Read Ndebele-IBhayibhili Elingcwele 2006 Ujwanisi 11 Bible Online

Ujwanisi 11 - Ndebele-IBhayibhili Elingcwele 2006 bible

Ujwanisi 11

¹Kwakukhona-ke othile owayegula othiwa nguLazaro weBethani, emzaneni kaMariya loMarta udadewabo.

²Kwakunguye uMariya owagcoba iNkosi ngamagcobo, wesula inyawo zayo ngenwele zakhe, omnewabo uLazaro wayegula.

³Ngakho odadewabo bathumela kuye besithi: Nkosi, khangela lowo omthandayo uyagula.

⁴UJesu esezwile wathi: Lokhu ukugula kakusikho okokufa, kodwa kungokodumo lukaNkulunkulu ukuze iNdodana kaNkulunkulu idunyiswe ngakho.

⁵UJesu wayebathanda-ke oMarta lodadewabo loLazaro.

⁶Ngakho esezwile ukuthi uyagula, wasehlala insuku ezimbili endaweni lapho ayekhona.

⁷Emva kwalokhu wasesithi kubafundi bakhe: Asiphinde siye eJudiya.

⁸Abafundi bathi kuye: Rabi*, amaJuda asanda ukudinga ukukukhanda ngamatshe, njalo uya khona futhi yini?

⁹UJesu waphendula wathi: Kawakho amahola alitshumi lambili emini yini? Nxa umuntu ehamba emini, kakhubeki, ngoba uyabona ukukhanya kwalumhlaba.

¹⁰Kodwa uba umuntu ehamba ebusuku, uyakhubeka, ngoba ukukhanya kakukho kuye.

¹¹Wakhuluma lezizinto, emva kwalokhu wasesithi kubo: Umngane wethu uLazaro uselele; kodwa ngiyahamba ukuze ngimvuse ebuthongweni.

¹²Ngakho abafundi bakhe bathi kuye: Nkosi, uba elele, uzaphila.

¹³Kodwa uJesu wakhuluma ngokufa kwakhe; kodwa bona bacabanga ukuthi wakhuluma ngokuphumula kobuthongo.

¹⁴Ngakho uJesu wasebatshela ngokucacileyo: ULazaro ufile.

¹⁵Njalo ngiyathokoza ngenxa yenu ukuthi bengingekho lapho, ukuze likholwe; kodwa asiye kuye.

¹⁶Ngakho uTomasi, othiwa nguDidimusi, wathi kubafundi kanye laye: Asihambeni lathi, ukuze sife kanye laye.

¹⁷Kwathi esefika uJesu, wamfica eselensuku ezine engcwabeni.

¹⁸LeBethani yayiseduze leJerusalema, okungaba ngamastadiyu* alitshumi lanhlanu ukusuka lapho;

¹⁹labanengi kumaJuda babefikile kuMarta loMariya, ukuze babaduduze ngomnewabo.

²⁰Ngakho uMarta, esezwile ukuthi uJesu uyeza, wayakumhlangabeza; kodwa uMariya wahlala endlini.

²¹UMarta wasesithi kuJesu: Nkosi, aluba ubukhona lapha, umnewethu ngabe kafanga;

²²kodwa lakhathesi ngiyazi ukuthi loba yini ongayicela kuNkulunkulu, uNkulunkulu uzakunika yona.

²³UJesu wathi kuye: Umnewenu uzabuya avuke.

²⁴UMarta wathi kuye: Ngiyazi ukuthi uzabuya avuke ekuvukeni ngosuku lokucina.

²⁵UJesu wathi kuye: Mina ngiyikuvuka lempilo; okholwa kimi, loba esefile, uzaphila;

²⁶njalo wonke ophilayo ekholwa kimi, kasoze afe laphakade. Uyakukholwa lokhu yini?

²⁷Wathi kuye: Yebo, Nkosi; mina ngiyakholwa ukuthi wena unguKristu, iNdodana kaNkulunkulu, obezakuza emhlabeni.

²⁸Esetshilo lokhu uMarta wasuka, wayabiza udadewabo uMariya ensitha, wathi: UMfundisi ulapha uyakubiza.

²⁹Yena-ke esezwile lokhu, wahle wasuka waya kuye.

³⁰Kodwa uJesu wayengakafiki emzaneni, kodwa wayesendaweni lapho uMarta amhlangabeza khona.

