Read Ndebele-IBhayibhili Elingcwele 2006 Kweberoma 4 Bible Online

Kweberoma 4 - Ndebele-IBhayibhili Elingcwele 2006 bible

Kweberoma 4

¹Pho-ke sizakuthi uAbrahama ubaba wethu wazuzani ngokwenyama?

²Ngoba uba uAbrahama walungisiswa ngemisebenzi, ulokuzincoma, kodwa kungekho phambi kukaNkulunkulu.

³Ngoba umbhalo uthini? Uthi: Kodwa uAbrahama wakholwa kuNkulunkulu, kwasekubalelwa kuye ukuthi yikulunga.

⁴Kodwa kulowo osebenzayo kabelwa iholo ngokomusa, kodwa ngokomlandu.

⁵Kodwa kulowo ongasebenziyo, kodwa ekholwa kuye olungisisa oweyisa uNkulunkulu, ukholo lwakhe lubalelwa ukuthi yikulunga.

⁶Njengoba laye uDavida ekhuluma ngokubusiswa komuntu, uNkulunkulu ambalela ukulunga ngaphandle kwemisebenzi esithi:

⁷Babusisiwe abaziphambeko zabo zithethelelwe labazono zabo zisitshekelwe.

⁸Ubusisiwe umuntu iNkosi engasoze yambalela isono.

⁹Ngakho lokhukubusiswa kuphezu kokusoka yini, kumbe laphezu kokungasoki? Ngoba sithi: Ukholo lwabalelwa kuAbrahama ukuthi yikulunga.

¹⁰Pho lwabalelwa njani? Lapho esekusokeni yini, kumbe ekungasokini? Kungekho ekusokeni, kodwa ekungasokini.

¹¹Wasesemukela isibonakaliso sokusoka, uphawu lokulunga kokholo ayelakho ekungasokini; ukuze abe nguyise wabo bonke abakholwayo ekungasokini, ukuze ukulunga kubalelwe lakibo;

¹²loyise wokusoka kulabo abangaveli ekusokeni kuphela, kodwa abahamba labo ezinyathelweni zokholo lukababa wethu uAbrahama aye lalo engakasokwa.

¹³Ngoba kasingomlayo isithembiso kuAbrahama kumbe kunzalo yakhe, ukuthi uzakuba yindlalifa yomhlaba, kodwa ngokulunga kokholo.

¹⁴Ngoba uba labo abomlayo beyizindlalifa, ukholo lwenziwe ize, lesithembiso senziwa ize;

¹⁵ngoba umlayo uveza ulaka; ngoba lapho okungekho khona umlayo, kaku kho lokweqa.

¹⁶Ngakho ku ngokholo, ukuze kube ngokomusa, ukuze isithembiso siqiniseke kuyo yonke inzalo, kungeyisiyo engeyomlayo kuphela kodwa lakuyo engeyokholo lukaAbrahama, ongubaba wethu sonke,

¹⁷(njengokulotshiweyo ukuthi: Ngikumisile ukuthi ube nguyise wezizwe ezinengi ) phambi kwakhe akholwa kuye, uNkulunkulu, owenza abafileyo baphile, lobiza izinto ezingekho ngokungathi zikhona.

¹⁸Owathi emelane lethemba wakholwa ngethemba, ukuthi uzakuba nguyise wezizwe ezinengi, njengalokho okwatshiwoyo ukuthi: Izakuba njalo inzalo yakho.

¹⁹Njalo kabanga buthakathaka ekholweni, kanakananga umzimba wakhe uqobo owawusufile, ngoba wayesengaba leminyaka elikhulu, lokufa kwesizalo sikaSara;

²⁰kodwa kathandabuzanga ngesithembiso sikaNkulunkulu ngokungakholwa, kodwa waqiniswa ekholweni, enika uNkulunkulu udumo,

²¹njalo eqinisekile ngokupheleleyo ukuthi lokho ayekuthembisile, ulamandla ngitsho okukwenza.

²²Ngalokho-ke kwabalelwa kuye ukuthi yikulunga.

²³Kodwa kakubhalwanga ngenxa yakhe yedwa, ukuthi kwabalelwa kuye;

²⁴kodwa langenxa yethu, esizabalelwa khona, abakholwa kuye owavusa uJesu iNkosi yethu kwabafileyo,

²⁵owanikelwa ngenxa yeziphambeko zethu, wavuswa ngenxa yokulungisiswa kwethu.