Read Ndebele-IBhayibhili Elingcwele 2006 Kweberoma 16 Bible Online

Kweberoma 16 - Ndebele-IBhayibhili Elingcwele 2006 bible

Kweberoma 16

¹Ngiyamncoma-ke kini udadewethu uFebe, oyisikhonzikazi sebandla eliseKenikreya;

²ukuze limemukele eNkosini njengokufanele abangcwele, ukuthi limsize loba kuluphi udaba aluswelayo kini; ngoba laye ubengummeli wabanengi, lowami uqobo.

³Bingelelani uPrisila loAkwila izisebenzi kanye lami kuKristu Jesu,

⁴ababeka phansi intamo yabo esikhundleni sempilo yami, engibabongayo kungeyisimi ngedwa, kodwa lamabandla wonke abezizwe;

⁵bingelelani lebandla elisendlini yabo. Bingelelani uEpenetu othandiweyo wami, oyisithelo sokuqala seAkaya kuKristu.

⁶Bingelelani uMariya, owasisebenzela kakhulu.

⁷Bingelelani uAnderoniku loJuniya abayizihlobo zami lezibotshwa kanye lami, abangabadumileyo phakathi kwabaphostoli, ababekuKristu labo ngaphambi kwami.

⁸Bingelelani uAmpiliyasi othandiweyo wami eNkosini.

⁹Bingelelani uOrbanu isisebenzi kanye lathi kuKristu, loSitaku othandiweyo wami.

¹⁰Bingelelani uApele othembekileyo kuKristu. Bingelelani labo abakaAristobulu.

¹¹Bingelelani uHerodiyoni isihlobo sami. Bingelelani abakaNarkisu, labo abaseNkosini.

¹²Bingelelani uTrifina loTrifosa abesifazana abasebenza eNkosini. Bingelelani uPersisi owesifazana othandekayo, owasebenza kakhulu eNkosini.

¹³Bingelelani uRufusi okhethiweyo eNkosini, lonina njalo ongowami.

¹⁴Bingelelani uAsinkiritu, uFileko, uHermasi, uPatroba, uHermesi, labazalwane abalabo.

¹⁵Bingelelani uFilologu loJuliya, uNerusi lodadewabo, loOlimpa, labangcwele bonke abalabo.

¹⁶Bingelelanani ngokwanga okungcwele. Amabandla kaKristu ayalibingelela.

¹⁷Njalo ngiyalincenga, bazalwane, ukuthi liqaphele ababanga ukuxabana lezikhubekiso, okuphambene lemfundiso elayifundiswayo; baxwayeni bona.

¹⁸Ngoba abanjalo kabasebenzeli iNkosi yethu uJesu Kristu, kodwa isisu sabo; njalo ngelizwi elimnandi lendumiso bakhohlisa inhliziyo zabangelacala.

¹⁹Ngoba ukulalela kwenu sekufikile kibo bonke. Ngakho ngiyathokoza ngani; kodwa ngithanda ukuthi lihlakaniphe kokuhle, kodwa libe msulwa kokubi.

²⁰Njalo uNkulunkulu wokuthula uzahle amchoboze uSathane ngaphansi kwenyawo zenu. Umusa weNkosi yethu uJesu Kristu kawube lani. Ameni.

²¹UTimothi isisebenzi kanye lami, loLukiyu loJasoni loSosipatro izihlobo zami bayalibingelela.

²²Mina Tertiyo, engibhale incwadi, ngiyalibingelela eNkosini.

²³UGayusi umngenisi wami lebandla lonke uyalibingelela. UErastu umphathisikhwama somuzi uyalibingelela, loKwartu umzalwane.

²⁴Umusa weNkosi yethu uJesu Kristu kawube lani lonke. Ameni.

²⁵Kuye olamandla okuliqinisa ngokwevangeli lami lokutshunyayelwa kukaJesu Kristu, ngokwembulwa kwemfihlo eyayigcinwe ifihlakele ngezikhathi zendulo,

²⁶kodwa isibonakalisiwe khathesi, langemibhalo yabaprofethi, njengomlayo kaNkulunkulu olaphakade, yaziswa ezizweni zonke ekulaleleni kokholo,

²⁷kuNkulunkulu ololwazi yena yedwa kakube ubukhosi, ngoJesu Kristu, kuze kube nininini. Ameni.