Read Ndebele-IBhayibhili Elingcwele 2006 Uduteronomi 6 Bible Online

Uduteronomi 6 - Ndebele-IBhayibhili Elingcwele 2006 bible

Uduteronomi 6

¹Lale yimilayo, izimiso, lezahlulelo i Nkosi uNkulunkulu wenu elaya ukulifundisa, ukuthi lizenze elizweni elichaphela kulo ukuthi lidle ilifa lalo,

²ukuze uyesabe i Nkosi uNkulunkulu wakho, ukugcina zonke izimiso zayo lemithetho yayo engikulaya yona, wena lendodana yakho lendodana yendodana yakho, zonke izinsuku zempilo yakho, ukuze insuku zakho zelulwe.

³Ngakho zwana, Israyeli, unanzelele ukuzenza, ukuze kukulungele, ukuze wande kakhulu, njengokutsho kwe Nkosi uNkulunkulu waboyihlo kuwe, elizweni eligeleza uchago loluju.

⁴Zwana, Israyeli, i Nkosi uNkulunkulu wethu, yi Nkosi yinye.

⁵Njalo wothanda i Nkosi uNkulunkulu wakho ngenhliziyo yakho yonke langomphefumulo wakho wonke langamandla akho wonke.

⁶Njalo amazwi la engikulaya ngawo lamuhla azakuba senhliziyweni yakho;

⁷njalo uzawafundisa abantwana bakho ngokukhuthala, uzakhuluma ngawo lapho uhlezi endlini yakho, lalapho uhamba endleleni, lalapho ulala, lalapho uvuka.

⁸Uzawabophela esandleni sakho abe luphawu, njalo abe ngamafilakteriyu* phakathi laphakathi kwamehlo akho.

⁹Njalo uzawabhala emigubazini yendlu yakho, lemasangweni akho.

¹⁰Kuzakuthi lapho i Nkosi uNkulunkulu wakho ikungenisa elizweni eyafunga kuboyihlo, kuAbrahama, kuIsaka lakuJakobe, ukukunika imizi emikhulu lemihle, ongayakhanga,

¹¹lezindlu ezigcwele zonke izinto ezinhle, ongazigcwalisanga, lemithombo eyagejwayo ongayigebhanga, izivini lezihlahla zemihlwathi ongazihlanyelanga, lapho udlile wasutha,

¹²ziqaphele, hlezi uyikhohlwe i Nkosi eyakukhupha elizweni leGibhithe, endlini yobugqili.

¹³Uzayesaba i Nkosi uNkulunkulu wakho, uyikhonze, ufunge ngebizo layo.

¹⁴Lingalandeli abanye onkulunkulu, babonkulunkulu bezizwe ezilizungelezeleyo.

¹⁵Ngoba i Nkosi uNkulunkulu wakho inguNkulunkulu olobukhwele phakathi kwakho, hlezi ulaka lwe Nkosi uNkulunkulu wakho lukuvuthele, ikuchithe usuke ebusweni bomhlaba.

¹⁶Lingayilingi i Nkosi uNkulunkulu wenu njengalokhu layilinga eMasa.

¹⁷Ligcine lokugcina imilayo ye Nkosi uNkulunkulu wenu, lobufakazi bayo, lezimiso zayo, ekulaye zona.

¹⁸Njalo wenze okuqondileyo lokulungileyo emehlweni e Nkosi, ukuze kukulungele, lokuthi ungene udle ilifa lelizwe elihle, i Nkosi eyalifungela oyihlo,

¹⁹ukuxotsha zonke izitha zakho phambi kwakho, njengalokhu i Nkosi ikhulumile.

²⁰Lapho indodana yakho ikubuza esikhathini esizayo isithi: Buyini ubufakazi lezimiso lezahlulelo i Nkosi uNkulunkulu wethu elilaye zona?

²¹Khona uzakuthi endodaneni yakho: Sasiyizigqili zikaFaro eGibhithe, le Nkosi yasikhupha eGibhithe ngesandla esilamandla.

²²Njalo i Nkosi yenza izibonakaliso lezimangaliso ezinkulu lezimbi eGibhithe, phezu kukaFaro laphezu kwendlu yakhe yonke, phambi kwamehlo ethu.

²³Yasikhupha khona ukuze isingenise, ukusinika ilizwe eyalifungela obaba.

²⁴I Nkosi yasisilaya ukwenza zonke lezizimiso, ukwesaba i Nkosi uNkulunkulu wethu, ukuze kusilungele insuku zonke, ukusilondoloza siphila njengalamuhla.

²⁵Kuzakuba yikulunga kithi, uba sinanzelela ukwenza limilayo yonke phambi kwe Nkosi uNkulunkulu wethu, njengokusilaya kwayo.