Read Ndebele-IBhayibhili Elingcwele 2006 Izenzo Zabapostoli 16 Bible Online

Izenzo Zabapostoli 16 - Ndebele-IBhayibhili Elingcwele 2006 bible

Izenzo Zabapostoli 16

¹Wasefika eDerbe leListra; njalo khangela, kwakukhona lapho umfundi othile, uTimothi ngebizo, indodana yowesifazana othile ongumJudakazi okholwayo, kodwa uyise wayengumGriki;

²owayenconywa ngabazalwane eListra leIkoniyuma.

³Lo uPawuli wathanda ukuthi aphume laye, wasemthatha wa m soka, ngenxa yamaJuda ayekhona kulezondawo; ngoba wonke ayemazi uyise, ukuthi wayengumGriki.

⁴Njalo bedabula imizi, babanika izimiso ukuzilondoloza ezamiswa ngabaphostoli labadala ababeseJerusalema.

⁵Ngakho amabandla aqiniswa ekholweni, njalo anda ngamanani insuku ngensuku.

⁶Sebedabule eFrigiya lelizwe leGalathiya, balelwa nguMoya oNgcwele ukukhuluma ilizwi eAsiya,

⁷sebefikile maqondana leMisiya bazama ukuya eBithiniya; kodwa uMoya kabavumelanga;

⁸basebeyiceza iMisiya behlela eTrowasi.

⁹Kwasekubonakala umbono kuPawuli ebusuku; indoda ethile umMakedoniya yayimi, imncenga isithi: Chaphela eMakedoniya, usisize.

¹⁰Kwathi esewubonile umbono, sahle sazama ukusuka siye eMakedoniya, siphetha sisithi iNkosi isibizele ukutshumayela ivangeli kibo.

¹¹Ngakho sasuka eTrowasi ngomkhumbi, saqonda eSamotrake, langolulandelayo eNeyapholi,

¹²sasuka lapho saya eFiliphi, engumuzi wokuqala wesigaba seMakedoniya, esibuswa ngelinye ilizwe; kulowomuzi sasesihlala insuku ezithile.

¹³Njalo ngosuku lwesabatha saphumela ngaphandle komuzi eceleni komfula, lapho okwakufanele kwenzelwe umkhuleko khona; sasesihlala phansi sakhuluma labesifazana ababebuthene ndawonye.

¹⁴Lowesifazana othile uLidiya ngebizo, ongumthengisikazi wamalembu ayibubende owemzini weTiyathira, ekhonza uNkulunkulu, wezwa, onhliziyo yakhe iNkosi yayivula, ukuthi alalele okwakhulunywa nguPawuli.

¹⁵Kuthe esebhabhathiziwe, lendlu yakhe, wa si ncenga esithi: Uba libonile ukuthi ngithembekile eNkosini, wozani endlini yami, lihlale khona. Wasesicindezela.

¹⁶Kwasekusithi sisiya emkhulekweni, intombazana eyisigqili elomoya wokuhlahlula yahlangana lathi, eyayizuzela amakhosi ayo inzuzo enengi ngokuvumisa.

¹⁷Lo walandela uPawuli lathi, ememeza esithi: Lababantu bazinceku zikaNkulunkulu oPhezukonke, ezisitshumayeza indlela yosindiso.

¹⁸Lalokhu yakwenza insuku ezinengi. Kwathi uPawuli esenengiwe, watshibilika, wathi kumoya: Ngiyakulaya ngebizo likaJesu Kristu ukuthi uphume kuyo. Wasephuma ngalesosikhathi.

¹⁹Amakhosi akhe esebonile ukuthi ithemba lenzuzo yabo seliphumile, abamba uPawuli loSilasi, a ba donsela emdangeni phambi kwababusi,

²⁰sebebalethile ezinduneni athi: Lababantu badunga umuzi wethu, bengamaJuda,

²¹batshumayela imikhuba esingavunyelwa ukuyemukela siyenze, singamaRoma.

²²Lexuku labelekelela, lenduna zabadabulela izembatho zabo zalaya ukuthi ba ba tshaye ngenduku.

²³Sebebatshayile imivimvinya eminengi ba ba phosela entolongweni, balaya umlindintolongo ukuthi abalondoloze abaqinise;

²⁴yena, emukele umlayo onjalo, wabaphosela entolongweni ephakathi, waseqinisa inyawo zabo esigodweni.

²⁵Kwathi sekungaba phakathi kobusuku uPawuli loSilasi babekhuleka behlabela amahubo endumiso kuNkulunkulu, lezibotshwa zazibezwa;

²⁶njalo kwahle kwaba khona ukuzamazama komhlaba okukhulu, kwaze kwanyikinyeka izisekelo zentolongo; kwahle kwavulwa iminyango yonke, kwathukululwa izibopho zabo bonke.

²⁷Kwathi umlindintolongo ephaphama, esebona iminyango yentolongo ivulekile, wakhokha inkemba, ezimisele ukuzibulala, ecabanga ukuthi izibotshwa zibalekile.

²⁸Kodwa uPawuli wamemeza ngelizwi elikhulu esithi: Ungazilimazi; ngoba silapha sonke.

²⁹Wasecela isibane waphoseka phakathi, njalo wasethuthumela wawela phansi phambi kukaPawuli loSilasi,

³⁰njalo esebakhuphela phandle wathi: Makhosi, kumele ngenzeni ukuze ngisindiswe?

³¹Basebesithi: Kholwa eNkosini uJesu Kristu, njalo uzasindiswa wena lendlu yakho.

³²Basebekhuluma kuye ilizwi leNkosi, lakulabo bonke ababesendlini yakhe.

³³Wasebathatha ngalelohola lobusuku wa ba gezisa amanxeba, njalo wahle wabhabhathizwa yena labakhe bonke.

³⁴Wasebasa endlini yakhe wabeka itafula lokudla phambi kwabo, wasethokoza lendlu yakhe yonke bekholwa kuNkulunkulu.

³⁵Kwathi sekusile, induna zathuma amapholisa zisithi: Khulula labobantu.

³⁶Umlindintolongo wasebikela uPawuli lamazwi esithi: Induna zithumele, ukuthi likhululwe; ngakho phumani khathesi lihambe ngokuthula.

³⁷Kodwa uPawuli wathi kuwo: Basitshayile obala singalahlwanga licala, si ngamaRoma, basebe si phosela entolongweni, njalo khathesi ngensitha sebesiphosela phandle yini? Hatshi bo! Kodwa kumele beze bona basikhuphe.

³⁸Amapholisa azibikela izinduna lamazwi; zasezisesaba zisizwa ukuthi bangamaRoma,

³⁹njalo zeza zabancenga, njalo za ba khupha za ba cela ukuthi baphume emzini.

⁴⁰Basebephuma entolongweni bangena koLidiya; kwathi sebebabonile abazalwane, babaduduza, basuka bahamba.