Read Ndebele-IBhayibhili Elingcwele 2006 Ujwanisi 10 Bible Online

Ujwanisi 10 - Ndebele-IBhayibhili Elingcwele 2006 bible

Ujwanisi 10

¹Ngiqinisile, ngiqinisile, ngithi kini: Ongangeni ngesango esibayeni sezimvu, kodwa akhwele kwenye indawo, lowo ulisela lomphangi;

²kodwa ongena ngesango ungumelusi wezimvu.

³Umlindi wesango uyamvulela, lezimvu ziyalizwa ilizwi lakhe, njalo uyazibiza ezakhe izimvu ngamabizo, azikhokhelele phandle.

⁴Nxa esezikhuphile ezakhe izimvu, uhamba phambi kwazo; lezimvu zimlandele, ngoba ziyalazi ilizwi lakhe.

⁵Kodwa owemzini kazisoze zimlandele, kodwa zizambalekela; ngoba kazilazi ilizwi labemzini.

⁶UJesu wakhuluma lumfanekiso kubo; kodwa bona kabaqedisisanga ukuthi ziyini izinto azitshoyo kubo.

⁷Ngakho uJesu waphinda wathi kubo: Ngiqinisile, ngiqinisile, ngithi kini: Mina ngilisango lezimvu;

⁸bonke abake bafika phambi kwami bangamasela labaphangi; kodwa izimvu kazibezwanga.

⁹Mina ngilisango; uba umuntu engena ngami, uzasindiswa, angene aphume, athole idlelo.

¹⁰Isela kalizi ngaphandle kokuzakweba lokubulala lokubhubhisa; mina ngizile ukuze babe lempilo, babe layo iphuphume.

¹¹Mina ngingumelusi olungileyo. Umelusi olungileyo uzibekela phansi izimvu impilo yakhe.

¹²Kodwa oqatshiweyo, engesuye umelusi, izimvu zingesizo ezakhe, ubona impisi isiza, atshiye izimvu, abaleke; kuthi impisi izibambe, izichithachithe izimvu.

¹³Oqatshiweyo uyabaleka-ke, ngoba engoqatshiweyo, njalo engazikhathaleli izimvu.

¹⁴Mina ngingumelusi olungileyo, ngiyazazi ezami, ngiyaziwa ngezami,

¹⁵njengalokhu uBaba engazi, lami ngiyamazi uBaba; ngizibekela phansi izimvu impilo yami.

¹⁶Njalo ngilezinye izimvu, ezingesizo zalesisibaya; lazo ngifanele ukuziletha, njalo zizakuzwa ilizwi lami; njalo kube mhlambi munye, melusi munye.

¹⁷Ngenxa yalokhu uBaba uyangithanda, ngoba mina ngibeka phansi impilo yami, ukuze ngibuye ngiyithathe.

¹⁸Kakho ongemuka yona, kodwa mina ngiyibeka phansi ngokwami. Ngilamandla okuyibeka phansi, njalo ngilamandla okubuya ngiyithathe. Lumlayo ngiwemukele kuBaba.

¹⁹Ngakho kwaba khona futhi ukwehlukana phakathi kwamaJuda ngenxa yalamazwi.

²⁰Labanengi bawo bathi: Uledimoni futhi uyahlanya; limlalelelani?

²¹Amanye athi: Lamazwi kawasiwo wongenwe lidimoni; kambe idimoni lingavula amehlo eziphofu yini?

²²Kwakukhona umkhosi wokuvuselela eJerusalema, kwakusebusika;

²³uJesu wasehambahamba ethempelini ekhulusini likaSolomoni.

²⁴AmaJuda asemhanqa, athi kuye: Koze kube nini usilibazisa? Uba wena unguKristu, sitshele ngokucacileyo.

²⁵UJesu wawaphendula wathi: Ngalitshela, kodwa kalikholwanga; imisebenzi mina engiyenza ebizweni likaBaba, yiyo engifakazelayo;

²⁶kodwa lina kalikholwa; ngoba kalisibo abezimvu zami, njengokutsho kwami kini.

²⁷Izimvu zami ziyalizwa ilizwi lami, lami ngiyazazi, futhi ziyangilandela;

²⁸njalo mina ngizinika impilo elaphakade; futhi kazisoze zabhubha laphakade, njalo kungekho ozazihluthuna esandleni sami.

²⁹UBaba o zi nike mina, mkhulu kulabo bonke; kungekho njalo ongazihluthuna esandleni sikaBaba.

³⁰Mina loBaba simunye.

³¹Ngakho amaJuda aphinda athatha amatshe ukuze amkhande ngawo.

³²UJesu wawaphendula wathi: Ngilitshengise imisebenzi eminengi emihle evela kuBaba; yiwuphi umsebenzi kuyo elingikhandela wona ngamatshe?

³³AmaJuda amphendula athi: Kasikukhandi ngamatshe ngenxa yomsebenzi omuhle, kodwa ngenxa yenhlamba, langokuthi wena ungumuntu uzenza uNkulunkulu.

³⁴UJesu wawaphendula wathi: Kakulotshiwe yini emlayweni wenu ukuthi: Mina ngathi: Lingonkulunkulu?

³⁵Uba wababiza bona ngokuthi ngonkulunkulu, eleza kubo ilizwi likaNkulunkulu, njalo umbhalo ungephulwe,

³⁶lowo uBaba amehlukanisileyo wamthuma emhlabeni, kanti lina lithi: Uyahlambaza, ngoba ngithe: NgiyiNdodana kaNkulunkulu?

³⁷Uba ngingenzi imisebenzi kaBaba, kalingakholwa kimi.

³⁸Kodwa uba ngi y enza, lanxa lingakholwa kimi, kholwani imisebenzi; ukuze lazi likholwe ukuthi uBaba ukimi, lami ngikuye.

³⁹Ngakho adinga futhi ukumbamba; kodwa waphunyuka esandleni sabo.

⁴⁰Wasebuya wasuka waya ngaphetsheya kweJordani kundawo lapho uJohane ayebhabhathiza khona kuqala; wasehlala khona.

⁴¹Labanengi beza kuye, bathi: UJohane kenzanga sibonakaliso; kodwa konke uJohane akutsho ngalo, kwakuliqiniso.

⁴²Abanengi basebekholwa kuye lapho.