Read Ndebele-IBhayibhili Elingcwele 2006 Ujwanisi 1 Bible Online

Ujwanisi 1 - Ndebele-IBhayibhili Elingcwele 2006 bible

Ujwanisi 1

¹Ekuqaleni wayekhona uLizwi, njalo uLizwi wayeloNkulunkulu, njalo uLizwi wayenguNkulunkulu.

²Yena lo wayeloNkulunkulu ekuqaleni.

³Zonke izinto zenziwa ngaye, njalo ngaphandle kwakhe kakulalutho lolulodwa olwenziwayo lolo olwenziweyo.

⁴Impilo yayikuye, njalo impilo yayiyikukhanya kwabantu,

⁵lokukhanya kukhanya emnyameni, kodwa ubumnyama kabukwemukelanga.

⁶Kwavela umuntu ethunywe nguNkulunkulu, obizo lakhe linguJohane;

⁷yena lo wezela ubufakazi, ukuze afakaze ngokukhanya, ukuze bonke bakholwe ngaye.

⁸Yena wayengayisikho ukukhanya, kodwa ukuze afakaze ngokukhanya.

⁹Kwakuyikukhanya okuqotho, okukhanyisa wonke umuntu oza emhlabeni.

¹⁰Wayekhona emhlabeni, njalo umhlaba wenziwa ngaye, kodwa umhlaba kawumazanga.

¹¹Weza kokwakhe, kodwa abakhe kabamemukelanga.

¹²Kodwa bonke abamemukelayo, wabapha amandla okuthi babe ngabantwana bakaNkulunkulu, labo abakholwa ebizweni lakhe;

¹³abazalwa kungeyisikho ngegazi, langentando yenyama, langentando yendoda, kodwa nguNkulunkulu.

¹⁴ULizwi wasesiba yinyama, wahlala phakathi kwethu, njalo sabona inkazimulo yakhe, inkazimulo injengeyozelwe yedwa kaYise, egcwele umusa leqiniso.

¹⁵UJohane wafakaza ngaye, wamemeza wathi: Nguye lo ebengisitsho ngaye ukuthi: Lowo ozayo emva kwami uphambi kwami; ngoba wayekhona kuqala kulami.

¹⁶Lekugcwaleni kwakhe thina semukele sonke, futhi umusa ngomusa;

¹⁷ngoba umlayo wanikwa ngoMozisi, umusa leqiniso kweza ngoJesu Kristu.

¹⁸Kakho owake wabona uNkulunkulu; iNdodana ezelwe yodwa, esesifubeni sikaYise, yiyo e m vezileyo.

¹⁹Njalo lobu yibufakazi bukaJohane, mhla amaJuda ethuma abapristi lamaLevi bevela eJerusalema ukuze bambuze ukuthi: Wena ungubani?

²⁰Wasevuma, kaphikanga; futhi wavuma wathi: Kangisuye uKristu mina.

²¹Bambuza futhi bathi: Kuyini pho? Wena unguElija yini? Wasesithi: Kangisuye. Wena ungulowomProfethi yini? Wasephendula wathi: Hatshi.

²²Basebesithi kuye: Ungubani? Ukuze sibaphe impendulo abasithumileyo; uthini ngawe?

²³Wathi: Mina ngiyilizwi lomemezayo enkangala: Lungisani indlela yeNkosi, njengoba uIsaya umprofethi watsho.

²⁴Lalabo ababethunyiwe babevela kubaFarisi.

²⁵Basebembuza, bathi kuye: Ubhabhathizelani pho, uba wena ungeyisuye uKristu, loElija, lalowomProfethi?

²⁶UJohane wabaphendula, wathi: Mina ngibhabhathiza ngamanzi; kodwa phakathi kwenu kumi lina elingamaziyo;

²⁷nguye ozayo emva kwami, ophambi kwami, engingafanele mina ukuthukulula umchilo wamanyathela akhe.

