Read Ndebele-IBhayibhili Elingcwele 2006 2 Kwebekorinte 13 Bible Online

2 Kwebekorinte 13 - Ndebele-IBhayibhili Elingcwele 2006 bible

2 Kwebekorinte 13

¹Ngalesisikhathi sesithathu ngiza kini; ngemilomo yabafakazi ababili kumbe abathathu wonke umutsho uzaqiniswa.

²Sengitshilo ngaphambili njalo ngiyandulela ukutsho, njengalokhu ngikhona ngokwesibili, njalo ngingekho khathesi ngibhalela kulabo abona ngaphambili lakwabanye bonke, ukuthi nxa ngingabuya futhi, kangisoze ngi ba yekele;

³njengoba lidinga ubufakazi bukaKristu okhuluma kimi, ongebuthakathaka kini kodwa elamandla phakathi kwenu;

⁴ngoba lanxa wabethelwa ngobuthakathaka, kanti uyaphila ngamandla kaNkulunkulu. Ngoba lathi sibuthakathaka kuye, kodwa sizaphila kanye laye ngamandla kaNkulunkulu kini.

⁵Zihloleni ukuthi lisekholweni, lizilinge. Kanti kalazi lina ukuthi uJesu Kristu ukini? Ngaphandle kokuthi ngeqiniso lingabalahliweyo.

⁶Ngithemba-ke ukuthi lizakwazi ukuthi thina kasisibo abalahliweyo.

⁷Njalo ngiyakhuleka kuNkulunkulu, ukuthi lingenzi lutho olubi, kungesikuthi sibonakale thina singabathembekileyo, kodwa ukuze lina lenze ukulunga, kodwa thina sibe njengabalahliweyo.

⁸Ngoba kasilamandla okwenza ulutho olumelana leqiniso, kodwa okweqiniso.

⁹Ngoba siyajabula nxa sibuthakathaka thina, lani lilamandla; njalo lalokho siyakukhulekela, ukupheleliswa kwenu.

¹⁰Ngakho ngibhala lezizinto ngingekho, ukuze kuthi nxa ngikhona ngingasebenzisi ubukhali, njengamandla iNkosi eyanginika wona, ekwakheni, njalo angabi ngawokubhidliza.

¹¹Elokucina, bazalwane, thokozani, lipheleliswe, liduduzwe, libe ngqondonye, lihlale ngokuthula; njalo uNkulunkulu wothando lowokuthula uzakuba lani.

¹²Bingelelanani ngokwanga okungcwele.

¹³Bonke abangcwele bayalibingelela.

¹⁴Umusa weNkosi uJesu Kristu, lothando lukaNkulunkulu, lokuhlanganyela kukaMoya oNgcwele kakube lani lonke. Ameni.