Read Ndebele-IBhayibhili Elingcwele 2006 Kweberoma 2 Bible Online

Kweberoma 2 - Ndebele-IBhayibhili Elingcwele 2006 bible

Kweberoma 2

¹Ngakho kawulakuzilandulela, wena muntu, loba ungubani owahlulelayo; ngoba ngalokho owahlulela ngakho omunye, uyazilahla wena, ngoba wena owahlulelayo wenza izinto ezifananayo.

²Njalo siyazi ukuthi ukwahlulela kukaNkulunkulu kungokweqiniso phezu kwalabo abenza izinto ezinjalo.

³Njalo ucabanga lokho, O muntu owahlulela abenza izinto ezinjalo, lawe uzenza lezozinto, ukuthi wena uzaphepha ukwahlulela kukaNkulunkulu yini?

⁴Kumbe uyayeyisa yini inotho yomusa wakhe leyokubekezela lesineke, ungazi ukuthi umusa kaNkulunkulu ukukhokhelela ekuphendukeni?

⁵Kodwa ngobulukhuni bakho lenhliziyo yakho engaphendukiyo uzibekela ulaka ngosuku lolaka lolwesembulo sokwahlulelwa okulungileyo kukaNkulunkulu,

⁶ozavuza lowo lalowo ngokwemisebenzi yakhe;

⁷kubo abalesineke ngokwenza imisebenzi elungileyo bedinga inkazimulo lodumo lokungabhubhi, kuzakuba lempilo elaphakade;

⁸kodwa kulabo abalenkani, njalo bengalaleli iqiniso kodwa belalela ukungalungi, kuzakuba lentukuthelo lolaka,

⁹usizi lokubandezeleka, phezu kwawo wonke umphefumulo womuntu owenza ububi, womJuda kuqala lowomGriki;

¹⁰kodwa inkazimulo lodumo lokuthula kuwo wonke owenza okuhle, kumJuda kuqala lakumGriki;

¹¹ngoba kakukho ukubandlulula umuntu kuNkulunkulu.

¹²Ngoba ngobunengi babonileyo bengelamlayo, bazabhubha labo bengelamlayo; njalo ngobunengi babonileyo emlayweni, bazagwetshwa ngomlayo;

¹³ngoba kakusibo abezwayo umlayo abalungileyo phambi kukaNkulunkulu, kodwa abenzayo umlayo bazalungisiswa.

¹⁴Ngoba nxa abezizwe abangelawo umlayo besenza ngokwemvelo okungokomlayo, bona, bengelawo umlayo, bangumlayo wabo ngokwabo;

¹⁵ababonakalisa ukuthi umsebenzi womlayo ulotshiwe enhliziyweni zabo; isazela sabo siyafakaza laso, lemicabango yabo phakathi kwabo i ba sole kumbe njalo i ba vikele,

¹⁶ngosuku uNkulunkulu azakwahlulela ngalo imfihlo zabantu, ngoJesu Kristu, ngokwevangeli lami.

¹⁷Khangela wena ubizwa ngokuthi ungumJuda, weyeme emlayweni, uzincoma ngoNkulunkulu,

¹⁸usazi intando yakhe, usemukela izinto ezingcono, ufundiswe emlayweni,

¹⁹njalo uzithembile wena ukuthi ungumholi weziphofu, ukukhanya kwabasemnyameni,

²⁰umeluleki wezithutha, umfundisi wensane, ulesimo solwazi lolweqiniso emlayweni.

²¹Ngakho wena ofundisa omunye, kawuzifundisi yini? Wena otshumayela ukuthi ungebi, uyeba yini?

²²Wena othi ungafebi, uyafeba yini? Wena onengwa yizithombe, uphanga amathempeli yini?

²³Wena ozincoma ngomlayo, udumaza uNkulunkulu ngokweqa umlayo yini?

²⁴Ngoba ibizo likaNkulunkulu liyahlanjazwa phakathi kwabezizwe ngenxa yenu, njengoba kulotshiwe.

²⁵Ngoba isibili ukusoka kuyasiza, uba usenza umlayo; kodwa uba ungumeqi womlayo, ukusoka kwakho sekuyikungasoki.

²⁶Ngakho uba ukungasoki kugcina izimiso zomlayo, ukungasoki kwakhe kakuyikubalwa yini ukuthi kuyikusoka?

²⁷Lokungasoki ngemvelo, egcwalisa umlayo, kunge kugwebe yini wena ongumeqi womlayo ngombhalo langokusoka?

²⁸Ngoba kayisuye umJuda o nguye ngokusobala, njalo kakusikho ukusoka okusobala enyameni;

²⁹kodwa yena ungumJuda o nguye ngasese, lokusoka kwenhliziyo emoyeni, kungeyisikho ngombhalo; ondumiso yakhe kayiveli ebantwini kodwa kuNkulunkulu.