Read Ndebele-IBhayibhili Elingcwele 2006 Uduteronomi 9 Bible Online

Uduteronomi 9 - Ndebele-IBhayibhili Elingcwele 2006 bible

Uduteronomi 9

¹Zwana, Israyeli; uzachapha iJordani lamuhla, ukungenela ukudla ilifa lezizwe ezinkulu lezilamandla kulawe, imizi emikhulu ebiyelwe ngemithangala efika emazulwini.

²Abantu abakhulu labade, abantwana bamaAnaki wena obaziyo, wena osuzwile ngabo kuthiwa: Ngubani ongema phambi kwabantwana bakaAnaki?

³Ngakho yazi lamuhla ukuthi yi Nkosi uNkulunkulu wakho echapha phambi kwakho, engumlilo oqothulayo; yona izabachitha, njalo yona izabehlisela phansi phambi kwakho; njalo lizabaxotsha basuke elifeni labo, libabhubhise masinyane, njengokutsho kwe Nkosi kuwe.

⁴Ungakhulumi enhliziyweni yakho, lapho i Nkosi uNkulunkulu wakho isibaxotshile phambi kwakho, usithi: Ngenxa yokulunga kwami i Nkosi ingingenise ukudla ilifa lelizwe leli. Kodwa ngenxa yobubi balezizizwe i Nkosi izixotsha zisuke elifeni lazo phambi kwakho.

⁵Kakungenxa yokulunga kwakho kumbe ngenxa yobuqotho benhliziyo yakho ukuthi ungene ukudla ilifa lelizwe lazo; kodwa ngenxa yobubi balezizizwe i Nkosi uNkulunkulu wakho izixotsha zisuke elifeni lazo phambi kwakho, lokuthi iqinise ilizwi i Nkosi eyalifungela oyihlo, uAbrahama, uIsaka loJakobe.

⁶Yazi-ke ukuthi kakungenxa yokulunga kwakho ukuthi i Nkosi uNkulunkulu wakho ikunika lelilizwe elihle ukuthi udle ilifa lalo; ngoba uyisizwe esilentamo elukhuni.

⁷Khumbula, ungakhohlwa, ukuthi wayithukuthelisa i Nkosi uNkulunkulu wakho enkangala; kusukela esukwini owaphuma ngalo elizweni leGibhithe laze lafika kulindawo, beliyivukela i Nkosi.

⁸LeHorebe layithukuthelisa i Nkosi, yaze yalithukuthelela i Nkosi ukulichitha.

⁹Sengenyukele entabeni ukwemukela izibhebhe zamatshe, izibhebhe zesivumelwano i Nkosi eyasenza lani, ngasengihlala entabeni insuku ezingamatshumi amane lobusuku obungamatshumi amane, angidlanga sinkwa, anginathanga manzi.

¹⁰I Nkosi yasinginika lezozibhebhe ezimbili zamatshe zilotshwe ngomunwe kaNkulunkulu, laphezu kwazo kulotshiwe ngokwamazwi wonke i Nkosi eyayiwakhulume lani entabeni, iphakathi komlilo ngosuku lokuhlangana.

¹¹Kwasekusithi ekupheleni kwensuku ezingamatshumi amane lobusuku obungamatshumi amane, i Nkosi yangipha izibhebhe ezimbili zamatshe, izibhebhe zesivumelwano.

¹²I Nkosi yasisithi kimi: Sukuma wehle ngokuphangisa usuke lapha, ngoba abantu bakho owabakhupha eGibhithe bonakalisile, baphambukile ngokuphangisa endleleni engabalaya yona, bazenzela isithombe esibunjwe ngokuncibilikisa.

¹³I Nkosi yasikhuluma kimi isithi: Ngibabonile lababantu, khangela-ke, bangabantu abantamo zilukhuni.

¹⁴Ngiyekela ukuze ngibabhubhise, ngesule ibizo labo lisuke ngaphansi kwamazulu; njalo ngizakwenza ube yisizwe esilamandla lesikhulu kulabo.

¹⁵Ngasengiphenduka ngisehla entabeni, lentaba yayivutha umlilo; lezibhebhe zombili zesivumelwano zazisezandleni zami zombili.

¹⁶Ngasengibona, khangelani-ke, lalonile e Nkosi ni uNkulunkulu wenu, lalizenzele ithole elibunjwe ngokuncibilikisa, laliphambukile ngokuphangisa endleleni i Nkosi eyayiyilayile.

¹⁷Ngasengibamba izibhebhe zombili, ngazilahla ezandleni zami zombili, ngazibulala phambi kwamehlo enu.

¹⁸Ngasengiziwisela phansi phambi kwe Nkosi njengakuqala, insuku ezingamatshumi amane lobusuku obungamatshumi amane, ngingadli sinkwa, nginganathi manzi, ngenxa yaso sonke isono senu elisonileyo, lisenza okubi emehlweni e Nkosi, liyithukuthelisa.

¹⁹Ngoba ngangisesaba ukuthukuthela lolaka i Nkosi eyayilithukuthelela ngakho ukulibhubhisa; kodwa i Nkosi yangizwa langalesosikhathi.

²⁰I Nkosi yasimthukuthelela kakhulu uAroni ukuze imbhubhise; kodwa ngamkhulekela loAroni ngalesosikhathi.

²¹Ngasengithatha isono senu, ithole elalilenzile, ngalitshisa ngomlilo, ngalichoboza, ngalicholisisa laze laba lincinyane njengothuli; ngaphosa uthuli lwalo esifuleni esasisehla entabeni.

²²LeTabera, leMasa, leKiribothi-Hathava laliyithukuthelisa i Nkosi.

²³Lalapho i Nkosi yalithuma lisuka eKadeshi-Bhaneya isithi: Yenyukani, lidle ilifa lelizwe engilinike lona, laselihlamukela umlayo we Nkosi uNkulunkulu wenu, kaliyikholwanga, kalilalelanga ilizwi layo.

²⁴Lalivele liyivukele i Nkosi kusukela esukwini engalazi ngalo.

²⁵Ngasengiziwisela phansi phambi kwe Nkosi insuku ezingamatshumi amane lobusuku obungamatshumi amane, engaziwisela phansi ngazo, ngoba i Nkosi yayithe izalichitha.

²⁶Ngasengikhuleka e Nkosi ni ngathi: Nkosi Jehova, ungabachithi abantu bakho lelifa lakho, obahlenge ngobukhulu bakho, owabakhupha eGibhithe ngesandla esilamandla.

²⁷Khumbula inceku zakho, uAbrahama, uIsaka, loJakobe; ungakhangeli inkani yalababantu lobubi babo lesono sabo,

²⁸hlezi ilizwe owasikhupha kilo lithi: Ngenxa yokuthi i Nkosi yayingelamandla okubangenisa elizweni eyakhuluma ngalo kubo, langenxa yokuthi ibazonda, yabakhupha ukuze ibabulalele enkangala.

²⁹Kube kanti bangabantu bakho lelifa lakho, owabakhupha ngamandla akho amakhulu langengalo yakho eyeluliweyo.