³¹Ngakho amaJuda ayesendlini laye emduduza, ebona uMariya ukuthi wasukuma ngokuphangisa ephuma, amlandela, esithi: Uya engcwabeni, ukuze akhale khona.

³²Kwathi uMariya, esefike lapho uJesu akhona, embona, wawela enyaweni zakhe, esithi kuye: Nkosi, ngabe ubukhona lapha, umnewethu ngabe kafanga.

³³Ngakho uJesu wathi embona ekhala, lamaJuda afika laye ekhala, wabubula emoyeni, wazikhathaza,

³⁴wathi: Limbeke ngaphi? Bathi kuye: Nkosi, woza ubone.

³⁵UJesu walila.

³⁶Ngakho amaJuda athi: Khangelani ukuthi ubemthanda njani.

³⁷Kodwa amanye awo athi: Lo, owavula amehlo esiphofu, ubengekwenze yini ukuthi lalo angafi?

³⁸Ngakho uJesu ebubula futhi phakathi kwakhe wafika engcwabeni. Njalo lalilubhalu, lelitshe libekwe phezu kwalo.

³⁹UJesu wathi: Susani ilitshe. UMarta udadewabo wofileyo wathi kuye: Nkosi, usenuka; ngoba u se lensuku ezine.

⁴⁰UJesu wathi kuye: Kangitshongo yini kuwe, ukuthi uba ukholwa, uzabona inkazimulo kaNkulunkulu?

⁴¹Balisusa-ke ilitshe, lapho okwakulele khona ofileyo. UJesu wasephakamisela amehlo akhe phezulu, wathi: Baba, ngiyakubonga ngoba wena ungizwile.

⁴²Kodwa mina bengisazi ukuthi uyangizwa njalonjalo; kodwa ngenxa yexuku elingiphahlileyo ngitshilo lokhu, ukuze bakholwe ukuthi ungithumile.

⁴³Esetshilo lezizinto, wamemeza ngelizwi elikhulu wathi: Lazaro, phuma !

⁴⁴Wasephuma owayefile, ebotshiwe izandla lenyawo ngamalembu, lobuso bakhe bugoqelwe ngelembu. UJesu wathi kubo: Mthukululeni, limyekele ahambe.

⁴⁵Ngakho abanengi kumaJuda, ababeze kuMariya bebona izinto azenzileyo uJesu, bakholwa kuye.

⁴⁶Kodwa abanye babo baya kubaFarisi, babatshela izinto azenzileyo uJesu.

⁴⁷Ngakho abapristi abakhulu labaFarisi baqoqa umphakathi, bathi: Sizakwenzani? Ngoba umuntu lo wenza izibonakaliso ezinengi;

⁴⁸uba simyekele njalo, bonke bazakholwa kuye; amaRoma asezakuza athathe lindawo lesizwe sakithi.

⁴⁹Kodwa omunye wabo, uKayafasi, owayengumpristi omkhulu ngalowomnyaka, wathi kubo: Kalazi lutho lina,

⁵⁰futhi kalinakani ukuthi kusilungele ukuthi umuntu oyedwa afele abantu, lokuthi isizwe sonke singabhubhi.

⁵¹Kodwa kazitsholongo lokhu ngokwakhe, kodwa engumpristi omkhulu ngalowomnyaka, waprofetha ukuthi uJesu uzafela isizwe,

⁵²njalo kungabi yisizwe kuphela, kodwa ukuze abuthele ndawonye labantwana bakaNkulunkulu abahlakazekileyo babe munye.

⁵³Ngakho kusukela kulolosuku benza ndawonye icebo ukuze bambulale.

⁵⁴Ngakho uJesu kabesahamba obala phakathi kwamaJuda, kodwa wasuka lapho waya elizweni eliseduze lenkangala, emzini othiwa yiEfrayimi, wasehlala khona labafundi bakhe.

⁵⁵Laselisondele iphasika lamaJuda; labanengi abavela emaphandleni benyukela eJerusalema lingakafiki iphasika, ukuze bazihlambulule.

⁵⁶Ngakho bamdinga uJesu, bekhulumisana bemi ethempelini besithi: Licabangani? Lithi isibili kayikuza emkhosini yini?

⁵⁷Kodwa bonke abapristi abakhulu labaFarisi babekhuphe umlayo wokuthi uba ekhona owaziyo lapho akhona, akubike ukuze bambambe.