Read Ndebele-IBhayibhili Elingcwele 2006 Ujwanisi 12 Bible Online

Ujwanisi 12 - Ndebele-IBhayibhili Elingcwele 2006 bible

Ujwanisi 12

¹Kwathi kuselensuku eziyisithupha lingakafiki iphasika, uJesu wafika eBethani, lapho okwakuloLazaro khona owayefile, ayemvuse kwabafileyo.

²Basebemenzela ukudla kwantambama lapho, loMarta wayesebenza; njalo uLazaro wayengomunye walabo ababehlezi ekudleni laye.

³UMariya wasethatha iphawundi yamagcobo awenadi* uqobo adulayo, wagcoba inyawo zikaJesu, wesula inyawo zakhe ngenwele zakhe; lendlu yagcwala iphunga lamagcobo.

⁴Ngakho omunye wabafundi bakhe, uJudasi Iskariyothi kaSimoni, owayezamnikela, wathi:

⁵Kungani amafutha la engathengiswanga ngabodenariyo* abangamakhulu amathathu, kwasekunikwa abayanga?

⁶Wakutsho-ke lokhu, kungeyisikho ukuthi ekhathalele abayanga, kodwa ngoba wayelisela, wayelesikhwama, ethwala okwakufakwa phakathi kwaso.

⁷UJesu wasesithi: Myekeleni; uwalondolozele usuku lokungcwatshwa kwami.

⁸Ngoba abayanga lihlala lilabo, kodwa mina kalihlali lilami.

⁹Ngakho ixuku elikhulu lamaJuda lakwazi ukuthi ulapho; laselisiza kungesikuthi ngenxa kaJesu kuphela, kodwa lokuthi babone loLazaro, ayemvuse kwabafileyo.

¹⁰Abapristi abakhulu basebesenza icebo lokuthi babulale loLazaro;

¹¹ngoba ngenxa yakhe amaJuda amanengi asuka, akholwa kuJesu.

¹²Kusisa ixuku elikhulu elalizile emkhosini, lezwa ukuthi uJesu uyeza eJerusalema,

¹³bathatha ingatsha zezihlahla zelala, baphuma uku ya mhlangabeza, bamemeza besithi: Hosana*! Ubusisiwe ozayo ebizweni leNkosi, iNkosi kaIsrayeli.

¹⁴UJesu wasefica ithole likababhemi, wahlala phezu kwalo, njengokulotshiweyo ukuthi:

¹⁵Ungesabi, ndodakazi yeSiyoni; khangela, inkosi yakho iyeza, ihlezi phezu kwethole likababhemi.

¹⁶Kodwa abafundi bakhe kabaqedisisanga lezizinto ekuqaleni; kodwa uJesu esedunyisiwe, basebekhumbula ukuthi lezizinto zazilotshiwe ngaye, lokuthi babezenzile lezizinto kuye.

¹⁷Ngakho ixuku elalilaye lapho ebiza uLazaro ukuthi aphume engcwabeni, emvusa kwabafileyo, lafakaza.

¹⁸Ngenxa yalokhu ixuku laphuma futhi uku ya mhlangabeza, ngoba lezwa ukuthi wenze lesisibonakaliso.

¹⁹Ngakho abaFarisi bakhulumisana besithi: Liyabona ukuthi kalisizi lutho; khangelani umhlaba uyamlandela.

²⁰Kwakukhona amaGriki phakathi kwalabo ababenyukelele ukukhonza emkhosini;

²¹wona-ke eza kuFiliphu oweBethisayida yeGalili, basebemcela besithi: Nkosi, sithanda ukubona uJesu.

²²UFiliphu weza watshela uAndreya; uAndreya loFiliphu basebetshela uJesu futhi.

²³UJesu wasebaphendula esithi: Ihola selifikile lokuthi iNdodana yomuntu idunyiswe.

²⁴Ngiqinisile, ngiqinisile, ngithi kini: Ngaphandle kokuthi uhlamvu lwebele luwele emhlabathini lufe, lona luhlala lulodwa; kodwa aluba lusifa, luthela isithelo sande.

²⁵Yena othanda impilo yakhe uyalahlekelwa yiyo; lozonda impilo yakhe kulumhlaba uzayilondoloza kuze kube yimpilo engulaphakade.

