Read Ndebele-IBhayibhili Elingcwele 2006 Ujwanisi 6 Bible Online

Ujwanisi 6 - Ndebele-IBhayibhili Elingcwele 2006 bible

Ujwanisi 6

¹Emva kwalezizinto uJesu wasuka waya ngaphetsheya kolwandle lweGalili, lweTiberiyasi.

²Laselimlandela ixuku elikhulu, ngoba babebone izibonakaliso zakhe azenza kulabo abagulayo.

³UJesu wasesenyukela entabeni, wahlala phansi khona labafundi bakhe.

⁴Iphasika, umkhosi wamaJuda, laselisondele.

⁵Kwathi uJesu ephakamisa amehlo, wasebona ixuku elikhulu lisiza kuye, wathi kuFiliphu: Sizathenga ngaphi izinkwa, ukuze laba badle?

⁶Njalo watsho lokhu emhlola, ngoba yena wayekwazi azakwenza.

⁷UFiliphu wamphendula wathi: Izinkwa zabodenariyo* abangamakhulu amabili zingebanele, ukuthi wonke ngamunye wabo azuze ingcosana.

⁸Omunye wabafundi bakhe, uAndreya umfowabo kaSimoni Petro, wathi kuye:

⁹Kukhona umfanyana lapha, olezinkwa ezinhlanu zebhali* lenhlanzana ezimbili; kodwa ziyini kwabanengi kangaka?

¹⁰Kodwa uJesu wathi: Hlalisani abantu phansi. Kwakukhona utshani obunengi ku leyo ndawo. Ngakho amadoda ahlala phansi inani lawo lalingaba zinkulungwane ezinhlanu.

¹¹UJesu wasezithatha izinkwa, esebongile wazinika abafundi, labafundi kulabo ababehlezi phansi; ngokunjalo lenhlanzana ngangokufuna kwabo.

¹²Bathi sebesuthi, wathi kubafundi bakhe: Buthani imvuthu eziseleyo, ukuze kungachitheki lutho.

¹³Basebebutha, bagcwalisa izitsha ezilitshumi lambili ngemvuthu zezinkwa ezinhlanu zebhali, ezasalayo kulabo abadlayo.

¹⁴Kwathi lababantu bebona isimangaliso asenzileyo uJesu, bathi: Ngeqiniso lo nguye umProfethi omele ukuza emhlabeni.

¹⁵Kwathi uJesu esazi ukuthi bazakuza bambambe ngamandla, ukumbeka abe yinkosi, wamonyukela futhi entabeni yena eyedwa.

¹⁶Sekuhlwile, abafundi bakhe behlela elwandle,

¹⁷sebengenile emkhunjini, beza ngaphetsheya kolwandle ukuya eKapenawume. Kwasekumnyama, uJesu wayengafikanga kubo.

¹⁸Lwaseluvuka ulwandle ngoba umoya olamandla wawuvunguza.

¹⁹Sebegwedlile amastadiyu* angaba ngamatshumi amabili lanhlanu kumbe amatshumi amathathu, babona uJesu ehamba phezu kolwandle, esondela emkhunjini; basebesethuka.

²⁰Kodwa wathi kubo: Yimi, lingesabi.

²¹Basebevuma ukumemukela emkhunjini; njalo wahle wafika umkhumbi elizweni ababesiya kilo.

²²Kusisa ixuku elalimi ngaphetsheya kolwandle, libona ukuthi kwakungela lamunye umkolo lapho ngaphandle kwalowo ababengene kuwo abafundi bakhe, lokuthi uJesu wayengangenanga emkolweni labafundi bakhe, kodwa abafundi bakhe babehambe bodwa,

²³kodwa imikolo evela eTiberiyasi yafika eduze lendawo lapho ababedle khona isinkwa, emva kokuthi iNkosi isibongile;

²⁴ngakho ixuku selibonile ukuthi uJesu wayengekho lapho loba abafundi bakhe, bangena labo emikhunjini, bafika eKapenawume, bedinga uJesu.

²⁵Bathi sebemtholile ngaphetsheya kolwandle, bathi kuye: Rabi*, ufike nini lapha?

²⁶UJesu wabaphendula wathi: Ngiqinisile, ngiqinisile, ngithi kini: Liyangidinga, kungeyisikho ukuthi labona izibonakaliso, kodwa ngoba ladla izinkwa lasutha.

²⁷Lingasebenz el i ukudla okuphelayo, kodwa ukudla okuhlala kuze kube yimpilo elaphakade, ezalinika khona iNdodana yomuntu; ngoba yena uNkulunkulu uYise umphawulile.

²⁸Basebesithi kuye: Sizakwenzani, ukuze senze imisebenzi kaNkulunkulu?

²⁹UJesu waphendula wathi kubo: Lo ngumsebenzi kaNkulunkulu, ukuze likholwe kulowo yena amthumileyo.

³⁰Ngakho bathi kuye: Pho wena wenza isibonakaliso bani, ukuze sibone sikholwe kuwe? Usebenzani?

³¹Obaba bethu badla imana enkangala, njengokulotshiweyo ukuthi: Wabanika isinkwa esivela ezulwini ukuthi badle.

³²UJesu wasesithi kubo: Ngiqinisile, ngiqinisile, ngithi kini: UMozisi kalinikanga isinkwa esivela ezulwini; kodwa uBaba ulinika isinkwa soqobo esivela ezulwini.

³³Ngoba isinkwa sikaNkulunkulu singuye owehla evela ezulwini esinika impilo emhlabeni.

³⁴Basebesithi kuye: Nkosi, sinike lesosinkwa njalonjalo.

