Read Ndebele-IBhayibhili Elingcwele 2006 Izenzo Zabapostoli 6 Bible Online

Izenzo Zabapostoli 6 - Ndebele-IBhayibhili Elingcwele 2006 bible

Izenzo Zabapostoli 6

¹Kwathi ngalezonsuku, abafundi sebandile, kwavela ukusola kwamaHelenisiti* ngamaHebheru, ngoba abafelokazi babo babengananzwa ekwabelweni kwensuku ngensuku.

²Abalitshumi lambili basebebizela kubo ixuku labafundi, bathi: Kakulunganga ukuthi thina sitshiye ilizwi likaNkulunkulu, sisebenze ematafuleni.

³Ngakho, bazalwane, khangelani phakathi kwenu amadoda ayisikhombisa alobufakazi obuhle, agcwele uMoya oNgcwele lenhlakanipho, esingawamisa phezu kwale inswelo.

⁴Kodwa thina sizaphikelela emkhulekweni lemsebenzini welizwi.

⁵Lalelilizwi lalithokozisa lonke ixuku; basebekhetha uStefane, indoda egcwele ukholo loMoya oNgcwele, loFiliphu, loProkoro, loNikanori, loTimoni, loParmena, loNikola owaphendukela kumaJuda evela eAntiyoki,

⁶ababamisa phambi kwabaphostoli; sebekhulekile babeka izandla phezu kwabo.

⁷Lelizwi likaNkulunkulu landa, lenani labafundi lakhula kakhulu sibili eJerusalema, lexuku elikhulu labapristi lalalela ukholo.

⁸Kwathi uStefane egcwele ukholo lamandla wenza izimangaliso lezibonakaliso ezinkulu phakathi kwabantu.

⁹Kwasekusukuma abanye abesinagoge elithiwa ngelabaKhululwa, labeKurene labeAleksandriya, lakulabo abavela eKilikhiya leAsiya, baphikisana loStefane.

¹⁰Kodwa babengelamandla okumelana lenhlakanipho loMoya ayekhuluma ngawo.

¹¹Basebefumbathisa amadoda athi: Simzwile ekhuluma amazwi ayinhlamba amelana loMozisi loNkulunkulu.

¹²Basebevusa abantu labadala lababhali, basebe m fikela bambamba, ba m letha emphakathini,

¹³basebemisa abafakazi bamanga abathi: Lumuntu kayekeli ukukhuluma amazwi ayinhlamba amelene lalindawo engcwele langomlayo;

¹⁴ngoba simzwile esithi, uJesu lo weNazaretha uzadiliza lindawo, aphendule lemikhuba uMozisi asinika yona.

¹⁵Bonke ababehlezi emphakathini basebemjolozela, babona ubuso bakhe bungathi yibuso bengilosi.