Read Ndebele-IBhayibhili Elingcwele 2006 Kweberoma 10 Bible Online

Kweberoma 10 - Ndebele-IBhayibhili Elingcwele 2006 bible

Kweberoma 10

¹Bazalwane, isifiso lomkhuleko wenhliziyo yami kuNkulunkulu ngoIsrayeli kungokosindiso lwabo.

²Ngoba ngiyabafakazela ukuthi balokutshisekela uNkulunkulu, kodwa kungenjengolwazi;

³ngoba bengakwazi ukulunga kukaNkulunkulu, njalo bedinga ukumisa okwabo ukulunga, kabazehliselanga ngaphansi kokulunga kukaNkulunkulu.

⁴Ngoba uKristu uyisiphetho somlayo ekulungeni kuye wonke okholwayo.

⁵Ngoba uMozisi ubhala ngo kulunga okungokomlayo, ukuthi umuntu owenza lezizinto uzaphila ngazo.

⁶Kodwa ukulunga okungokholo kukhuluma kanje: Ungatsho enhliziyweni yakho ukuthi: Ngubani ozakwenyukela ezulwini? Lokhu kuyikuthi ukumehlisa uKristu;

⁷kumbe ukuthi: Ngubani ozakwehlela ekujuleni? Lokhu kuyikuthi ukumkhuphula uKristu kwabafileyo.

⁸Kodwa kuthini? Ilizwi liseduze lawe, emlonyeni wakho lenhliziyweni yakho; leli yilizwi lokholo esilitshumayelayo;

⁹ukuthi uba uvuma ngomlomo wakho iNkosi uJesu, njalo ukholwa enhliziyweni yakho ukuthi uNkulunkulu wamvusa kwabafileyo, uzasindiswa;

¹⁰ngoba ngenhliziyo omunye uyakholwa kube yikulunga, langomlomo uyavuma kube lusindiso.

¹¹Ngoba umbhalo uthi: Wonke okholwa kuye kayikuyangeka.

¹²Ngoba kakukho umehluko phakathi komJuda lomGriki; ngoba yinye iNkosi yabo bonke, inothele bonke abakhuleka kuyo.

¹³Ngoba wonke loba ngubani ozabiza ibizo leNkosi uzasindiswa.

¹⁴Ngakho bazayibiza njani abangakholwanga kuyo? Futhi bazakholwa njani kuyo abangezwanga ngayo? Futhi bazakuzwa njani bengelamtshumayeli?

¹⁵Njalo bazatshumayela njani uba bengathunywanga? Njengokulotshiweyo ukuthi: Zinhle kangakanani inyawo zabatshumayela ivangeli lokuthula, zabatshumayela ivangeli nge zinto ezinhle !

¹⁶Kodwa kabalilalelanga bonke ivangeli. Ngoba uIsaya uthi: Nkosi, ngubani owakholwa umbiko wethu?

¹⁷Ngakho ukholo luvela ekuzweni, lokuzwa ngelizwi likaNkulunkulu.

¹⁸Kodwa ngithi: Kabezwanga yini? Yebo sibili, ilizwi labo liphumele emhlabeni wonke, lamazwi abo emikhawulweni yomhlaba.

¹⁹Kodwa ngithi: UIsrayeli kaqedisisanga yini? Kuqala uMozisi uthi: Mina ngizalivusela umona nga bo aba ngesiso isizwe, ngilithukuthelise ngesizwe esingelangqondo.

²⁰LoIsaya ulesibindi uthi: Ngaficwa yilabo abangangidinganga, ngabonakala kibo abangabuzanga ngami.

²¹Kodwa kuIsrayeli uthi: Usuku lonke ngelulela izandla zami kubantu abangalaleliyo labalenkani.