Read Ndebele-IBhayibhili Elingcwele 2006 Izenzo Zabapostoli 19 Bible Online

Izenzo Zabapostoli 19 - Ndebele-IBhayibhili Elingcwele 2006 bible

Izenzo Zabapostoli 19

¹Kwasekusithi, uApolosi eseseKorinte, uPawuli wafika eEfesu esedabule indawo eziphakemeyo; wasefica abafundi abathile

²wathi kubo: Lamemukela yini uMoya oNgcwele mhla likholwayo? Basebesithi kuye: Kodwa kasizanga sizwe ngitsho ukuthi kukhona uMoya oNgcwele.

³Wasesithi kubo: Pho labhabhathizelwa kukuphi? Basebesithi: Kubhabhathizo lukaJohane.

⁴Kodwa uPawuli wathi: UJohane wabhabhathiza ubhabhathizo lokuphenduka, etshela abantu ukuze bakholwe kulowo oweza emva kwakhe, okuyikuthi, kuKristu Jesu.

⁵Lalabo abezwayo babhabhathizwa ebizweni leNkosi uJesu.

⁶Wathi uPawuli esebeke izandla phezu kwabo, uMoya oyiNgcwele weza phezu kwabo; basebekhuluma ngendimi, baprofetha.

⁷Njalo wonke amadoda ayengaba litshumi lambili.

⁸Wasengena esinagogeni wakhuluma ngesibindi, inyanga ezintathu etshumayela eqinisekisa izinto ngombuso kaNkulunkulu.

⁹Kodwa kwathi abanye besiba lukhuni bengakholwa, bekhuluma kubi nga leyo ndlela phambi kwabantu, wasuka kubo wehlukanisa abafundi, insuku ngensuku etshumayela esikolo sothile uTiranu.

¹⁰Lalokhu kwenzeka okweminyaka emibili, baze balizwa ilizwi leNkosi uJesu bonke abakhileyo eAsiya, amaJuda kanye lamaGriki.

¹¹UNkulunkulu wasesenza imisebenzi yamandla engejwayelekanga ngezandla zikaPawuli,

¹²kwaze kwathi lakwabagulayo kwasiwa izifinyo kumbe amafasikoti okuvela emzimbeni wakhe, lezifo zasuka kubo, labomoya ababi baphuma kubo.

¹³Kwathi abanye kumihambuma yamaJuda, izanuse, bazama ukubiza ibizo leNkosi uJesu kulabo ababelabomoya ababi, besithi: Siyalifungisa ngoJesu amtshumayelayo uPawuli.

¹⁴Njalo kwakukhona amadodana ayisikhombisa athile kaSikeva umJuda umpristi omkhulu akwenzayo lokho.

¹⁵Kodwa umoya omubi waphendula wathi: UJesu ngiyamazi, loPawuli ngiyazi ngaye; kodwa lina lingobani?

¹⁶Lowomuntu okwakukuye umoya omubi waseseqela phezu kwabo, njalo wabehlula, wabanqoba, baze babaleka kuleyondlu benqunu belimele.

¹⁷Lokhu kwasekusaziwa yibo bonke abakhileyo eEfesu amaJuda kanye lamaGriki; lokwesaba kwasekubehlela bonke; njalo lakhuliswa ibizo leNkosi uJesu.

¹⁸Labanengi balabo abakholwayo beza, bevuma, bememezela izenzo zabo.

¹⁹Labanengi balabo ababesenza amasalamusi baletha ingwalo ndawonye bazitshisa phambi kwabo bonke; basebebala intengo yazo, bathola izinkulungwane ezingamatshumi amahlanu zesiliva.

²⁰Ngokunjalo ilizwi leNkosi lakhula ngamandla lanqoba.

²¹Kwathi lezizinto seziphelile, uPawuli wazimisela emoyeni, esedabule eMakedoniya leAkaya, ukuya eJerusalema, esithi: Emva kokuba kwami lapho, ngimele ukubona iRoma layo.

²²Esethume eMakedoniya ababili balabo ababemsiza, uTimothi loErastu, yena wahlala eAsiya okwesikhathi.

²³Kodwa ngalesosikhathi kwasuka isiphithiphithi esingesincinyane mayelana la leyo ndlela.

²⁴Ngoba umuntu othile onguDemetriyu ngebizo, umkhandi wesiliva, owenza amathempel ana esiliva kaDiyana, waletha kuzingcwethi inzuzo engencinyane;

²⁵owabaqoqayo bona, lezisebenzi zezinto ezifananayo, wathi: Madoda, liyazi ukuthi inotho yethu ivela kulumsebenzi.

²⁶Njalo liyabona liyezwa ukuthi kungesikho eEfesu kuphela, kodwa phose kulo lonke iAsiya, uPawuli lo uncengile njalo uphambule ixuku elikhulu, esithi kayisibo onkulunkulu abenziwe ngezandla.

²⁷Njalo kayisikho lokhu kuphela ukuthi sisengozini yokuthi le ingxenye ifike ekutheni ingahlonitshwa, kodwa lethempeli likankulunkulukazi omkhulu uDiyana lizathiwa liyinto engesilutho, njalo lobukhulukazi bakhe buzakwehliswa, elimkhonzayo yonke iAsiya lomhlaba wonke.

²⁸Kwathi be ku zwa bagcwala intukuthelo, bamemeza besithi: Mkhulu uDiyana wamaEfesu!

²⁹Njalo umuzi wonke wagcwala isiphithiphithi; basebetheleka kanyekanye endaweni yokudlalela, bahudula uGayusi loAristako amaMakedoniya, abaphelekezeli bakaPawuli.

³⁰Kwathi uPawuli efuna ukungena exukwini, abafundi kabamvumelanga.

³¹Njalo labanye bababusi beAsiya, ababengabangane bakhe, bathuma kuye, be m ncenga ukuthi angazinikeli endaweni yokudlalela.

³²Ngakho abanye bamemeza okunye labanye okunye; ngoba umhlangano wawusanganisekile, njalo inengi labo lalingazi ukuthi libuthene lapho ngenxa yani.

³³Basebemusa phambili uAleksandro esuka exukwini, ngoba amaJuda amqhubela phambili. UAleksandro waseqhweba ngesandla, efuna ukuzivikela ebantwini.

³⁴Kodwa bathi sebekwazi ukuthi ungumJuda, kwaba lelizwi elilodwa livela kubo bonke okungaba ngamahola amabili limemeza lisithi: Mkhulu uDiyana wamaEfesu!

³⁵Njalo kwathi umabhalane eselithulisile ixuku wathi: Madoda eEfesu, kanti kukhona yini umuntu ongaziyo ukuthi umuzi weEfesu ungumlondolozi wethempeli likankulunkulukazi omkhulu uDiyana lowento eyawa ivela kuZewusi?

³⁶Ngakho njengoba lezizinto zingephikwe, kufanele lithule, lingenzi lutho ngamawala.

³⁷Ngoba lilethe lamadoda, angesibo abaphangi bamathempeli langahlambazi unkulunkulukazi wenu.

³⁸Ngakho uba uDemetriyu lezingcwethi kanye laye belodaba ngomuntu, amalanga okuthonisa amacala ayagcinwa, bakhona lababusi; kabamangalelane.

³⁹Kodwa uba lidinga ulutho ngezinye izinto, kuzalungiswa emhlanganweni osemthethweni.

⁴⁰Ngoba futhi sisengozini yokumangalelwa ngomvukela ngenxa yalamuhla, kungelambangela esingalandisa ngayo ngalesisiphithiphithi.

⁴¹Njalo esetshilo lokho, wawuchitha umhlangano.