Read Ndebele-IBhayibhili Elingcwele 2006 Ujwanisi 14 Bible Online

Ujwanisi 14 - Ndebele-IBhayibhili Elingcwele 2006 bible

Ujwanisi 14

¹Inhliziyo yenu kayingakhathazeki; lina liyakholwa kuNkulunkulu, kholwani lakimi.

²Ekhaya likaBaba kukhona izindlu ezinengi; kodwa uba kwaku ngenjalo, ngabe ngalitshela. Ngiyahamba ukuyalilungisela indawo.

³Njalo nxa ngihamba ngisiyalilungisela indawo, ngizabuya futhi ngilemukele kimi; ukuze kuthi lapho mina engikhona, libe khona lani.

⁴Lalapho mina engiya khona liyakwazi, lendlela liyayazi.

⁵UTomasi wathi kuye: Nkosi, kasikwazi lapho oya khona; pho, singayazi njani indlela?

⁶UJesu wathi kuye: Mina ngiyindlela, leqiniso, lempilo; kakho oza kuBaba, kodwa ngami.

⁷Uba belingazile, belizamazi loBaba; njalo kusukela khathesi liyamazi, selimbonile.

⁸UFiliphu wathi kuye: Nkosi, sitshengise uYihlo, njalo kusanele.

⁹UJesu wathi kuye: Sengilani isikhathi eside kangaka, kawukangazi, Filiphu? Yena obone mina, ubone uBaba; njalo utsho njani ukuthi: Sitshengise uYihlo?

¹⁰Kawukholwa yini ukuthi mina ngikuBaba, loBaba ukimi? Amazwi mina engiwakhuluma kini, kangizikhulumeli ngokwami; kodwa uBaba ohlezi kimi, yena wenza imisebenzi.

¹¹Ngikholwani ukuthi mina ngikuBaba, loBaba ukimi; njalo uba kunge njalo, ngikholwani ngenxa yemisebenzi ngokwayo.

¹²Ngiqinisile, ngiqinisile, ngithi kini: Okholwa kimi, imisebenzi engiyenzayo uzayenza laye, lemikhulu kulale uzayenza; ngoba mina ngiya kuBaba.

¹³Njalo loba yini eliyicelayo ngebizo lami, le ngizayenza, ukuze uYise adunyiswe eNdodaneni.

¹⁴Uba licela loba yini ebizweni lami, mina ngiza y enza.

¹⁵Uba lingithanda, londolozani imilayo yami.

¹⁶Lami ngizacela kuBaba, laye uzalinika omunye uMduduzi, ukuze ahlale lani laphakade,

¹⁷uMoya weqiniso, ongememukele umhlaba, ngoba ungamboni, ungamazi. Kodwa lina liyamazi, ngoba uhlala lani, njalo uzakuba kini.

¹⁸Kangiyikulitshiya lizintandane; ngizakuza kini.

¹⁹Kube kanti okwesikhatshana lomhlaba kawusayikungibona, kodwa lina lizangibona; ngoba mina ngiyaphila, lani lizaphila.

²⁰Ngalolosuku lina lizakwazi ukuthi mina ngikuBaba, lani likimi, lami ngikini.

²¹Olemilayo yami ayilondoloze, nguye ongithandayo; njalo yena ongithandayo, uzathandwa nguBaba; lami ngizamthanda, ngizazibonakalisa kuye.

²²UJudasi, ongesuye uIskariyothi, wathi kuye: Nkosi, kungani uzazibonakalisa kithi, kodwa kungeyisikho kumhlaba?

²³UJesu waphendula wathi kuye: Uba umuntu engithanda, uzalondoloza ilizwi lami, loBaba uzamthanda, njalo sizakuza kuye, sihlale laye.

²⁴Yena ongangithandiyo, kawalondolozi amazwi ami; lelizwi elilizwayo kayisilo elami, kodwa ngelikaBaba ongithumileyo.

²⁵Lezizinto ngizikhulumile kini ngihlezi lani.

²⁶Kodwa uMduduzi, uMoya oyiNgcwele, uBaba azamthuma ebizweni lami, yena uzalifundisa zonke izinto, njalo alikhumbuze konke engakutshoyo kini.

²⁷Ukuthula ngikutshiya kini, ukuthula kwami ngilinika khona; kungeyisikho njengoba umhlaba unika, mina ngiyalinika. Inhliziyo yenu kayingakhathazwa, ingesabi.

²⁸Lizwile ukuthi mina ngithe kini: Ngiyahamba njalo ngizabuya kini. Uba belingithanda, belizathokoza, ngoba ngithe: Ngiya kuBaba; ngoba uBaba mkhulu kulami.

²⁹Njalo khathesi ngilitshelile kungakenzeki; ukuze, lapho sekusenzeka, likholwe.

³⁰Kangisayikukhuluma okunengi lani; ngoba umbusi walumhlaba uyeza, kodwa kalalutho kimi;

³¹kodwa ukuze umhlaba wazi ukuthi ngiyamthanda uBaba, lokuthi njengoba uBaba engilayile, ngenze njalo. Sukumani, sisuke lapha.