Read Ndebele-IBhayibhili Elingcwele 2006 Ujwanisi 9 Bible Online

Ujwanisi 9 - Ndebele-IBhayibhili Elingcwele 2006 bible

Ujwanisi 9

¹Wathi esedlula wabona umuntu oyisiphofu kusukela ekuzalweni.

²Abafundi bakhe basebembuza bathi: Rabi*, ngubani owonayo, lo kumbe abazali bakhe, aze azalwe eyisiphofu?

³UJesu waphendula wathi: Konanga lo loba abazali bakhe; kodwa ukuze kubonakaliswe imisebenzi kaNkulunkulu kuye.

⁴Kufanele ngisebenze imisebenzi yongithumileyo kusesemini; ubusuku buyeza, lapho okungekho olakho ukusebenza khona.

⁵Ngisekhona emhlabeni, ngiyikukhanya komhlaba.

⁶Esetshilo lezizinto, wakhafulela emhlabathini, wenza udaka ngamathe, waninda loludaka emehlweni esiphofu,

⁷wasesithi kuso: Hamba uyegeza echibini leSilowama (okuphendulelwa ngokuthi, oThunyiweyo). Ngakho sahamba sageza, sabuya sesibona.

⁸Ngakho abakhelene laso lalabo ababesibonile ngaphambili ukuthi sasiyisiphofu, bathi: Kayisuye yini lo owayehlezi ephanza?

⁹Abanye bathi: Lo nguye; kodwa abanye bathi: Unjengaye. Yena wathi: Ngingu ye.

¹⁰Ngakho bathi kuye: Avulwe njani amehlo akho?

¹¹Yena waphendula wathi: Umuntu othiwa nguJesu wenze udaka, waninda amehlo ami, wathi kimi: Hamba uye echibini leSilowama, ugeze. Njalo ngahamba ngageza, ngemukela ukubona.

¹²Ngakho bathi kuye: Ungaphi yena? Wathi: Kangazi.

¹³Basebemletha kubaFarisi, lowo owayekade eyisiphofu.

¹⁴Njalo kwakulisabatha mhla uJesu esenza udaka, evula amehlo akhe.

¹⁵AbaFarisi labo basebembuza futhi, ukuthi wemukele njani ukubona. Wasesithi kubo: Ufake udaka emehlweni ami, ngasengigeza, sengibona.

¹⁶Ngakho abanye babaFarisi bathi: Lumuntu kaveli kuNkulunkulu, ngoba kagcini isabatha. Abanye bathi: Umuntu oyisoni angazenza njani izibonakaliso ezinje? Kwasekusiba khona ukwehlukana phakathi kwabo.

¹⁷Baphinda bathi kuso isiphofu: Wena uthini ngaye, lokhu evule amehlo akho? Wasesithi: Ungumprofethi.

¹⁸AmaJuda-ke kawakholwanga ngaye, ukuthi wayeyisiphofu usemukele ukubona, aze abiza abazali bakhe osemukele ukubona,

¹⁹asebabuza athi: Lo uyindodana yenu, lina elithi yazalwa iyisiphofu yini? Pho isibona njani khathesi?

²⁰Abazali bakhe bawaphendula bathi: Siyazi ukuthi lo uyindodana yethu, lokuthi wazalwa eyisiphofu;

²¹kodwa ukuthi ubona njani khathesi, kasikwazi; kumbe ngubani ovule amehlo akhe, thina kasikwazi; yena usekhulile; mbuzeni, uzazikhulumela yena.

²²Abazali bakhe batsho lezizinto, ngoba besesaba amaJuda; ngoba amaJuda ayesevumelene ngokuthi, uba loba engubani ovuma ukuthi unguKristu, kakhutshwe esinagogeni.

²³Kungakho abazali bakhe bathi: Usekhulile, mbuzeni.

²⁴Ambiza-ke ngokwesibili lowomuntu owayeyisiphofu, athi kuye: Phana uNkulunkulu udumo; thina siyazi ukuthi lowomuntu uyisoni.

²⁵Yena wasephendula esithi: Loba eyisoni kangazi, kunye engikwaziyo, ukuthi bengiyisiphofu, khathesi sengibona.

²⁶Asesithi kuye futhi: Wenzeni kuwe? Uwavule njani amehlo akho?

²⁷Wawaphendula wathi: Sengilitshelile, kodwa kalizwanga, lifunelani ukuzwa futhi? Liyafisa lani ukuba ngabafundi bakhe yini?

²⁸Ngakho amthuka, esithi: Nguwe ongumfundi wakhe; kodwa thina singabafundi bakaMozisi.

²⁹Thina siyazi ukuthi uNkulunkulu wakhuluma loMozisi; kodwa lo kasimazi lapho avela khona.

³⁰Umuntu waphendula wathi kuwo: Ngoba kulokhu kuyisimanga ukuthi lina kalimazi lapho avela khona, kanti uvule amehlo ami.

³¹Njalo siyazi ukuthi uNkulunkulu kazizwa izoni; kodwa uba umuntu engokhonza uNkulunkulu, esenza intando yakhe, uyamuzwa lowo.

³²Loba nini kakukaze kuzwakale ukuthi kukhona umuntu owavula amehlo owazalwa eyisiphofu.

³³Uba lo ubengaveli kuNkulunkulu, ubengebe lamandla okwenza ulutho.

³⁴Aphendula athi kuye: Wena wazalelwa esonweni ngokupheleleyo, njalo wena uyasifundisa yini? Asemxotshela phandle.

³⁵UJesu wezwa ukuthi amxotshele phandle; kwathi esemficile, wathi kuye: Wena uyakholwa yini eNdodaneni kaNkulunkulu?

³⁶Yena waphendula wathi: Ingubani, Nkosi, ukuze ngikholwe kuyo?

³⁷UJesu wasesithi kuye: Lawe usuyibonile, njalo okhuluma lawe uyiyo.

³⁸Wasesithi: Nkosi, ngiyakholwa; wasemkhonza.

³⁹UJesu wasesithi: Mina ngizele ukwahlulela kulumhlaba, ukuze abangaboniyo babone, lalabo ababonayo babe yiziphofu.

⁴⁰Lalabo kubaFarisi ababelaye bezwa lezizinto, bathi kuye: Lathi siyiziphofu yini?

⁴¹UJesu wathi kubo: Uba beliyiziphofu, ngabe kalilasono. Kodwa khathesi lithi: Siyabona; ngakho isono senu simi.