Read Ndebele-IBhayibhili Elingcwele 2006 Kweberoma 5 Bible Online

Kweberoma 5 - Ndebele-IBhayibhili Elingcwele 2006 bible

Kweberoma 5

¹Ngakho sesilungisisiwe ngokholo, silokuthula kuNkulunkulu ngeNkosi yethu uJesu Kristu,

²okungaye njalo silokungena ngokholo kulumusa esimi kuwo, sizincoma ethembeni lobukhosi bukaNkulunkulu.

³Kakusikho lokhu -ke kuphela, kodwa sizincoma langezinhlupheko, sisazi ukuthi ukuhlupheka kuveza ukubekezela,

⁴lokubekezela ukuqina, lokuqina ithemba;

⁵lethemba kalidanisi, ngoba uthando lukaNkulunkulu lutheliwe enhliziyweni zethu ngoMoya oNgcwele esimuphiweyo.

⁶Ngoba sisebuthakathaka, ngesikhathi esifaneleyo uKristu wafela abeyisa uNkulunkulu.

⁷Ngoba kunzima ukuthi umuntu afele olungileyo; kodwa mhlawumbe kungaba khona ngitsho olesibindi sokufela olungileyo.

⁸Kodwa uNkulunkulu uqinisa uthando lwakhe uqobo kithi, ukuthi uKristu wasifela siseyizoni.

⁹Ngakho kakhulu-ke, lokhu sesilungisisiwe khathesi ngegazi lakhe, sizasindiswa ngaye elakeni.

¹⁰Ngoba uba, lapho siseyizitha, sesibuyisene loNkulunkulu ngokufa kweNdodana yakhe, ikakhulu lokhu sesibuyisene sizasindiswa ngempilo yayo;

¹¹njalo kakusikho lokhu kuphela, kodwa sizincoma futhi kuNkulunkulu ngeNkosi yethu uJesu Kristu, esesemukelisiwe ngaye ukubuyisana.

¹²Ngakho, njengalokhu ngamuntu munye isono sangena emhlabeni, langesono ukufa, ngokunjalo ukufa kwedlulela kubo bonke abantu, ngoba bonke bonile;

¹³ngoba kuze ku fike umlayo isono sasikhona emhlabeni; kodwa isono kasibalelwa, ungekho umlayo,

¹⁴kanti ukufa kwabusa kusukela kuAdamu kusiya kuMozisi, laphezu kwalabo ababengonanga okufanana lokweqa kukaAdamu, ongumfanekiso wakhe obezakuza.

¹⁵Kodwa kungenjengesiphambeko, sinjalo lesipho somusa. Ngoba uba ngesiphambeko soyedwa abanengi bafa, ikakhulu kwanda kwabanengi umusa kaNkulunkulu lesipho ngomusa womuntu munye uJesu Kristu.

¹⁶Futhi isipho kasinjengoyedwa owonayo; ngoba isigwebo sivela kwesisodwa sisiya ekulahlweni, kodwa isipho somusa savela eziphambekweni ezinengi sisiya ekulungisisweni.

¹⁷Ngoba uba ngesiphambeko so muntu oyedwa ukufa kwabusa ngalowo oyedwa, ikakhulu bona abemukela ubunengi bomusa lobesipho sokulunga bazabusa empilweni ngalowo oyedwa, uJesu Kristu.

¹⁸Ngakho njengoba ngesiphambeko sinye isigwebo saba kubo bonke abantu ukuya ekulahlweni, ngokunjalo langokulunga koyedwa umusa weza kubo bonke abantu ukuya ekulungisisweni kwempilo.

¹⁹Ngoba njengoba ngokungalaleli komuntu munye abanengi benziwa izoni, ngokunjalo langokulalela koyedwa abanengi bazakwenziwa abalungileyo.

²⁰Kodwa umlayo wangena wengeza, ukuze isiphambeko sande; kodwa lapho okwanda isono khona, umusa wanda kakhulukazi;

²¹ukuze njengoba isono sabusa ekufeni, ngokunjalo lomusa ubuse ngokulunga empilweni elaphakade, ngoJesu Kristu iNkosi yethu.