Read Ndebele-IBhayibhili Elingcwele 2006 Izenzo Zabapostoli 26 Bible Online

Izenzo Zabapostoli 26 - Ndebele-IBhayibhili Elingcwele 2006 bible

Izenzo Zabapostoli 26

¹UAgripha wasesithi kuPawuli: Uvunyelwe ukuzikhulumela. UPawuli waseselula isandla, waziphendulela wathi:

²Kukho konke engimangalelwa ngakho ngamaJuda, nkosi Agripha, ngizizwa ngithokoza ukuthi sengingaziphendulela phambi kwakho lamuhla;

³ikakhulu ngoba uyawazi wonke amasiko lokuphikisana phakathi kwamaJuda; ngakho ngiyakuncenga, ukuthi ungizwe ngesineke.

⁴Ngakho ukuhamba kwami konke kusukela ebutsheni, okwakuqala esizweni sakithi eJerusalema, wonke amaJuda ayakwazi,

⁵ayangazi phambili kusukela ekuqaleni, uba bethanda ukufakaza, ukuthi ngendlela eqinileyo yehlelo lokukhonza kwakithi ngaphila ngingumFarisi.

⁶Lakhathesi ngimi ngithonisiswa ngenxa yethemba lesithembiso esenziwa nguNkulunkulu kubobaba,

⁷ezithemba ukufinyelela kuso izizwe zakithi ezilitshumi lambili, zikhonza ngesineke ebusuku lemini; engimangalelwe ngalelithemba, nkosi Agripha, ngamaJuda.

⁸Kungani kukhunjulwa ukuthi ku yinto engakholekiyo kini, nxa uNkulunkulu evusa abafileyo?

⁹Ngakho lami ngokwami ngangicabanga ukuthi ngangifanele ukwenza izinto ezinengi eziphambene lebizo likaJesu weNazaretha;

¹⁰lami engakwenza eJerusalema, njalo mina ngavalela abanengi kwabangcwele entolongweni, ngemukela amandla avela kubapristi abakhulu; lalapho bebulawa ngakukhetha.

¹¹Lemasinagogeni wonke ngabajezisa kanengi, nga ba bamba ngamandla ukuthi bahlambaze; njalo ngahlanya kakhulu ngabo, nga ba zingela baze bafika emizini yabezizwe.

¹²Okungazo lami ngisiya eDamaseko ngamandla langokuthunywa ngabapristi abakhulu,

¹³emini enkulu, nkosi, ngabona endleleni ukukhanya kuvela ezulwini, kudlula ukukhanya kwelanga, kwakhanya kwangizingelezela lalabo ababehamba lami.

¹⁴Kwathi sonke sesiwele phansi emhlabathini, ngezwa ilizwi likhuluma lami lisithi ngolimi lwesiHebheru: Sawuli, Sawuli, ungizingelelani? Kulukhuni kuwe ukukhahlelana lezincijo.

¹⁵Mina ngasengisithi: Ungubani, Nkosi? Wasesithi: Mina nginguJesu omzingelayo.

¹⁶Kodwa sukuma, njalo ume ngenyawo zakho; ngoba ngibonakelele lokho kuwe, ukuthi ngikumise ube yisikhonzi lomfakazi wezinto ozibonileyo, kanye lengizazibonakalisa ngazo kuwe,

¹⁷ngikophula ebantwini lakwabezizwe, engikuthuma kubo khathesi,

¹⁸ukuvula amehlo abo, loku ba phendula emnyameni ba ye ekukhanyeni, lemandleni kaSathane ba ye kuNkulunkulu, ukuze bemukeliswe uthethelelo lwezono, lelifa phakathi kwabangcwelisiweyo ngokholo olukimi.

¹⁹Ngakho, nkosi Agripha, kangalanga ukulalela umbono wezulwini;

²⁰kodwa ngatshumayela kuqala kwabaseDamaseko labeJerusalema, lakulo lonke ilizwe leJudiya, lakwabezizwe, ukuze baphenduke, babuyele kuNkulunkulu, benze imisebenzi efanele ukuphenduka.

²¹Ngenxa yalezizinto amaJuda angibamba ethempelini, azama uku ngi bulala.

²²Ngakho ngizuzile usizo oluvela kuNkulunkulu, kuze kube lamuhla ngimi ngifakaza kubo bonke abancinyane labakhulu, ngingakhulumi lutho ngaphandle kwalezozinto abazikhulumayo abaprofethi loMozisi ukuthi zizakwenzeka,

²³ukuthi uKristu umele ukuhlupheka, lo kuthi engowokuqala ekuvukeni kwabafileyo uzatshumayela ukukhanya kulababantu lakwabezizwe.

²⁴Kwathi esaziphendulela lezizinto, uFestusi wathi ngelizwi elikhulu: Uyahlanya, Pawuli; ukufunda okunengi kuyakuhlanyisa.

²⁵Kodwa wathi: Kangihlanyi, mhlekazi Festusi, kodwa ngimemezela amazwi aliqiniso laqondileyo.

²⁶Ngoba inkosi iyazi ngalezizinto, engikhuluma ngesibindi lakuyo; ngoba ngileqiniso lokuthi akukho okunye kwalezizinto okufihlakeleyo kuyo; ngoba lokhu kakwenziwanga engonsini.

²⁷Nkosi Agripha, uyakholwa abaprofethi yini? Ngiyazi ukuthi uyakholwa.

²⁸UAgripha wasesithi kuPawuli: Usuphose wangiqinisekisa ukuthi ngibe ngumKristu.

²⁹UPawuli wasesithi: Bengingafisa kuNkulunkulu ukuthi, loba ngokulutshwana loba ngokunengi kungabi nguwe wedwa, kodwa labo bonke abangizwayo lamuhla, babe ngabanje njengoba nginjalo lami, ngaphandle kwalezizibopho.

³⁰Kwathi esekhulume lezizinto, yasukuma inkosi, lombusi, loBernike, lalabo ababehlezi labo;

³¹kwathi sebephumile bakhulumisana, besithi: Lumuntu kenzi lutho olufanele ukufa kumbe ukubotshwa.

³²UAgripha wasesithi kuFestusi: Lumuntu ubengakhululwa, uba ebengalidluliselanga kuKesari.