Read Ndebele-IBhayibhili Elingcwele 2006 Kweberoma 11 Bible Online

Kweberoma 11 - Ndebele-IBhayibhili Elingcwele 2006 bible

Kweberoma 11

¹Ngakho ngithi: UNkulunkulu ubalahlile yini abantu bakhe? Phinde ! Ngoba lami ngingumIsrayeli, enzalweni kaAbrahama, wesizwe sikaBhenjamini.

²UNkulunkulu kabalahlanga abantu bakhe abazi ngaphambili. Kumbe kalazi yini kuElija ukuthi umbhalo uthini? Ukuthi walabhela njani kuNkulunkulu emelene loIsrayeli, esithi:

³Nkosi, babulele abaprofethi bakho, badilizile amalathi akho; mina-ke ngisele ngedwa, sebedinga umphefumulo wami.

⁴Kodwa impendulo kaNkulunkulu yathini kuye? Yathi: Ngizitshiyele amadoda azinkulungwane eziyisikhombisa, angaguqanga ngedolo kuBhali.

⁵Kunjalo-ke kukhona langalesisikhathi insali ngokukhetha komusa.

⁶Kodwa uba kungomusa, kakusayi ngemisebenzi; uba kungenjalo umusa kawuseyiwo umusa. Kodwa aluba kusiya ngemisebenzi, akusengumusa; uba kungenjalo umsebenzi kawusengumsebenzi.

⁷Pho-ke? UIsrayeli ayekudinga, lokhu kakutholanga, kodwa abakhethiweyo bakuthola, labanye benziwa baba lukhuni;

⁸njengokulotshiweyo ukuthi: UNkulunkulu wabanika umoya wobuthongo obukhulu, amehlo ukuze bangaboni, lendlebe ukuze bangezwa, kuze kube lusuku lwalamuhla.

⁹LoDavida uthi: Itafula labo libe ngumjibila lesifu, lesikhubekiso, lempindiselo kibo;

¹⁰amehlo abo afiphazwe ukuze bangaboni, njalo ugobise umhlana wabo njalonjalo.

¹¹Ngakho ngithi: Bakhubeka ukuze bawe yini? Phinde ! Kodwa ngesiphambeko sabo usindiso lufikile kwabezizwe, ukubavusela umona.

¹²Kodwa uba isiphambeko sabo siyinotho yomhlaba, lokwehluleka kwabo kuyinotho yabezizwe, kakhulu kangakanani ukugcwala kwabo?

¹³Ngoba ngikhuluma lani bezizwe, njengalokho mina ngingumphostoli wabezizwe; ngikhulisa inkonzo yami;

¹⁴ukuthi mhlawumbe ngibavusele umona abe nyama yami, ngisindise abanye babo.

¹⁵Ngoba uba ukulahlwa kwabo kuyikubuyiswa komhlaba, ku nga ba yini ukwemukelwa, ngaphandle kokuthi yimpilo evela kwabafileyo?

¹⁶Njalo uba izithelo zokuqala zingcwele, lenhlama injalo; uba-ke impande ingcwele, lengatsha zinjalo.

¹⁷Kodwa uba kwephulwe ezinye ingatsha, lawe ongumhlwathi weganga waxhunyelelwa phakathi kwazo, uhlanganyele lazo impande lamafutha omhlwathi,

¹⁸ungazincomi phezu kwengatsha; kodwa uba uzincoma phezu kwazo, kayisuwe othwele impande, kodwa impande wena.

¹⁹Uzakuthi-ke: Ingatsha zephulwa, ukuze mina ngixhunyelwe.

²⁰Kulungile; zephulwa ngokungakholwa, wena-ke umi ngokholo. Ungazikhukhumezi, kodwa yesaba;

²¹ngoba uba uNkulunkulu engayekelanga ingatsha zemvelo, hlezi lawe kayikukuyekela.

²²Khangela-ke ububele lobukhali bukaNkulunkulu; ubukhali, kulabo abawayo; kodwa kuwe, ububele, uba uhlala ebubeleni; uba kungenjalo uzaqunywa lawe.

²³Lalabo futhi, uba bengahlali ekungakholweni, bazaxhunyelwa, ngoba uNkulunkulu ulamandla okubuya abaxhume.

²⁴Ngoba uba wena waqunywa emhlwathini weganga ngemvelo, wasuxhunyelelwa ngokuphambene lemvelo emhlwathini ohlanyelweyo, kakhulu kangakanani labo, aba zingatsha ngemvelo, bazaxhunyelelwa esihlahleni sakibo somhlwathi?

²⁵Ngoba ngithanda ukuthi lingabi ngabangaziyo, bazalwane, ngalimfihlo, hlezi lizitshaye abahlakaniphileyo, ukuthi ubulukhuni sebehlele uIsrayeli nganxanye, kuze kungene ukugcwala kwabezizwe;

²⁶ngokunjalo-ke uIsrayeli wonke uzasindiswa; njengokulotshiweyo ukuthi: Kuzavela eSiyoni uMkhululi, asuse ukungabi loNkulunkulu kuJakobe;

²⁷njalo yilesi isivumelwano sami kibo, lapho ngizasusa izono zabo.

²⁸Ngokwevangeli bayizitha ngenxa yenu; kodwa ngokukhetha bangabathandiweyo ngenxa yabobaba;

²⁹ngoba izipho zomusa lokubiza kukaNkulunkulu kakulakuphenduka.

³⁰Ngoba njengalokhu lani kade lingamlaleli uNkulunkulu, kodwa khathesi selihawukelwe ngenxa yokungalaleli kwabo;

³¹ngokunjalo lalabo khathesi kabalalelanga, ukuze ngesihawu senu bahawukelwe labo;

³²ngoba uNkulunkulu ubavalele bonke ekungalalelini, ukuze abe lesihawu kibo bonke.

³³Yeka ukujula kwenotho, kokubili yenhlakanipho leyolwazi lukaNkulunkulu ! Kakuphenyeki kangakanani ukwahlulela kwakhe, lendlela zakhe kazilandeleki !

³⁴Ngoba ngubani owazi ingqondo yeNkosi? Kumbe ngubani owaba ngumeluleki wayo?

³⁵Kumbe ngubani owamnika kuqala, njalo kubuyiselwe kuye?

³⁶Ngoba konke kuvela kuye, ku ngaye, ku ya kuye; kabube kuye ubukhosi kuze kube nininini. Ameni.