³⁵UJesu wasesithi kubo: Mina ngiyisinkwa sempilo; lowo oza kimi, kasoze alambe; lalowo okholwa kimi, kasoze ome lakanye.

³⁶Kodwa ngithe kini: Lani lingibonile, kodwa kalikholwa.

³⁷Bonke uBaba anginika bona bazakuza kimi; lozayo kimi angisoze ngimxotshele phandle.

³⁸Ngoba ngehlile ezulwini, hatshi ukuthi ngenze intando yami, kodwa intando yalowo ongithumileyo.

³⁹Lalokhu kuyintando kaBaba ongithumileyo, ukuze konke anginike khona, ngingalahlekelwa lutho kikho, kodwa ngikuvuse ngosuku lokucina.

⁴⁰Lalokhu kuyintando yongithumileyo, ukuthi wonke obona iNdodana njalo akholwe kuyo, abe lempilo elaphakade, njalo mina ngizamvusa ngosuku lokucina.

⁴¹Ngalokho amaJuda akhonona ngaye, ngoba wathi: Mina ngiyisinkwa esehla sivela ezulwini.

⁴²Athi-ke: Lo kayisuye yini uJesu indodana kaJosefa, uyise lonina thina esibaziyo? Pho yena utsho njani, ukuthi: Ngehle ngivela ezulwini?

⁴³UJesu wasephendula wathi kuwo: Lingakhononi phakathi kwenu.

⁴⁴Kakho ongeza kimi, ngaphandle kokuthi uBaba ongithumileyo amdonse, njalo mina ngizamvusa ngosuku lokucina.

⁴⁵Kulotshiwe kubaprofethi ukuthi: Njalo bonke bazafundiswa nguNkulunkulu. Ngakho wonke ozwileyo ngoBaba wafunda, uyeza kimi.

⁴⁶Kayisikho ukuthi ukhona obone uBaba, ngaphandle kwakhe ovela kuNkulunkulu, yena umbonile uBaba.

⁴⁷Ngiqinisile, ngiqinisile, ngithi kini: Okholwayo kimi, ulempilo elaphakade.

⁴⁸Mina ngiyisinkwa sempilo.

⁴⁹Oyihlo badla imana enkangala, futhi bafa;

⁵⁰lesi yisinkwa esehla sivela ezulwini, ukuze umuntu adle okwaso angafi.

⁵¹Mina ngiyisinkwa esiphilayo, esehla sivela ezulwini; uba umuntu esidla lesisinkwa, uzaphila ephakadeni. Njalo lesinkwa mina engizasinika, siyinyama yami, mina engizayinikela impilo yomhlaba.

⁵²AmaJuda asephikisana esithi: Lo angasinika njani inyama yakhe siyidle?

⁵³Ngakho uJesu wathi kuwo: Ngiqinisile, ngiqinisile, ngithi kini: Ngaphandle kokuthi lidle inyama yeNdodana yomuntu linathe igazi layo, kalilampilo phakathi kwenu.

⁵⁴Odla inyama yami anathe igazi lami, ulempilo elaphakade, njalo mina ngizamvusa ngosuku lokucina.

⁵⁵Ngoba inyama yami iyikudla oqotho, legazi lami lingokunathwayo oqotho.

⁵⁶Odla inyama yami anathe igazi lami, uhlala kimi, lami kuye.

⁵⁷Njengalokhu uBaba ophilayo engithumile, lami ngiphila ngoBaba; ngakho ongidlayo, laye uzaphila ngami.

⁵⁸Lesi yisinkwa esehla sivela ezulwini; akunjengaboyihlo abadla imana, sebafa; odla lesisinkwa, uzaphila okulaphakade.

⁵⁹Watsho lezizinto esinagogeni efundisa eKapenawume.

⁶⁰Kwathi abanengi kubafundi bakhe besizwa bathi: Lilukhuni lelilizwi; ngubani ongalizwa?

⁶¹Kodwa uJesu esazi phakathi kwakhe ukuthi abafundi bakhe bayasola ngalokhu, wathi kubo: Lokhu kuyalikhuba yini?

⁶²Pho, lizathini uba libona iNdodana yomuntu isenyukela lapho eyayikhona kuqala?

⁶³KunguMoya ophilisayo, inyama kayisizi lutho; amazwi mina engiwakhuluma kini, angumoya njalo ayimpilo.

⁶⁴Kodwa bakhona abanye kini abangakholwayo. Ngoba uJesu wayekwazi kusukela ekuqaleni, ukuthi ngobani abangakholwayo, lokuthi ngubani ozamnikela.

⁶⁵Wasesithi: Kungenxa yalokhu ngithe kini: Kakho ongeza kimi, ngaphandle kokuthi ekunikwe nguBaba.

⁶⁶Kusukela lapho abanengi babafundi bakhe babuyela emuva, kababe besahamba laye.

⁶⁷UJesu wasesithi kwabalitshumi lambili: Lani lithanda ukuzihambela yini?

⁶⁸USimoni Petro wasemphendula wathi: Nkosi, sizakuya kubani? Amazwi empilo elaphakade akuwe,

⁶⁹njalo thina siyakholwa, sesisazi ukuthi wena unguKristu iNdodana kaNkulunkulu ophilayo.

⁷⁰UJesu wabaphendula wathi: Mina kangilikhethanga yini lina abalitshumi lambili, kodwa omunye wenu unguSathane?

⁷¹Wayekhuluma ngoJudasi Iskariyothi kaSimoni; ngoba nguye owayezamnikela, engomunye wabalitshumi lambili.