Read Ndebele-IBhayibhili Elingcwele 2006 1 Kwebekorinte 11 Bible Online

1 Kwebekorinte 11 - Ndebele-IBhayibhili Elingcwele 2006 bible

1 Kwebekorinte 11

¹Banini ngabalandeli bami, njengoba lami okaKristu.

²Ngiyalidumisa-ke, bazalwane, ukuthi liyangikhumbula ezintweni zonke, lokuthi libambelele ezimisweni njengoba ngalinika.

³Kodwa ngithanda ukuthi lazi, ukuthi inhloko yawo wonke amadoda nguKristu; lenhloko yowesifazana yindoda; lenhloko kaKristu nguNkulunkulu.

⁴Yonke indoda ekhulekayo loba eprofethayo, ilo lutho ekhanda ilithela ihlazo ikhanda layo.

⁵Kodwa wonke owesifazana okhuleka kumbe aprofethe ikhanda lingambombozwanga, ulithela ihlazo elakhe ikhanda; ngoba lokhu kufanana-ke lophuciweyo.

⁶Ngoba uba owesifazana engagubuzeli, futhi kagele; kodwa uba kukubi kowesifazana ukugela kumbe ukuphucwa, kagutshuzelwe.

⁷Ngoba indoda kayifanele ukumbomboza ikhanda, ngoba ingumfanekiso lodumo lukaNkulunkulu; kodwa owesifazana uludumo lwendoda.

⁸Ngoba indoda kayivelanga kowesifazana, kodwa owesifazana endodeni;

⁹ngoba futhi indoda kayidalelwanga owesifazana, kodwa owesifazana indoda;

¹⁰ngenxa yalokhu owesifazana kufanele abe lamandla phezu kwekhanda ngenxa yezingilosi.

¹¹Kodwa indoda kayingaphandle kowesifazana, lowesifazana kangaphandle kwendoda, eNkosini.

¹²Ngoba njengoba owesifazana evela endodeni, ngokunjalo lendoda ivela ngowesifazana, kodwa konke kuvela kuNkulunkulu.

¹³Ziboneleni lina; kufanele yini ukuthi owesifazana akhuleke kuNkulunkulu engambombozanga?

¹⁴Imvelo uqobo lwayo kayilifundisi yini, ukuthi uba indoda ilenwele ezinde, kulihlazo kuyo?

¹⁵Kodwa uba owesifazana elenwele ezinde, kuludumo kuye. Ngoba inwele uziphiwe ukuthi zibe yisimbombozo.

¹⁶Kodwa uba umuntu ebonakala elenkani, thina kasilawo umkhuba onjalo, ngitsho lamabandla kaNkulunkulu.

¹⁷Kodwa ngokulaya lokhu kangidumisi, ngoba libuthana ngokungekuhle kodwa ngokubi.

¹⁸Okokuqala ngoba nxa libuthana ebandleni, ngizwa ukuthi kukhona ukwehlukana phakathi kwenu; njalo nganxanye ngiyakukholwa.

¹⁹Ngoba kufanele ukuba lobubhazuka futhi phakathi kwenu, ukuze labo abaqinisileyo babonakale phakathi kwenu.

²⁰Ngakho nxa libuthana ndawonye, lokhu kakusikho ukudla isidlo seNkosi;

²¹ngoba ngulowo lalowo uthatha kuqala esakhe isidlo ekudleni, lomunye ulambile, lomunye udakiwe.

²²Kanti kalilazo izindlu zokudlela lezokunathela? Kumbe lidelela ibandla likaNkulunkulu, liyangise yini abangela lutho? Ngingathini kini? Ngingalidumisa kulokhu yini? Kangi li dumisi.

²³Ngoba mina ngakwemukela eNkosini, lokho lami engalinika khona, ukuthi iNkosi uJesu ngobusuku eyanikelwa ngabo yathatha isinkwa,

²⁴isibongile ya si hlephuna, yathi: Thathani, lidle, lokhu kungumzimba wami owahletshunelwa lina; lokhu kwenzeni ukungikhumbula.

²⁵Ngokunjalo lenkezo, sebedlile, yathi: Inkezo le iyisivumelwano esitsha egazini lami; lokhu kwenzeni, loba nini li yi natha, ukungikhumbula.

²⁶Ngoba loba nini nxa lisidla lesisinkwa, linatha linkezo, litshumayela ukufa kweNkosi ize ifike.

²⁷Ngakho loba ngubani odla lesisinkwa kumbe anathe inkezo yeNkosi ngokungafanelanga, uzakuba lecala lomzimba legazi leNkosi.

²⁸Kodwa umuntu kumele azihlole, ngokunjalo-ke adle okwesinkwa anathe okwenkezo;

²⁹ngoba odlayo anathe ngokungafanele, uzidlela azinathele isigwebo, engawehlukanisi umzimba weNkosi.

³⁰Ngenxa yalokhu banengi kini ababuthakathaka labagulayo, lenengi lilele.

³¹Kodwa uba besizihlolile thina, besingayikwahlulelwa;

³²kodwa nxa sisahlulelwa, sikhuzwa yiNkosi, ukuze singalahlwa kanye lomhlaba.

³³Ngakho, bazalwane bami, nxa libuthana ukuthi lidle, kalibomelelana.

³⁴Njalo uba omunye elambile, kabokudla ekhaya; ukuze lingabuthaneli ukugwetshwa. Okuseleyo-ke, ngizakulungisa mhla ngifikayo.