²⁶Uba umuntu engisebenzela, kangilandele; lalapho engikhona mina, lenceku yami izakuba khona. Futhi uba umuntu engisebenzela, uBaba uzamhlonipha.

²⁷Khathesi umphefumulo wami ukhathazekile; sengizathini? Baba, ngisindise kulelihola. Kodwa ngenxa yalokhu ngifikile kulelihola.

²⁸Baba, dumisa ibizo lakho. Kwasekusiza ilizwi livela ezulwini lisithi: Sengi li dumisile, ngizaphinda ngi li dumise.

²⁹Ngakho ixuku elalimi khona lisizwa lathi kube lomdumo. Abanye bathi: Ingilosi ikhulume laye.

³⁰UJesu waphendula wathi: Lelilizwi kalizanga ngenxa yami, kodwa ngenxa yenu.

³¹Khathesi yisigwebo salumhlaba; khathesi umbusi walumhlaba uzaxotshelwa phandle.

³²Mina-ke nxa ngiphakanyiswa emhlabeni, ngizadonsela bonke kimi.

³³Watsho-ke lokhu etshengisa uhlobo lokufa ayezakufa ngalo.

³⁴Ixuku lamphendula lathi: Thina sezwa emlayweni ukuthi uKristu uhlala phakade; njalo ungatsho njani ukuthi: INdodana yomuntu imele ukuphakanyiswa? Ingubani le iNdodana yomuntu?

³⁵UJesu wasesithi kubo: Kuseyisikhatshana ukukhanya lilakho. Hambani liselokukhanya, hlezi umnyama ulehlule; njalo ohamba emnyameni kazi lapho aya khona.

³⁶Liselokukhanya, kholwani kukho ukukhanya, ukuze libe ngabantwana bokukhanya. UJesu wakhuluma lezizinto, wasuka, wabacatshela.

³⁷Lanxa wayenze izibonakaliso ezinengi kangaka phambi kwabo, kabakholwanga kuye;

³⁸ukuze ligcwaliseke ilizwi likaIsaya umprofethi, alikhulumayo elokuthi: Nkosi, ngubani okholwe ukutshumayela kwethu? Lengalo yeNkosi yembulelwa bani?

³⁹Ngakho babengelakho ukukholwa, ngoba uIsaya wabuya wathi:

⁴⁰Uphumputhekisile amehlo abo, wayenza lukhuni inhliziyo yabo; ukuze bangaboni ngamehlo abo, baqedisise ngenhliziyo, baphenduke, besengibasilisa.

⁴¹UIsaya wakhuluma lezizinto, lapho ebona inkazimulo yakhe, wakhuluma ngaye.

⁴²Loba kunjalo-ke labanengi bababusi bakholwa kuye; kodwa ngenxa yabaFarisi kabavumanga, ukuze bangamiswa esinagogeni;

⁴³ngoba bathanda udumo lwabantu kulodumo lukaNkulunkulu.

⁴⁴UJesu wasememeza esithi: Okholwa kimi, kakholwa kimi, kodwa kuye ongithumileyo;

⁴⁵njalo obona mina, ubona ongithumileyo.

⁴⁶Mina ngizile ngiyikukhanya emhlabeni, ukuze wonke okholwa kimi, angahlali emnyameni.

⁴⁷Njalo uba ekhona owezwayo amazwi ami angakholwa, mina kangimgwebi; ngoba kangizanga ukuthi ngigwebe umhlaba, kodwa ukuze ngisindise umhlaba.

⁴⁸Yena ongalayo engawemukeli amazwi ami, ulaye omgwebayo; ilizwi esengilikhulumile, lona lizamgweba ngosuku lokucina.

⁴⁹Ngoba mina kangizikhulumelanga ngokwami; kodwa uBaba ongithumileyo, nguye onginike umlayo, wokuthi ngizathini lokuthi ngizakhulumani.

⁵⁰Njalo ngiyazi ukuthi umlayo wakhe uyimpilo elaphakade; ngakho izinto mina engizikhulumayo, njengokutsho kukaBaba kimi, ngokunjalo ngiyazikhuluma.