Read Ndebele-IBhayibhili Elingcwele 2006 Uduteronomi 5 Bible Online

Uduteronomi 5 - Ndebele-IBhayibhili Elingcwele 2006 bible

Uduteronomi 5

¹UMozisi wasebiza uIsrayeli wonke, wathi kubo: Zwana, Israyeli, izimiso lezahlulelo engizikhuluma endlebeni zenu lamuhla, ukuze lizifunde, ligcine ukuzenza.

²I Nkosi uNkulunkulu wethu yenza isivumelwano lathi eHorebe.

³I Nkosi kayisenzanga lesisivumelwano labobaba, kodwa lathi, thina sonke esilapha siphila lamuhla.

⁴I Nkosi yakhuluma lani ubuso lobuso entabeni, iphakathi komlilo,

⁵(ngema phakathi kwe Nkosi lani ngalesosikhathi, ukulazisa ilizwi le Nkosi; ngoba lesaba ngenxa yomlilo, kalenyukelanga entabeni) isithi:

⁶Ngiyi Nkosi uNkulunkulu wakho, eyakukhupha elizweni leGibhithe, endlini yobugqili.

⁷Ungabi labanye onkulunkulu phambi kwami.

⁸Ungazenzeli isithombe esibaziweyo, loba yiwuphi umfanekiso wokusemazulwini phezulu loba wokusemhlabeni phansi, loba wokusemanzini ngaphansi komhlaba.

⁹Ungakukhothameli, ungakukhonzi; ngoba mina i Nkosi, uNkulunkulu wakho, nginguNkulunkulu olobukhwele, ngiphindisela ububi baboyise phezu kwabantwana, kuze kube se sizukulwane ni sesithathu lesesine sabangizondayo,

¹⁰njalo ngibenzela umusa abayizinkulungwane zabangithandayo lezabagcina imilayo yami.

¹¹Ungaliphathi ngeze ibizo le Nkosi uNkulunkulu wakho; ngoba i Nkosi kayiyikumyekela engelacala ophatha ibizo layo ngeze.

¹²Gcina usuku lwesabatha, ukulungcwelisa, njengokukulaya kwe Nkosi uNkulunkulu wakho.

¹³Insuku eziyisithupha uzasebenza, uwenze wonke umsebenzi wakho;

¹⁴kodwa usuku lwesikhombisa lulisabatha le Nkosi uNkulunkulu wakho; ungenzi loba yiwuphi umsebenzi ngalo, wena lendodana yakho lendodakazi yakho lenceku yakho lencekukazi yakho lenkabi yakho lobabhemi wakho loba yisiphi sezifuyo zakho, lowemzini wakho ophakathi kwamasango akho, ukuze iphumule inceku yakho lencekukazi yakho, njengawe.

¹⁵Njalo ukhumbule ukuthi wawuyinceku elizweni leGibhithe, lokuthi i Nkosi uNkulunkulu wakho yakukhupha khona ngesandla esilamandla langengalo eyeluliweyo. Ngakho i Nkosi uNkulunkulu wakho yakulaya ukuthi ugcine usuku lwesabatha.

¹⁶Hlonipha uyihlo lonyoko, njengokukulaya kwe Nkosi uNkulunkulu wakho, ukuze insuku zakho zelulwe, lokuthi kukulungele elizweni i Nkosi uNkulunkulu wakho ekunika lona.

¹⁷Ungabulali.

¹⁸Njalo ungafebi.

¹⁹Njalo ungebi.

²⁰Njalo unganiki ubufakazi bamanga ngomakhelwane wakho.

²¹Njalo ungafisi umkamakhelwane wakho; ungahawukeli indlu kamakhelwane wakho, insimu yakhe, lenceku yakhe, lencekukazi yakhe, inkabi yakhe, lobabhemi wakhe, njalo loba yini ekamakhelwane wakho.

²²Amazwi la i Nkosi yawakhuluma ebandleni lenu lonke entabeni, iphakathi komlilo, eyezini, lemnyameni onzima, ngelizwi elikhulu; njalo kayengezelelanga. Yawabhala ezibhebheni ezimbili zamatshe, yanginika zona.

²³Kwasekusithi lilizwa ilizwi livela phakathi komnyama, lentaba ivutha umlilo, lasondela kimi, zonke inhloko zezizwe zenu, labadala benu,

²⁴lathi: Khangela, i Nkosi uNkulunkulu wethu isitshengisile inkazimulo yayo lobukhulu bayo, lelizwi layo silizwile livela phakathi komlilo; lamuhla sibonile ukuthi uNkulunkulu uyakhuluma lomuntu aphile.

²⁵Ngakho-ke sizafelani? Ngoba lumlilo omkhulu uzasiqothula. Uba siphinda silizwa ilizwi le Nkosi uNkulunkulu wethu futhi, sizakufa-ke.

²⁶Ngoba ngubani enyameni yonke owezwa ilizwi likaNkulunkulu ophilayo likhuluma livela phakathi komlilo, njengathi, waphila?

²⁷Sondela wena, uzwe konke i Nkosi uNkulunkulu wethu ezakutsho, usitshele wena konke i Nkosi uNkulunkulu wethu ezakutsho kuwe, sizakuzwa, sikwenze.

²⁸I Nkosi yasisizwa ilizwi lamazwi enu ekukhulumeni kwenu kimi; i Nkosi yasisithi kimi: Ngizwile ilizwi lamazwi alababantu abawakhulume kuwe; kulungile konke abakukhulumileyo.

²⁹O kungathi bangaba lenhliziyo enjalo yokungesaba, bagcine yonke imilayo yami, insuku zonke, ukuze kubalungele labantwana babo kuze kube nininini !

³⁰Hamba uthi kibo: Zibuyeleleni emathenteni enu.

³¹Kodwa wena, mana lapha phansi kwami, ke ngikhulume kuwe yonke imilayo lezimiso lezahlulelo ozabafundisa zona, ukuze bazenze elizweni engibanika lona ukuthi badle ilifa lalo.

³²Ngakho qaphelani ukuthi lenze njengokulilaya kwe Nkosi uNkulunkulu wenu; lingaphambukeli ngakwesokunene langakwesokhohlo.

³³Lizahamba endleleni yonke i Nkosi uNkulunkulu wenu elilaye yona, ukuze liphile, njalo kulilungele, libe seliselula izinsuku elizweni elizakudla ilifa lalo.