Read Ndebele-IBhayibhili Elingcwele 2006 Ujwanisi 2 Bible Online

Ujwanisi 2 - Ndebele-IBhayibhili Elingcwele 2006 bible

Ujwanisi 2

¹Kwathi ngosuku lwesithathu kwaba khona umtshado eKana yeGalili; lonina kaJesu wayekhona lapho;

²njalo uJesu laye wayenxusiwe labafundi bakhe emtshadweni.

³Kwathi iwayini selisweleka, unina kaJesu wathi kuye: Kabalawayini.

⁴UJesu wathi kuye: Mama, ngilani lawe? Ihola lami kalikafiki.

⁵Unina wathi kuzinceku: Yenzani loba yikuphi azalitshela khona.

⁶Kwakukhona lapho imbiza zamanzi ezamatshe zimiswe njengokokuhlambulula kwamaJuda, inye ingena amaphoco amabili kumbe amathathu.

⁷UJesu wathi kuzo: Gcwalisani imbiza zamanzi ngamanzi. Zasezizigcwalisa zathi kliki.

⁸Wasesithi kuzo: Khanini khathesi, lise kumphathi wokudla. Zasezikusa.

⁹Umphathi wokudla esizwa amanzi asebe liwayini, engazi ukuthi livela ngaphi (kodwa inceku ezaziwakhile amanzi zazisazi), umphathi wokudla wabiza umyeni,

¹⁰wasesithi kuye: Wonke umuntu uletha iwayini elimnandi kuqala, kuthi lapho sebenathile kakhulu, abese letha elibi; wena ugcinile iwayini elimnandi kwaze kwaba khathesi.

¹¹Lokho kuyikuqala kwezibonakaliso uJesu akwenza eKana yeGalili wabonakalisa ubukhosi bakhe; labafundi bakhe bakholwa kuye.

¹²Emva kwalokho wehlela eKapenawume, yena, lonina, labafowabo, labafundi bakhe; njalo bahlala khona kungeyisikho okwensuku ezinengi.

¹³Iphasika lamaJuda laselisondele, uJesu wasesenyukela eJerusalema.

¹⁴Wafica ethempelini labo abathengisa inkabi lezimvu lamajuba, labantshintshi bemali behlezi.

¹⁵Esenze isiswepu sezintambo wabaxotsha bonke ethempelini, izimvu kanye lenkabi; wachitha imali yabantshintshisayo, wagenqula amatafula;

¹⁶wasesithi kwabathengisa amajuba: Susani lezizinto lapha; lingayenzi indlu kaBaba indlu yokuthengisela.

¹⁷Abafundi bakhe basebekhumbula ukuthi kulotshiwe ukuthi: Ukutshisekela indlu yakho kungidlile.

¹⁸Ngakho amaJuda aphendula athi kuye: Usitshengisa isibonakaliso bani, sokuthi wenze lezizinto?

¹⁹UJesu waphendula wathi kuwo: Dilizani lelithempeli, njalo ngensuku ezintathu ngizalivusa.

²⁰AmaJuda asesithi: Okweminyaka engamatshumi amane lesithupha lelithempeli lakhiwa, wena-ke uzalivusa ngensuku ezintathu yini?

²¹Kodwa yena wayekhuluma ngethempeli lomzimba wakhe.

²²Ngakho, kwathi esevukile kwabafileyo, abafundi bakhe bakhumbula ukuthi wayekutshilo lokhu kubo; bakholwa umbhalo, lelizwi ayelitshilo uJesu.

²³Njalo kwathi eseJerusalema ngephasika, emkhosini, abanengi bakholwa ebizweni lakhe, bebona izibonakaliso zakhe azenzayo;

²⁴kodwa uJesu ngokwakhe kazinikelanga yena kubo, ngoba yena wayebazi bonke,

²⁵langenxa yokuthi wayengasweli ukuthi loba ngubani afakaze ngomuntu; ngoba yena wayekwazi okusemuntwini.