²⁸Lezizinto zenzeka eBethabara ngaphetsheya kweJordani, lapho uJohane ayebhabhathiza khona.

²⁹Kusisa uJohane wabona uJesu esiza kuye, wathi: Khangelani iWundlu likaNkulunkulu, elisusa isono somhlaba.

³⁰Nguye lo mina ebengi li tshela ngaye ukuthi: Emva kwami kuza indoda, eyayikhona phambi kwami, ngoba yayikhona kuqala kulami.

³¹Lami bengingamazi; kodwa ukuze abonakaliswe kuIsrayeli, ngalokho mina ngizile ngibhabhathiza ngamanzi.

³²UJohane wasefakaza, esithi: Ngibonile uMoya esehla ezulwini njengejuba, wahlala phezu kwakhe.

³³Lami bengingamazi; kodwa owangithumayo ukubhabhathiza ngamanzi, yena wathi kimi: Lowo ozabona uMoya esehlela phezu kwakhe ahlale kuye, nguye obhabhathiza ngoMoya oNgcwele.

³⁴Mina ngibonile, ngafakaza ukuthi lo uyiNdodana kaNkulunkulu.

³⁵Kusisa futhi uJohane wayemi, lababili kubafundi bakhe;

³⁶wasekhangela uJesu ehambahamba, wathi: Khangelani iWundlu likaNkulunkulu.

³⁷Abafundi ababili bamuzwa ekhuluma, basebemlandela uJesu.

³⁸Kwathi uJesu enyemukula ebabona belandela, wathi kibo: Lidingani? Basebesithi kuye: Rabi*, (okuyikuthi ngokuphendulelwa, Mfundisi) uhlala ngaphi?

³⁹Wathi kibo: Wozani libone. Beza babona lapho ayehlala khona; bahlala laye ngalolosuku; kwakungaba lihola letshumi*.

⁴⁰UAndreya umfowabo kaSimoni Petro wayengomunye wababili ababe ku zwe ngoJohane bamlandela.

⁴¹Yena wathola kuqala umfowabo uqobo uSimoni, wathi kuye: Simtholile uMesiya, okuphendulelwa ngokuthi, uKristu.

⁴²Wasemletha kuJesu. UJesu esemkhangele wathi: Wena unguSimoni indodana kaJona; uzathiwa nguKefasi, okuphendulelwa ngokuthi uPetro.

⁴³Kusisa uJesu wayefuna ukusuka aye eGalili, wathola uFiliphu, wathi kuye: Ngilandela.

⁴⁴UFiliphu-ke wayengoweBethisayida, emzini wakibo kaAndreya loPetro.

⁴⁵UFiliphu wathola uNathaniyeli, wathi kuye: Simtholile lowo abhala ngaye uMozisi emlayweni labaprofethi, uJesu weNazaretha, indodana kaJosefa.

⁴⁶UNathaniyeli wasesithi kuye: Kambe kungavela okuhle eNazaretha? UFiliphu wathi kuye: Woza ubone.

⁴⁷UJesu wabona uNathaniyeli esiza kuye, wathi ngaye: Khangelani umIsrayeli uqobo, okungekho nkohliso kuye.

⁴⁸UNathaniyeli wathi kuye: Ungazela ngaphi? UJesu waphendula wathi kuye: UFiliphu engakakubizi, ungaphansi komkhiwa, ngakubona.

⁴⁹UNathaniyeli waphendula wathi kuye: Rabi, wena uyiNdodana kaNkulunkulu, wena uyiNkosi kaIsrayeli.

⁵⁰UJesu waphendula wathi kuye: Uyakholwa ngoba ngithe kuwe, bengikubona ungaphansi komkhiwa. Uzabona izinto ezinkulu kulalezi.

⁵¹Wasesithi kuye: Ngiqinisile, ngiqinisile, ngithi kini: Kusukela khathesi lizabona izulu livulekile, lengilosi zikaNkulunkulu zisenyuka zisehla phezu kweNdodana yomuntu.