Read Ndebele-IBhayibhili Elingcwele 2006 Izenzo Zabapostoli 4 Bible Online

Izenzo Zabapostoli 4 - Ndebele-IBhayibhili Elingcwele 2006 bible

Izenzo Zabapostoli 4

¹Kwathi besakhuluma ebantwini, abapristi lenduna yethempeli labaSadusi babafikela,

²benengekile ngoba babefundisa abantu, betshumayela ukuvuka kwabafileyo ngoJesu.

³Babadumela ngezandla, ba ba faka esitokisini kwaze kwaba kusisa; ngoba kwasekuhlwile.

⁴Kodwa abanengi abalizwayo ilizwi bakholwa; lenani lamadoda lalingaba zinkulungwane ezinhlanu.

⁵Kwasekusithi kusisa kwabuthana ababusi labadala lababhali babo eJerusalema,

⁶loAnasi umpristi omkhulu, loKayafasi, loJohane, loAleksandro, labo bonke abendlu yompristi omkhulu.

⁷Sebebamise phakathi, babuza: Lokhu lina likwenze ngawaphi amandla kumbe ngaliphi ibizo?

⁸Khona uPetro egcwaliswe nguMoya oNgcwele wathi kubo: Babusi babantu labadala bakoIsrayeli,

⁹nxa thina sibuzwa lamuhla ngomsebenzi omuhle emuntwini obuthakathaka emzimbeni, ukuthi yena usindiswe ngani;

¹⁰kakwaziwe yini lonke laso sonke isizwe sakoIsrayeli, ukuthi ngebizo likaJesu Kristu umNazaretha, lina elambethelayo, uNkulunkulu owamvusayo kwabafileyo, ngaye lo umi lapha phambi kwenu esesilile.

¹¹Yena lo uyilitshe elaliwa yini abakhi, eseliyinhloko yengonsi.

¹²Njalo kalukho usindiso komunye; ngoba kalikho lelinye ibizo ngaphansi kwezulu elinikiweyo phakathi kwabantu, esimele sisindiswe ngalo.

¹³Kwathi bebona isibindi sikaPetro loJohane, njalo besazi ukuthi babengabantu abangafundanga njalo bengabantu nje, bamangala, njalo babazi ukuthi babeloJesu,

¹⁴kodwa bebona umuntu osilisiweyo emi labo, babengelakuphika lutho.

¹⁵Kodwa sebebalayile ukuthi baphume phandle emphakathini, bacebisana bodwa,

¹⁶besithi: Sizabenzani lababantu? Ngoba ukuthi isibonakaliso esidumisekayo senziwa yibo, kusobala kubo bonke abahlezi eJerusalema, njalo singe ku phike;

¹⁷kodwa ukuze kungabe kusanda phakathi kwabantu, asibaqonqosele ukuthi bangabe besakhuluma lamuntu ngalelibizo.

¹⁸Basebebabiza, babalaya ukuthi bangakhulumi lakanye njalo bangafundisi ngebizo likaJesu.

¹⁹Kodwa uPetro loJohane babaphendula bathi: Yehlukanisani ukuthi kulungile phambi kukaNkulunkulu ukulalela lina kuloNkulunkulu.

²⁰Ngoba thina kasilakuyekela ukukhuluma izinto esizibonileyo lesizizwileyo.

²¹Kwathi sebe ba qonqosele futhi, babayekela bahamba; bengatholi lutho lokuthi bangabajezisa njani, ngenxa yabantu, ngoba bonke badumisa uNkulunkulu ngalokho okwenzakeleyo.

²²Ngoba umuntu wayeleminyaka edlula amatshumi amane esenziwa kuye lesisibonakaliso seselapho.

²³Kwathi sebeyekelwe basuka baya kwabakibo, bababikela konke abapristi abakhulu labadala abakutshiloyo kubo.

²⁴Kwathi bona sebezwile baphakamisela ilizwi nganhliziyonye kuNkulunkulu, bathi: Nkosi, wena unguNkulunkulu owenza izulu lomhlaba lolwandle lakho konke okukukho;

²⁵owathi ngomlomo wenceku yakho uDavida: Kungani abezizwe bexokozela, labantu banakane okuyize?

²⁶Amakhosi omhlaba ema, lababusi bahlangana ndawonye ukumelana leNkosi, lokumelana loGcotshiweyo wayo;

²⁷ngoba isibili bahlangana ndawonye bemelane leNdodana yakho engcwele uJesu, owayigcobayo, bonke uHerodi loPontiyusi Pilatu, kanye labezizwe labantu bakoIsrayeli,

²⁸ukwenza konke isandla sakho lecebo lakho elakumisa phambili ukuthi kwenzeke.

²⁹Njalo ngalesisikhathi, Nkosi, khangela ukusonga kwabo, unike izinceku zakho ukuthi zikhulume ilizwi lakho ngesibindi sonke,

³⁰ngokuthi welule isandla sakho ukusilisa, lokuthi kwenziwe izibonakaliso lezimangaliso ngebizo leNdodana yakho engcwele uJesu.

³¹Kwathi sebekhulekile kwazanyazanyiswa indawo ababebuthene kuyo, basebegcwaliswa bonke ngoMoya oNgcwele, basebekhuluma ilizwi likaNkulunkulu ngesibindi.

³²Lexuku labakholwayo lalinhliziyo nye lomoya munye; njalo kungekho oyedwa owathi ezintweni alazo ngezakhe, kodwa bahlanganyela izinto zonke.

³³Langamandla amakhulu abaphostoli baveza ubufakazi bokuvuka kweNkosi uJesu, lomusa omkhulu waba phezu kwabo bonke.

³⁴Ngoba kwakungekho futhi oswelayo phakathi kwabo; ngoba bonke ababelemihlaba kumbe izindlu, bathengisa baletha intengo zalokho okuthengisiweyo,

³⁵ba yi beka enyaweni zabaphostoli; njalo kwabelwa ngulowo lalowo njengokuswela kwakhe.

³⁶Kwathi uJose owabizwa ngabaphostoli ngokuthi nguBarnabasi, okuyikuthi ngokuphendulelwa, indodana yenduduzo, umLevi, umKuprosi ngokuzalwa,

³⁷elesiqinti, wa si thengisa, waletha imali, wa yi beka enyaweni zabaphostoli.