Read Ndebele-IBhayibhili Elingcwele 2006 Kweberoma 13 Bible Online

Kweberoma 13 - Ndebele-IBhayibhili Elingcwele 2006 bible

Kweberoma 13

¹Wonke umphefumulo awuzehlisele ngaphansi kwamandla aphezulu; ngoba kakukho amandla ngaphandle kwavela kuNkulunkulu; lamandla akhona amiswe nguNkulunkulu.

²Ngakho omelana lamandla, umelana lesimiso sikaNkulunkulu; lalabo abamelana lawo bazazithathela ukulahlwa.

³Ngoba ababusi kabesabeki emisebenzini emihle, kodwa kwemibi. Njalo uyathanda yini ukungesabi amandla? Yenza okuhle, njalo uzakuba lodumo kuwo;

⁴ngoba uyinceku kaNkulunkulu ukuze kube kuhle kuwe. Kodwa nxa usenza okubi, yesaba; ngoba inkemba kayiphatheli ize. Ngoba uyinceku kaNkulunkulu, ungumphindiseli wolaka kulowo owenza okubi.

⁵Ngakho kumele ukuthi uzehlise, kungabi ngenxa yolaka kuphela, kodwa langenxa yesazela.

⁶Ngoba ngenxa yalokho lithela lomthelo; ngoba bayizinceku zikaNkulunkulu, ezikhuthalela khona lokho.

⁷Ngakho phanini bonke okufaneleyo; umthelo ko fanele umthelo; inkokhelo ko fanele inkokhelo; ukwesatshwa ko fanele ukwesatshwa; udumo ko fanele udumo.

⁸Lingabi lamlandu kumuntu, ngaphandle kowokuthandana; ngoba othanda omunye, ugcwalisile umlayo.

⁹Ngoba lokhu ukuthi: Ungafebi, ungabulali, ungebi, ungafakazi amanga, ungabi lomhawu, loba-ke kukhona lawuphi umlayo, kuhlanganiswa kulelilizwi, kulokhu: Wothanda umakhelwane wakho njengalokhu uzi thanda wena.

¹⁰Uthando kalwenzi okubi kumakhelwane; ngakho uthando luyikugcwaliseka komlayo.

¹¹Njalo lokhu, lisazi isikhathi, ukuthi sekulihola lokuthi sivuke ebuthongweni; ngoba usindiso selusondele kithi kulesikhathi esakholwa ngaso.

¹²Ubusuku budlulile, usuku selusondele; ngakho asikhuphe imisebenzi yobumnyama, sihlome izikhali zokukhanya.

¹³Asihambe ngokufaneleyo, njengasemini, kungabi ngokuminza langokudakwa, kungabi emacansini lokungcola, kungabi ngokuxabana langomona.

¹⁴Kodwa yembathani iNkosi uJesu Kristu, linganakekeli inyama, ngezinkanuko.