalayo ulikhohliwe, wamkhohlwa uNkulunkulu owakuzalayo.

¹⁹Kwathi i Nkosi ikubona, yanengwa yibo, ngenxa yentukuthelo yamadodana ayo lamadodakazi ayo.

²⁰Yasisithi: Ngizabafihlela ubuso bami, ngibone ukuthi ukuphela kwabo kuzakuba yini; ngoba bayisizukulwana esiphambeneyo, abantwana okungelakuthembeka kibo.

²¹Bona bangenze ngaba lobukhwele ngokungesuye uNkulunkulu; bangithukuthelisile ngezinto zabo eziyize. Ngakho ngizabenza babe lobukhwele ngabangeyisibo abantu; ngibathukuthelise ngesizwe esiyisithutha.

²²Ngoba umlilo usubasiwe entukuthelweni yami, uyavutha kuze kube sesihogweni esingaphansi kakhulu; uzaqeda umhlaba lezithelo zawo, ulumathise izisekelo zezintaba.

²³Ngizabuthelela ububi phezu kwabo, ngiqedele imitshoko yami kubo.

²⁴Bazamunywa yindlala, baqedwe yikutshisa lencithakalo ebabayo; njalo ngizathumela phakathi kwabo amazinyo ezilo, lobuhlungu bezihuquzelayo zothuli.

²⁵Ngaphandle inkemba izabenza bafelwe, ngokunjalo uvalo ezindlini ezingaphakathi, ijaha lalo lentombi emsulwa, omunyayo kanye lendoda eyimpunga.

²⁶Ngathi: Ngizabaquma iziqa, ngenze ukukhunjulwa kwabo kuphele phakathi kwabantu;

²⁷uba bengingesabi intukuthelo yesitha, hlezi abazondi babo bahlanekele, hlezi bathi: Isandla sethu siphakeme; le Nkosi kakusiyo eyenze konke lokhu.

²⁸Ngoba bayisizwe esingelakwelulekwa, njalo kakukho ukuqedisisa kubo.

²⁹Kwangathi ngabe bebehlakaniphile, bebengaqedisisa lokhu, bazwisise isiphetho sabo !

³⁰Oyedwa angaxotsha njani abayinkulungwane, lababili babalekise abayizinkulungwane ezilitshumi, ngaphandle kokuthi iDwala labo libathengisile, le Nkosi ibanikele?

³¹Ngoba idwala labo kalinjengeDwala lethu; njengoba izitha zethu zingabahluleli.

³²Ngoba ivini labo livela evinini leSodoma, lemasimini eGomora; izithelo zesivini sabo ziyizithelo zesivini ezilobuhlungu; zilamahlukuzo ababayo.

³³Iwayini labo liyibuhlungu bemigobho, lobuhlungu obulesihluku bamabululu.

³⁴Lokho kakubekiwe kimi yini, kunanyekiwe emagugwini ami?

³⁵Ngeyami impindiselo lokubuyisela, ngesikhathi sokutshelela konyawo lwabo; ngoba usuku lwengozi yabo selusondele, lezinto abazilungiselweyo ziyaphangisa.

³⁶Ngoba i Nkosi izabahlulela abantu bayo, izisole ngenceku zayo, lapho ibona ukuthi amandla asehambile, lokuthi kakho ovalelweyo lokhululekileyo.

³⁷Khona izakuthi: Bangaphi onkulunkulu babo, idwala ababephephela kulo,

³⁸abadla amafutha emihlatshelo yabo, banatha iwayini lomnikelo wabo wokuthululwa? Kabavuke, balisize, babe yisivikelo senu.

³⁹Bonani khathesi ukuthi mina, nginguye, njalo kakho unkulunkulu olami; mina ngiyabulala, njalo ngiphilise; ngiyatshaya, njalo mina ngelaphe; njalo kakho ongahluthuna esandleni sami.

⁴⁰Ngoba ngiphakamisela isandla sami emazulwini, ngithi: Ngiyaphila kuze kube phakade,

⁴¹nxa ngilola inkemba yami ephazimayo, lesandla sami sibambelela ekwahluleleni, ngizabuyisela impindiselo ezitheni zami, ngibavuze abangizondayo.

⁴²Ngizadakisa imitshoko yami ngegazi, lenkemba yami izakudla inyama, ngegazi labagwaziweyo labathunjiweyo, ngekhanda labakhokheli bezitha.

⁴³Thokozani zizwe, bantu bayo; ngoba izaphindisela igazi lenceku zayo, ibuyisele impindiselo kuzitha zayo, yenzele ilizwe layo, abantu bayo, ukubuyisana.

⁴⁴UMozisi wasesiza, wakhuluma wonke amazwi alingoma endlebeni zabantu, yena loHoseya indodana kaNuni.

⁴⁵UMozisi eseqedile ukukhuluma wonke lamazwi kuIsrayeli wonke,

⁴⁶wathi kubo: Bekani inhliziyo yenu kuwo wonke amazwi engiwafakaza phakathi kwenu lamuhla, ukuthi libalaye abantwana benu bagcine ukuwenza wonke amazwi alumlayo.

⁴⁷Ngoba kakusiyo into eyize kini, ngoba kuyimpilo yenu; ngalinto lizakwelula izinsuku elizweni elichapha iJordani ukuya kulo ukudla ilifa lalo.

⁴⁸I Nkosi yasikhuluma kuMozisi ngalona lolosuku isithi:

⁴⁹Yenyukela kule intaba yeAbarimi, intaba yeNebo, eselizweni lakoMowabi emaqondana leJeriko, ubone ilizwe leKhanani engilinika abantwana bakoIsrayeli ukuba yilifa,

⁵⁰ufele entabeni owenyukela kuyo, ubuthelwe ebantwini bakini, njengoAroni umnewenu efela entabeni yeHori, wabuthelwa ebantwini bakibo.

⁵¹Ngenxa yokuthi laphambana lami phakathi kwabantwana bakoIsrayeli emanzini eMeriba-Kadeshi enkangala yeZini; ngoba kalingingcwelisanga phakathi kwabantwana bakoIsrayeli.

⁵²Ngoba unganeno uzalibona ilizwe, kodwa kawuyikungena khona, elizweni engilinika abantwana bakoIsrayeli.