Read Ndebele-IBhayibhili Elingcwele 2006 Kweberoma 3 Bible Online

Kweberoma 3 - Ndebele-IBhayibhili Elingcwele 2006 bible

Kweberoma 3

¹Pho-ke yibuphi ubungcono bomJuda, kumbe luyini usizo lokusoka?

²Kukhulu ngendlela yonke; ngoba kuqala-ke ukuthi baphathiswe amazwi kaNkulunkulu.

³Ngoba kuyini uba abanye bengakholwanga? Ukungakholwa kwabo kuzakwenza ize ukholo lukaNkulunkulu yini?

⁴Phinde ! Kodwa uNkulunkulu kabe leqiniso, kodwa wonke umuntu umqambimanga, njengokulotshiweyo ukuthi: Ukuze uthiwe ulungile emazwini akho, unqobe ekwahlulelweni kwakho.

⁵Kodwa uba ukungalungi kwethu kubonakalisa ukulunga kukaNkulunkulu, sizakuthini? Kambe uNkulunkulu kalunganga yini owehlisela ulaka? (Ngikhuluma njengomuntu.)

⁶Phinde ! Uba kungenjalo uNkulunkulu uzawahlulela njani umhlaba?

⁷Ngoba uba iqiniso likaNkulunkulu landisile kakhulu edumeni lwakhe ngamanga ami, mina ngisagwetshelwani njengesoni futhi?

⁸Njalo kungenjengalokhu sigconwa, lanjengoba abanye bathi thina sithi: Kasenze izinto ezimbi ukuze kuvele okuhle? Abakulahlwa kwabo kube ngokokulunga.

⁹Pho-ke? Singcono yini? Hatshi bo! Ngoba sesiwacalile mandulo amaJuda kanye lamaGriki ukuthi wonke angaphansi kwesono,

¹⁰njengokulotshiweyo ukuthi: Kakho olungileyo ngitsho loyedwa;

¹¹kakho oqedisisayo, kakho odinga uNkulunkulu;

¹²bonke baphambukile, kabasizi lutho bonkana; kakho owenza okuhle, kakho ngitsho loyedwa;

¹³umphimbo wabo ulingcwaba elivulekileyo; bakhohlisa ngenlimi zabo; ubuhlungu bephimpi bungaphansi kwendebe zabo;

¹⁴omlomo wabo ugcwele ukuqalekisa lokubaba;

¹⁵inyawo zabo ziphangisela ukuchitha igazi;

¹⁶incithakalo losizi kusendleleni zabo,

¹⁷njalo indlela yokuthula kabayazanga;

¹⁸ukwesaba uNkulunkulu kakukho phambi kwamehlo abo.

¹⁹Njalo siyazi ukuthi konke okutshoyo umlayo, ukukhuluma kibo abangaphansi komlayo, ukuze yonke imilomo ivinjwe, lokuthi umhlaba wonke ube lecala kuNkulunkulu;

²⁰ngoba emisebenzini yomlayo kakulanyama ezalungisiswa phambi kwakhe; ngoba ngomlayo kulokwazi isono.

²¹Kodwa khathesi-ke sekubonakalisiwe ukulunga kukaNkulunkulu ngaphandle komlayo, okufakazelwa ngumlayo labaprofethi;

²²ngitsho ukulunga kukaNkulunkulu ngokholo lukaJesu Kristu kibo bonke laphezu kwabo bonke abakholwayo; ngoba kawukho umehluko;

²³ngoba bonke bonile basilele enkazimulweni kaNkulunkulu,

²⁴balungisiswa ngesihle ngomusa wakhe ngohlengo olukuKristu Jesu;

²⁵uNkulunkulu ammisayo ukuthi abe yinhlawulo yokuthula, ngokholo egazini lakhe, ukuze kube yisibonakaliso sokulunga kwakhe, ngokunganaki izono ezenziwa ngaphambili, ekubekezeleni kukaNkulunkulu;

²⁶ukuze kube yisibonakaliso sokulunga kwakhe kulesisikhathi, ukuze abe ngolungileyo lokuthi uyamlungisisa ongowokholo lukaJesu.

²⁷Ngakho kungaphi ukuzincoma? Kuvalelwe phandle. Ngomthetho bani? Wemisebenzi yini? Hatshi bo, kodwa ngomthetho wokholo.

²⁸Ngakho sicina ngokuthi umuntu ulungisiswe ngokholo, ngaphandle kwemisebenzi yomlayo.

²⁹Kambe u nguNkulunkulu wamaJuda kuphela? Njalo kayisuye lowabezizwe yini? Yebo lowabezizwe;

³⁰lokhu uNkulunkulu emunye, ozalungisisa ukusoka ekholweni, lokungasoki ngokholo.

³¹Ngakho siyawenza umlayo ube yize yini ngokholo? Phinde ! Kodwa siyawuqinisa umlayo.