Read Ndebele-IBhayibhili Elingcwele 2006 1 Kwebekorinte 1 Bible Online

1 Kwebekorinte 1 - Ndebele-IBhayibhili Elingcwele 2006 bible

1 Kwebekorinte 1

¹UPawuli obizelwe ukuba ngumphostoli kaJesu Kristu ngentando kaNkulunkulu, loSostenesi umzalwane,

²kubandla likaNkulunkulu eliseKorinte, kubo abangcwelisiweyo kuKristu Jesu, ababizelwe ukuba ngabangcwele, kanye labo bonke ababiza ibizo leNkosi yethu uJesu Kristu kuyo yonke indawo, eyabo kanye leyethu:

³Umusa kawube kini lokuthula okuvela kuNkulunkulu uBaba wethu leNkosini uJesu Kristu.

⁴Ngiyambonga uNkulunkulu wami ngesikhathi sonke ngani, ngenxa yomusa kaNkulunkulu eliwuphiweyo kuKristu Jesu;

⁵ukuthi kuyo yonke into linothisiwe kuye, ekukhulumeni konke lelwazini lonke,

⁶njengalokhu ubufakazi bukaKristu buqinisiwe kini;

⁷ngakho kalisileli lasinye isipho, lilindele ukwembulwa kweNkosi yethu uJesu Kristu,

⁸ozaliqinisa futhi kuze kube sekupheleni, lingelacala ngosuku lweNkosi yethu uJesu Kristu.

⁹UNkulunkulu uthembekile, elabizelwa ngaye ekuhlanganyeleni kweNdodana yakhe uJesu Kristu iNkosi yethu.

¹⁰Kodwa ngiyalincenga, bazalwane, ngebizo leNkosi yethu uJesu Kristu, ukuthi lonke likhulume into ibenye, njalo kungabi khona ukwehlukana phakathi kwenu, kodwa lipheleliswe emqondweni munye lekuboneni kunye.

¹¹Ngoba ngitsheliwe ngani, bazalwane bami, ngabakoKlowe, ukuthi kukhona izingxabano phakathi kwenu.

¹²Njalo ngitsho lokhu, kokuthi ngulowo lalowo wenu uthi: Mina ngingokaPawuli, kodwa mina okaApolosi, kodwa mina okaKefasi, kodwa mina okaKristu.

¹³UKristu wehlukanisiwe yini? Kanti uPawuli wabethelelwa lina, kumbe labhabhathizwa yini ebizweni likaPawuli?

¹⁴Ngiyambonga uNkulunkulu ukuthi kangibhabhathizanga lamunye wenu, ngaphandle kukaKrispusi loGayusi;

¹⁵ukuze kungabi khona othi ngabhabhathiza ebizweni lami uqobo.

¹⁶Futhi ngabhabhathiza lendlu kaStefana; ngaphandle kwalokho kangazi ukuthi ngabhabhathiza omunye umuntu.

¹⁷Ngoba uKristu kangithumanga ukuthi ngibhabhathize, kodwa ukuthi ngitshumayele ivangeli; kungeyisikho ngenhlakanipho yelizwi, hlezi isiphambano sikaKristu senziwe ize.

¹⁸Ngoba ilizwi lesiphambano liyibuthutha kulabo ababhubhayo, kodwa kithi abasindiswayo lingamandla kaNkulunkulu.

¹⁹Ngoba kulotshiwe ukuthi: Ngizachitha inhlakanipho yabahlakaniphileyo, lokuqedisisa kwabaqedisisayo ngizakwenza ize.

²⁰Singaphi isihlakaniphi? Ungaphi umbhali? Ungaphi umphikisi walumhlaba? Angithi uNkulunkulu wayenza yaba yibuthutha inhlakanipho yalumhlaba yini?

²¹Ngoba kuthe enhlakaniphweni kaNkulunkulu umhlaba kawumazanga uNkulunkulu ngenhlakanipho, kwaba kuhle kuNkulunkulu ukusindisa abakholwayo ngobuthutha bentshumayelo.

²²Ngoba lamaJuda acela isibonakaliso, lamaGriki adinga inhlakanipho;

²³kodwa thina sitshumayela uKristu obethelweyo, isikhubekiso kumaJuda, lobuthutha kumaGriki;

²⁴kodwa kulabo ababiziweyo, kumaJuda kanye lakumaGriki, uKristu amandla kaNkulunkulu lenhlakanipho kaNkulunkulu;

²⁵ngoba ubuthutha bukaNkulunkulu buhlakaniphile kulabantu, lobuthakathaka bukaNkulunkulu bulamandla kulabantu.

²⁶Ngoba khangelani ubizo lwenu, bazalwane, ukuthi ka ba banengi abahlakaniphileyo ngokwenyama, ka ba banengi abalamandla, ka ba banengi abayizikhulu;

²⁷kodwa uNkulunkulu ukhethile izinto zobuthutha zomhlaba, ukuze ayangise abahlakaniphileyo; njalo uNkulunkulu ukhethile okubuthakathaka komhlaba, ukuze ayangise okulamandla;

²⁸lezinto eziphansi zomhlaba lezinto ezidelelekayo uNkulunkulu uzikhethile, lezinto ezingekho, ukuze enze zibe yize izinto ezikhona;

²⁹ukuze kungabikho inyama ezincomayo phambi kwakhe.

³⁰Kodwa kuye lina likuKristu Jesu, owenzelwa thina inhlakanipho evela kuNkulunkulu, lokulunga, lokungcweliswa, lohlengo,

³¹ukuze, njengokulotshiweyo ukuthi: Ozincomayo, kazincome eNkosini.